AKP ភ្នំពេញ ថ្ងៃទី១១ ខែមីនា ឆ្នាំ២០២៥ -- វិមានក្រឹមឡាំងបាននិយាយកាលពីថ្ងៃចន្ទថា ដំណើរការនៃការស្តារទំនាក់ទំនងរវាងទីក្រុងម៉ូស្គូ និងទីក្រុងវ៉ាស៊ីនតោននៅតែស្ថិតក្នុងដំណាក់កាលផ្តួចផ្តើមរបស់ខ្លួន ខណៈដែលទំនាក់ទំនងទ្វេភាគីបានចាប់ផ្តើមបន្ទាប់ពីលោក ដូណាល់ ត្រាំ ចូលកាន់តំណែងជាប្រធានាធិបតីសហរដ្ឋអាមេរិកកាលពីក្នុងខែមករា។

អ្នកនាំពាក្យ លោក ឌីមីទ្រី ប៉េសកូវ (Dmitry Peskov) បានប្រាប់អ្នកសារព័ត៌មាននៅទីក្រុងម៉ូស្គូថា «យើង​កំពុង​ស្ថិត​ក្នុង​ដំណាក់​កាល​ដំបូង​នៃ​ផ្លូវ​ដើម្បី​ស្តារ​ទំនាក់​ទំនង​ទ្វេភាគី​របស់​យើង​ឡើង​វិញ។ ផ្លូវឆ្ពោះទៅមុខគឺនៅវែងឆ្ងាយ និងពិបាកណាស់» ដោយលោកបាននិយាយបន្ថែមថាប្រធានាធិបតីនៃប្រទេសទាំងពីរបានសម្តែង «ឆន្ទៈនយោបាយ» នៅក្នុងរឿងនេះ។

ទោះជាយ៉ាងណាក៏ដោយ លោក ប៉េសកូវ បានបដិសេធចំពោះការរាយការណ៍របស់ប្រព័ន្ធផ្សព្វផ្សាយដែលបាននិយាយថា មន្ត្រីកំពូលរបស់រុស្ស៊ី និងសហរដ្ឋអាមេរិកនឹងជួបប្រជុំគ្នានៅប្រទេសអារ៉ាប៊ីសាអូឌីតនៅក្នុងសប្តាហ៍នេះ ដោយបានពណ៌នាថា នេះជាព័ត៌មានមិនពិត។

កាលពីថ្ងៃអាទិត្យ ទូរទស្សន៍ CNN បានរាយការណ៍ថា មន្ត្រីកំពូលមកពីរដ្ឋបាលរបស់លោក ដូណាល់ ត្រាំ នឹងជួបប្រជុំដោយឡែកពីគ្នាមួយជាមួយមន្ត្រីរុស្ស៊ី និងអ៊ុយក្រែន នៅក្នុងប្រទេសអារ៉ាប៊ីសាអូឌីត ក្នុងគោលបំណងដើម្បីឈានដល់កិច្ចព្រមព្រៀងរវាងប្រទេសទាំងពីរដែលកំពុងមានសង្រ្គាម។

អ្នកនាំពាក្យរូបនេះបាននិយាយថា មនុស្សគ្រប់រូប រួមទាំងសហរដ្ឋអាមេរិកផងដែរបានរំពឹងថា អ៊ុយក្រែននឹងបង្ហាញពីបំណងប្រាថ្នាចង់បង្កើតសន្តិភាព ហើយអ្វីដែលសំខាន់នៅទីនេះ គឺជាអ្វីដែលសហរដ្ឋអាមេរិករំពឹងទុក។

កាលពីខែមុន មន្ត្រីរុស្ស៊ី និងសហរដ្ឋអាមេរិកបានជួបប្រជុំគ្នានៅទីក្រុងរីយ៉ាដ ដែលជាកិច្ចចរចាកម្រិតខ្ពស់លើកដំបូងរបស់ពួកគេចាប់តាំងពីសង្គ្រាមអ៊ុយក្រែនចាប់ផ្តើមកាលពីក្នុងឆ្នាំ២០២២ ដើម្បីដាក់ជាមូលដ្ឋានគ្រឹះសម្រាប់កិច្ចចរចាសន្តិភាព និងធ្វើឱ្យទំនាក់ទំនងទ្វេភាគីប្រសើរឡើង។

បន្ទាប់​មក ភាគី​ទាំង​ពីរ​បាន​ជួប​ប្រជុំ​គ្នា​នៅ​ទីក្រុង​អ៊ីស្តង់ប៊ុល ដើម្បី​ធ្វើ​ឱ្យ​មាន​ដំណើរការ​ធម្មតា​នៃ​ស្ថានទូត​របស់​ពួកគេវិញ។

ប្រទេសអារ៉ាប៊ីសាអូឌីតក៏កំពុងធ្វើជាម្ចាស់ផ្ទះនៃកិច្ចពិភាក្សារវាងសហរដ្ឋអាមេរិក និងអ៊ុយក្រែនផងដែរនៅក្នុងសប្តាហ៍នេះ៕

ដោយ៖ យា ចិន្ដាខន្ដី (ប្រភព៖ AA-AKP)