AKP សៀមរាប ថ្ងៃទី១១ ខែមីនា ឆ្នាំ២០២៥ -- ការរៀបចំអង្គរសង្រ្កាន្ដក្នុងឆ្នាំនេះគឺជាព្រឹត្ដិការណ៍ដ៏ធំ និងមានភាពអស្ចារ្យ ដើម្បីបង្ហាញនូវវប្បធម៌ ប្រពៃណី និងទំនៀមទម្លាប់របស់ខ្មែរ ដែលប្រារព្ធធ្វើនៅខេត្ដសៀមរាប សម្រាប់ផ្ដល់ភាពសប្បាយរីករាយជូនដល់ប្រជាពលរដ្ឋកម្ពុជា ក៏ដូចជាភ្ញៀវទេសចរជាតិ-អន្ដរជាតិ ឱ្យមកកម្សាន្ដសប្បាយក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។

បើគិតចាប់ពីពេលនេះរហូតដល់ព្រឹត្ដិការណ៍អង្គរសង្រ្កាននោះ គឺនៅសល់តែរយៈពេលជាង១ខែទៀតប៉ុណ្ណោះ ដែលក្រុមការងាររៀបចំព្រឹត្ដិការណ៍នេះបានចាប់ផ្ដើមសាងសង់នូវទស្សនីយភាពប្លែកៗ រូបភាពទាក់ទាញ និងកម្មវិធីកម្សាន្ដផ្សេងៗនៅតាមទីតាំងនានាក្នុងខេត្ដ និងក្នុងបរិវេណប្រាសាទអង្គរវត្ដ។ ជាមួយគ្នានេះដែរ អាជ្ញាធរខេត្ដសៀមរាបក៏បានរៀបចំតុបតែងលម្អតាមដងផ្លូវ សួនច្បារ តាមដងស្ទឹង និងតាមទីកន្លែងមួយចំនួនទៀតនៅក្នុងខេត្ដ ពិសេសការធានានូវសន្ដិសុខ សុវត្ថិភាពជូនភ្ញៀវទេសចរជាតិ-អន្ដរជាតិដែលមកកម្សាន្ដសប្បាយនៅក្នុងព្រឹត្ដិការណ៍ដ៏ធំមួយនេះនាពេលខាងមុខ។

មុននឹងឈានទៅប្រារព្ធនូវព្រឹត្ដិការណ៍អង្គរសង្រ្ដាន្ដនេះ ក្រុមការងារសហភាពសហព័ន្ធយុវជនកម្ពុជា រួមជាមួយនឹងរដ្ឋបាលខេត្ដសៀមរាបនៅព្រឹកថ្ងៃទី០៩ ខែមីនា ឆ្នាំ២០២៥ បានរៀបចំពិធីប្រុងពលីបើកការដ្ឋានព្រឹត្តិ​ការណ៍​អង្គរសង្ក្រាន្ដឆ្នាំ២០២៥ នៅស្ពានហាលខាងលិចប្រាសាទអង្គរវត្តខេត្តសៀមរាប ដោយមានការអញ្ជើញចូលរួមពីឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ត និងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប។ 

ការរៀបចំពិធីប្រុងពលីនេះ ធ្វើឡើងក្នុងគោលបំណងសំខាន់ គឺដើម្បីបួងសួងដល់វត្ថុស័ក្តិសិទ្ធិទាំងឡាយ ម្ចាស់ទឹកម្ចាស់ដី ទេវតាថែរក្សាប្រាង្គប្រាសាទអង្គរ សូមឱ្យការសាងសង់ទីតាំង និងការរៀបចំនានានៃព្រឹត្តិការណ៍អង្គរសង្រ្កាន្ត ឆ្នាំ២០២៥ ដំណើរការទៅដោយរលូន និងមានសេចក្តីសុខ សិរីសួស្តីដល់ក្រុមការងារគ្រប់ៗគ្នា។ ទន្ទឹមនេះដែរ ការរៀបចំកម្មវិធីនេះក៏ដូចជាការប្រកាសជាផ្លូវការ នៃការត្រៀមរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» ដែលជាបំណងប្រាថ្នារបស់ប្រជាពលរដ្ឋជាច្រើនរូប ដែលមានលក្ខណៈពិសេស និងអស្ចារ្យ ធ្វើយ៉ាងណាផ្តល់ស្នាមញញឹម និងផ្តល់ភាពសប្បាយរីករាយដល់មហាក្រុមគ្រួសារខ្មែរ ក្នុងឱកាសនៃការអបអរសាទរបុណ្យចូលឆ្នាំថ្មីប្រពៃណីជាតិ។ 

ថ្លែងនៅក្នុងសន្និសីទសារព័ត៌មានស្តីពីការរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ ក្រោមប្រធានបទ «ញញឹមសាទរសង្ក្រាន្តឆ្នាំថ្មី» បន្ទាបពីចប់ពិធីប្រុងពលីរួចមកនោះ ឯកឧត្តម ហ៊ុន ម៉ានី បានលើកឡើងថា ខេត្តសៀមរាបឆ្នាំនេះ នឹងមានភាពអស្ចារ្យ និងសប្បាយរីករាយលើកពីធម្មតា ជាមួយព្រឹត្តិការណ៍អង្គរសង្ក្រាន្ត ហើយអ្វីដែលកាន់តែពិសេស នៅក្នុងព្រឹត្តិការណ៍អង្គរសង្ក្រាន្ត ឆ្នាំ២០២៥នេះ គឺព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងជាព្រះរាជាធិបតីភាពដ៏ខ្ពស់ខ្ពស់បំផុត ក្នុងព្រះរាជពិធីបួងសួងចម្រើនសេចក្តីសុខ ជូនព្រះរាជាណាចក្រកម្ពុជា នៅថ្ងៃទី១២ ខែមេសា ឆ្នាំ២០២៥ ដែលត្រូវបានរៀបចំដោយក្រសួងព្រះបរមរាជវាំង និងគណៈកម្មាធិការជាតិរៀបចំបុណ្យជាតិ-អន្តរជាតិ។ ឯកឧត្ដមបានបញ្ជាក់ថា ទាំងនេះ គឺជាព្រឹត្តិការណ៍មួយដ៏អស្ចារ្យ ហើយក៏ជាឱកាសសម្រាប់ប្រជាជនខ្មែរ ក្នុងការធ្វើដំណើរមក ខេត្តសៀមរាប បានជួបព្រះភ័ក្រ្តព្រះមហាក្សត្រ ដោយផ្ទាល់ ក៏ដូចជាបានសប្បាយរីករាយជាមហាគ្រួសារខ្មែរ។

ឯកឧត្តម ហ៊ុន ម៉ានី បានរម្លឹកផងដែរថា គិតចាប់ឆ្នាំ២០១៣ រហូតមកដល់ពេលនេះ ព្រឹត្តិការណ៍អង្គរសង្ក្រាន្តបានធ្វើចំនួន១២ឆ្នាំហើយ ដែលការរៀបចំអង្គរសង្គ្រាន្តឆ្នាំទី១២នេះ ជាបំណងប្រាថ្នារបស់ប្រជាពលរដ្ឋជាច្រើនរូប ហើយក៏ជាការផ្តល់ជូននូវជម្រើសមួយបន្ថែមទៀតរបស់សម្តេចធិបតីនាយករដ្ឋមន្ត្រី ជូនដល់ពលរដ្ឋកម្ពុជា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ ឯកឧត្ដមអះអាងថា៖ «ការរៀបចំព្រឹត្ដិការណ៍នេះនឹងខិតប្រឹងប្រែងធ្វើយ៉ាងណាឱ្យកាន់តែប្រសើរឡើង និងមានភាពទាក់ទាញ។ ទាំងនេះបានបញ្ជាក់ថា ខេត្តសៀមរាប ពិតជាអស្ចារ្យ នៃការទទួលនូវភាពសប្បាយរីករាយ នៅក្នុងឆ្នាំ២០២៥នេះ ដែលមានទាំងព្រះរាជពិធីផង និងកម្មវិធីកម្សាន្តនានាក្នុងព្រឹត្តិការណ៍អង្គរសង្ក្រាន្តផង»។ 

ព្រឹត្តិការណ៍អង្គរសង្ក្រាន្តឆ្នាំ២០២៥នេះ នឹងធ្វើឡើងចំនួន៦ទីតាំង នៅបរិវេណប្រាសាទអង្គរវត្ត, សួនច្បារព្រះរាជដំណាក់, ដងស្ទឹងសៀមរាប King’s Road, Pub street និងអង្គរឃ្យុងយូ។ ដោយមានកម្មវិធីកម្សាន្តសប្បាយជាច្រើនមាន ដូចជា ការសម្តែងទស្សនីយភាព, ចង្វាក់បេះដូងអង្គរ, កម្មវិធីភូមិខ្ញុំ, កម្មវិធីការប្រកួតអុក,កម្មវិធីក្បួនដង្ហែអង្គរសង្រ្កាន្ត,កម្មវិធីយុទ្ធគុនចម្រុះបុរាណខ្មែរ, កម្មវិធីរបាំបុរាណ, ប្រពៃណី និងប្រជាប្រិយ, កម្មវិធីសួនញញឹមអង្គរ, កម្មវិធីតស់ៗលេងទឹក, កម្មវិធីសួនមុនីហទ័យ, កម្មវិធីផ្សារស្ទឹងសៀមរាប, កម្មវិធីប្រណាំងរទេះគោ ក្របី និងពិធីស្រង់ព្រះជាដើម។ ជាមួយគ្នានេះការសម្តែងសិល្បៈ ទស្សនីយភាព “ចង្វាក់បេះដូងអង្គរ” ដែលជាការផ្តល់បទពិសោធន៍ថ្មី និងឱកាសដល់សាធារណជនអាចចូលរួមទស្សនាការសម្តែងក្នុងបរិវេណនៃប្រាសាទអង្គរវត្ត (បណ្តាល័យខាងត្បូងនៃប្រាសាទអង្គរ) រយៈពេល ៣យប់ នឹងក្លាយជាព្រឹត្តិការណ៍ថ្មីប្លែកមួយក្នុងព្រឹត្តិការណ៍អង្គរសង្ក្រាន្តឆ្នាំ២០២៥។

ក្នុងឱកាសនោះ ឯកឧត្តម ប្រាក់ សោភ័ណ អភិបាលខេត្តសៀមរាបបានលើកឡើងដែរថា រដ្ឋបាលខេត្តសៀមរាបបានត្រៀមខ្លួនរួចជាស្រេចហើយសម្រាប់ចូលរួមជាមួយក្នុងសហភាពសហព័ន្ធយុវជនកម្ពុជា ក្នុងការរៀបចំព្រឹត្តិការអង្គរសង្ក្រាន្តឆ្នាំ២០២៥នេះ។​ ឯកឧត្តមអភិបាលខេត្តបានគូសបញ្ជាក់ថា ដោយសារតែព្រឹត្តិការណ៍អង្គរសង្ក្រាន្តតែងតែមានភ្ញៀវទេសចរជាតិ និងអន្តរជាតិមកចូលរួមកម្សាន្តច្រើន ដូចនេះគិតត្រឹមថ្ងៃទី០៩ ខែមីនា ឆ្នាំ២០២៥ អត្រាកក់បន្ទប់ស្នាក់នៅ គឺមានច្រើនជាពិសេស សណ្ឋាគារផ្កាយ៣ ផ្កាយ៤ និងផ្កាយ៥។ ដោយឡែកសម្រាប់ផ្ទះសំណាក់ មានមួយចំនួនក៏បានធ្វើការកក់ហើយ និងមានមួយចំនួនទៀតក៏នៅមិនទាន់មានការកក់។

សូមជម្រាបថា ព្រឹត្តិការណ៍អង្គរសង្ក្រាន្តឆ្នាំ២០២៥ នឹងត្រូវរៀបចំឡើងក្រោមប្រធានបទ «ញញឹមសាទរសង្ក្រាន្តឆ្នាំថ្មី» ដែលនឹងលើកយកនូវកេរតំណែលអរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពចម្រុះដ៏សម្បូរបែបនៅលើទឹកដីអង្គររយៈពេល ០៣ ថ្ងៃ គឺថ្ងៃទី ១៤ ១៥ និង១៦ ខែមេសា ឆ្នាំ២០២៥។ ជួបគ្នាឆាប់ៗ អង្គរសង្ក្រាន្តឆ្នាំ២០២៥៕

ដោយ៖ ឃុត សៅ