AKP ភ្នំពេញ ថ្ងៃទី១១ ខែមីនា ឆ្នាំ២០២៥ -- អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក តូ ឡឹម (To Lam)បានធ្វើដំណើរទៅកាន់ប្រទេសឥណ្ឌូនេស៊ី កាលពីថ្ងៃអាទិត្យ ដើម្បីចាប់ផ្តើមដំណើរទស្សនកិច្ចផ្លូវរដ្ឋរយៈពេល ៣ថ្ងៃក្នុងគោលបំណងពង្រឹងទំនាក់ទំនងទ្វេភាគី។

ដំណើរ​ទស្សន​កិច្ច​ដែល​នឹង​មាន​រយៈ​ពេល​ពី​ថ្ងៃ​អាទិត្យ​ដល់​ថ្ងៃ​អង្គារនេះ​ត្រូវ​បាន​ធ្វើ​ឡើង​តាម​ការ​អញ្ជើញ​របស់​ប្រធានាធិបតី​ឥណ្ឌូណេស៊ី លោក ប្រាបូវូ ស៊ូប៊ីអានតូ (Prabowo Subianto) ហើយ​ស្រប​នឹង​ខួប​លើក​ទី​៧០ ​នៃ​ទំនាក់ទំនង​ការទូត​រវាងប្រទេស​ឥណ្ឌូនេស៊ី ​និង​វៀតណាម។

លោក តូ ឡឹម បានចុះចតនៅអាកាសយានដ្ឋាន Halim Perdanakusuma ក្នុងទីក្រុងហ្សាកាតា នៅម៉ោងប្រហែល ១:១៥នាទីរសៀល ជាកន្លែងដែលលោកត្រូវបានស្វាគមន៍ដោយរដ្ឋមន្ត្រីក្រសួងកិច្ចការសមុទ្រ និងនេសាទឥណ្ឌូនេស៊ី លោក សាកទី វ៉ាហ៍យូ ត្រេងហ្គោណូ (Sakti Wahyu Trenggono) និងអភិបាលក្រុងហ្សាកាតា លោក ប្រាម៉ូណូ អានុង (Pramono Anung) ។

កាលពីថ្ងៃច័ន្ទ លោក តូ ឡឹម គ្រោងនឹងជួបជាមួយលោក ប្រាបូវូ ដើម្បីពិភាក្សាអំពីឱកាសសហប្រតិបត្តិការដ៏មានសក្តានុពលដែលអាចលើកកម្ពស់ទំនាក់ទំនងទ្វេភាគីបន្ថែមទៀត៕

ដោយ៖ មូល មិនា (ប្រភព៖ ស៊ីនហួ)