AKP ភ្នំពេញ ថ្ងៃទី១១ ខែមីនា ឆ្នាំ២០២៥ -- នាយករដ្ឋមន្ត្រីនូវែលសេឡង់លោក គ្រីស្តូហ្វ័រ លូសុន (Christopher Luxon) បានប្រកាសកាលពីថ្ងៃចន្ទថា លោកនឹងទៅបំពេញទស្សនកិច្ចនៅប្រទេសឥណ្ឌាជាមួយនឹងគណៈប្រតិភូធុរកិច្ចជាន់ខ្ពស់។

លោក លូសុន បាននិយាយថា ការពង្រឹងទំនាក់ទំនងរវាងឥណ្ឌា-នូវែលសេឡង់ គឺជាអាទិភាពដ៏សំខាន់សម្រាប់ពួកគេ។

លោកបាននិយាយថា «សប្តាហ៍ក្រោយ ខ្ញុំនឹងធ្វើដំណើរទៅកាន់ប្រទេសឥណ្ឌាជាមួយគណៈប្រតិភូធុរកិច្ចជាន់ខ្ពស់។ ការពង្រឹងទំនាក់ទំនងរបស់ប្រទេសនូវែលសេឡង់ជាមួយប្រទេសឥណ្ឌា គឺជាអាទិភាពដ៏សំខាន់សម្រាប់រដ្ឋាភិបាលរបស់ខ្ញុំ»។

លោក លូសុន បាននិយាយថា លោកចង់បង្កើនឱកាសពាណិជ្ជកម្ម និងធុរកិច្ចនៃប្រទេសទាំងពីរ និងលើកកម្ពស់ប្រទេសនូវែលសេឡង់ជាគោលដៅវិនិយោគ។

លោកបាននិយាយថា «ប្រទេសឥណ្ឌា គឺជាប្រទេសដែលមានសេដ្ឋកិច្ចធំជាងគេលំដាប់ទី៥ នៅលើពិភពលោក ហើយខ្ញុំផ្តោតសំខាន់ទៅលើការបង្កើនឱកាសពាណិជ្ជកម្ម និងធុរកិច្ចរវាងប្រទេសទាំងពីរព្រមទាំងលើកកម្ពស់ប្រទេសនូវែលសេឡង់ជាទិសដៅវិនិយោគ។ពាណិជ្ជកម្ម គឺជាផ្នែកសំខាន់នៃផែនការរបស់យើងក្នុងការរីកចម្រើនផ្នែកសេដ្ឋកិច្ច ដើម្បីកាត់បន្ថយថ្លៃចំណាយនៃការរស់នៅ និងបង្កើតការងារបន្ថែម និងប្រាក់ចំណូលខ្ពស់សម្រាប់ប្រជាជននូវែលសេឡង់ទាំងអស់»។

សេចក្តីថ្លែងការណ៍របស់ក្រសួងការបរទេសបាននិយាយថា តបតាមការអញ្ជើញរបស់នាយករដ្ឋមន្ត្រីឥណ្ឌា លោក ណារេនដ្រា ម៉ូឌី (Narendra Modi) លោក លូសុន នឹងទៅបំពេញទស្សនកិច្ចជាផ្លូវការនៅប្រទេសឥណ្ឌាចាប់ពីថ្ងៃទី១៦ ដល់ថ្ងៃទី២០ ខែមីនា។

សេចក្តី​ថ្លែងការណ៍នោះ​បាន​និយាយ​ថា នេះ​នឹងក្លាយ​ជា​ដំណើរ​ទស្សនកិច្ច​លើក​ដំបូង​របស់លោក លូសុន ទៅ​កាន់​ប្រទេស​ឥណ្ឌាក្នុង​នាម​ជា​នាយក​រដ្ឋមន្ត្រី​នូវែលសេឡង់៕

ដោយ៖ យា ចិន្ដាខន្ដី (ប្រភព៖ ANI)