AKP ភ្នំពេញ ថ្ងៃទី១១ ខែមីនា ឆ្នាំ២០២៥ -- យោធាកូរ៉េខាងត្បូងបាននិយាយថា ប្រទេសកូរ៉េខាងជើងបានបាញ់មីស៊ីលផ្លោងជាច្រើនគ្រាប់ឆ្ពោះទៅសមុទ្រលឿងកាលពីថ្ងៃចន្ទ ខណៈដែលទីក្រុងសេអ៊ូល និងទីក្រុងវ៉ាស៊ីនតោនបានចាប់ផ្តើមសមយុទ្ធយោធាប្រចាំឆ្នាំរបស់ពួកគេ ដែលជាការកត់សម្គាល់សម្រាប់ការសាកល្បងមីស៊ីលផ្លោងជាលើកដំបូងរបស់ប្រទេសកូរ៉េខាងជើង ចាប់តាំងពីការវិលត្រឡប់របស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) មកកាន់សេតវិមាន។

អគ្គសេនាធិការចម្រុះ (JCS) បាននិយាយថា ខ្លួនបានរកឃើញការបាញ់បង្ហោះចេញពីតំបន់មួយនៅជិតតំបន់ភាគខាងលិចនៃទីក្រុងវ៉ាងជូ ក្នុងខេត្តវ៉ាងហេ ភាគខាងជើង នៅម៉ោងប្រហែល ១:៥០នាទីរសៀល ដោយJCS បានកត់សំគាល់ថា វាអាចមានការពាក់ព័ន្ធនឹងមីស៊ីលផ្លោងរយៈចម្ងាយជិត (CRBMs) ។ មីស៊ីល CRBMs សំដៅលើមីស៊ីលផ្លោងដែលមានរយៈចម្ងាយខ្លីតិចជាង ៣០០ គីឡូម៉ែត្រ។

នៅក្រោមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ប្រទេសកូរ៉េខាងជើងត្រូវបានហាមឃាត់មិនឱ្យបាញ់បង្ហោះដែលប្រើបច្ចេកវិទ្យាមីស៊ីលផ្លោង។ JCS បាននិយាយថា ខ្លួនបានពង្រឹងការឃ្លាំមើល និងរក្សាជំហរត្រៀមខ្លួនពេញលេញក្រោមកិច្ចសហប្រតិបត្តិការជិតស្និទ្ធជាមួយសហរដ្ឋអាមេរិក។

ប្រទេសកូរ៉េខាងត្បូង និងសហរដ្ឋអាមេរិកបានចាប់ផ្តើមសមយុទ្ធFreedom Shield ប្រចាំឆ្នាំរបស់ពួកគេកាលពីថ្ងៃចន្ទសម្រាប់ការត្រៀមរយៈពេល ១១ថ្ងៃ។ ប្រទេសកូរ៉េ​ខាង​ជើង​បាន​ថ្កោល​ទោស​សមយុទ្ធ​រួម​របស់​សម្ព័ន្ធមិត្ត​ជា​យូរ​មក​ហើយ​ថា​ជា​ការ​ហាត់​សម​សម្រាប់​ការ​ឈ្លានពាន​ប្រឆាំង​នឹង​ខ្លួន។

កាល​ពី​ព្រឹក​ថ្ងៃ​ចន្ទ ក្រសួង​ការ​បរទេស​កូរ៉េ​ខាង​ជើង​បាន​និយាយពី​សមយុទ្ធ​របស់​សម្ព័ន្ធមិត្ត​ថា​ជា​ទង្វើ​បង្ក​ហេតុ​ដ៏​គ្រោះថ្នាក់ ដោយក្រសួង​និយាយ​ថា សមយុទ្ធនេះ​នឹង​នាំ​ឲ្យ​មាន​វិបត្តិ​សន្តិសុខ​កាន់​តែ​ធ្ងន់ធ្ងរ។

ប្រទេសកូរ៉េខាងត្បូង និងសហរដ្ឋអាមេរិកបានច្រានចោលការចោទប្រកាន់អំពីការហាត់សមការឈ្លានពាន ដោយប្រទេសទាំងពីរបានពណ៌នាពីសមយុទ្ធរួមគ្នារបស់ពួកគេថាជាការការពារធម្មជាតិ។ប្រទេសកូរ៉េខាងជើង​បាន​បាញ់​មី​ស៊ី​ល​រយៈ​ចម្ងាយ​ខ្លី​ជាច្រើន​គ្រាប់​ចូល​សមុទ្រ​ខាងកើត​កាលពី​ថ្ងៃទី១៤ ខែមករា​៕

ដោយ៖ មូល មិនា (ប្រភព៖ យ៉ុនហាប់)