AKP កំពង់ចាម ថ្ងៃទី០៧ ខែមីនា ឆ្នាំ២០២៥-- 

នៅសាលសន្និសីទសាលាខេត្តកំពង់ចាម នាព្រឹកថ្ងៃទី០៧ ខែមីនា ឆ្នាំ២០២៥ ឯកឧត្តម ខ្លូត ផន ប្រធានក្រុមប្រឹក្សាខេត្ត និងឯកឧត្តម អ៊ុនចាន់ដា អភិបាលនៃគណ:អភិបាលខេត្តកំពង់ចាម និងលោកជំទាវ បានអញ្ជើញជាអធិបតីក្នុងពិធីជួបសំណេះសំណាលជាមួយបងប្អូនជាស្ដ្រីនៃសាលាខេត្ត និងបងប្អូនស្រីមកពីតាមមន្ទីរអង្គភាពជុំវិញខេត្តក្រុងស្រុក ដើម្បីអបអរសាទរខួបលើកទី១១៤ ទិវាអន្តរជាតិនារី ៨មីនា ក្រោមប្រធានបទ "សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប"។

ឯកឧត្តមអភិបាលខេត្តបានមានប្រសាសន៍ថា ថ្ងៃនេះយើងធ្វើពិធីជួបជុំជាមួយបងប្អូនជាស្ត្រី ដើម្បីចូលរួមអបអរសាទរ ទិវាអន្តរជាតិនារី ៨មីនា ដែលមិនត្រឹមតែរំឭកអំពីការតស៊ូ និងជ័យជម្នះនោះទេ ថែមទាំងបានក្លាយទៅជា “ទិវាអន្តរជាតិនារី” នៅលើសកលលោក ដែលត្រូវបានកំណត់យកថ្ងៃ៨មីនា ជាថ្ងៃរំឭកនៃការតស៊ូនេះ ហើយដែលប្រទេសកម្ពុជាយើងទម្លាប់ហៅថា “ទិវាសិទ្ធិនារី”។ ការប្រារព្ធទិវាអន្តរជាតិនារី ៨មីនា យើងទាំងអស់គ្នាពិតជាបានចូលរួមលើកកម្ពស់របស់ស្ត្រី និងក្មេងស្រីក្នុងវិស័យឌីជីថល ការប្រើប្រាស់បច្ចេកវិទ្យា ការអប់រំ ផ្នែកវិទ្យាសាស្ត្រ បច្ចេកវិទ្យា វិស្វកម្ម សិល្បៈ ច្នៃប្រឌិត និងគណិតវិទ្យា ហើយក៏ជាឱកាសផ្តល់ឱ្យបុគ្គលគ្រប់រូប ទាំងក្មេងស្រី និងក្មេងប្រុស អាចចាប់យកជំនាញ មុខរបរ និងការងារនៅក្នុងសង្គមស្របតាមសេចក្តីស្រឡាញ់ សក្តានុពល និងចំណង់ចំណូលចិត្តដោយមិនប្រកាន់ភេទ ឬ យេនឌ័រឡើយ។

ឯកឧត្តមអភិបាលខេត្តបានបញ្ជាក់ថា ឈរលើកត្តាសុខសន្តិភាព និងស្ថេរភាពសង្គមរបស់កម្ពុជា ប្រកបដោយភាពរឹងមាំជាប្រព័ន្ធ យើងត្រូវតែជឿជាក់លើការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយបានបន្តកំណត់ការលើកកម្ពស់សមភាពយេនឌ័រ និងការបង្កើតភាពអង់អាចរបស់ស្ត្រី និងក្មេងស្រី នៅគ្រប់វិស័យជាអាទិភាពនៅក្នុងរបៀបវារៈគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ ប្រកបដោយ សីលធម៌ សមធម៌ និងបរិយាបន្នដែលនៅក្នុងនោះ ស្ត្រី គឺជាស្នូល។ រាជរដ្ឋាភិបាលកម្ពុជាក៏បាន និងកំពុងបន្តលើកកម្ពស់សមភាពយេនឌ័រ តាមរយៈការបង្កើនការវិនិយោគលើសមភាពយេនឌ័រ និងបង្កើតភាពអង់អាចដល់ស្ត្រី និងក្មេងស្រីនៅក្នុងវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បីទាយយកអត្ថប្រយោជន៍ពីភាគលាភយេនឌ័របង្កលក្ខណៈ អំណោយផលដល់ស្ត្រី ក្នុងការប្រើប្រាស់ សិទ្ធិលើការសម្រេចចិត្តអំពីផែនការគ្រួសារ ការកាត់ បន្ថយភាពងាយរងគ្រោះដោយអំពើហិង្សាទាក់ទងនឹងយេនឌ័រលើស្ត្រី និងក្មេងស្រី និងការលើក កម្ពស់ទំនាក់ទំនងអន្តរជំនាន់។

ទន្ទឹមនឹងនេះ ឯកឧត្តមអភិបាលខេត្តបានបន្ថែមទៀតថា ក្នុងផែនការយុទ្ធសាស្ត្រ នារីរតនៈទី៦ ដើម្បីបញ្ជ្រាបយេនឌ័រ ដែលបានកំណត់ក្នុងក្របខ័ណ្ឌច្បាប់ក្នុងការពង្រឹងសមត្ថភាព និងរចនាសម្ព័ន្ធស្ថាប័ន ក៏ដូចជាវិធានការជាក់លាក់ ក្នុងការលើកកម្ពស់សមភាពយេនឌ័រ ក្នុងវិស័យទាំង ៦ធំៗ រួមមាន÷ ១-ការបង្កើនភាពអង់អាចផ្នែកសេដ្ឋកិច្ចរបស់ស្ត្រី, ២-ការលើកកម្ពស់សីលធ៌មសង្គមតម្លៃស្ត្រីនិងគ្រួសារខ្មែរ, ៣-ការលើកកម្ពស់សុខភាពរបស់ស្ត្រីនិងក្មេងស្រី, ៤-កិច្ចការពារ ផ្លូវច្បាប់សម្រាប់ស្ត្រីនិងក្មេងស្រី, ៥- ស្ត្រីក្នុងភាពជាអ្នកដឹកនាំនិងអភិបាលកិច្ច និង ៦-ស្ត្រីនិងការប្រែប្រួសអាកាសធាតុ។

ជាមួយគ្នានេះដែរ ឯកឧត្តមបានអំពាវនាវដល់ស្ត្រីត្រូវតែសម្រួចឆន្ទៈឱ្យមោះមុត សិក្សារៀនសូត្រ និងហាត់ពត់លត់ដំហ្វឹកហ្វឺនជំនាញរៀងៗខ្លួន ព្រោះនារីរបស់យើបានចូលរួមយ៉ាងសកម្មក្នុងការងារសង្គមសម្រាប់អាជីពការងារជាមន្ត្រីរាជការមានឪកាសបំរើប្រជាពលរដ្ឋ បំរើជាតិមាតុភូមិ  ស្របតាមចក្ខុវិស័យរបស់រាជរដ្ឋាភិបាលដែលបានកំណត់ថា ប្រជាពលរដ្ឋខ្មែរគ្រប់រូប មានសិទ្ធិស្មើគ្នាស្របតាមច្បាប់ ជាពិសេសស្ត្រី និងក្មេងស្រី ត្រូវតែ ទទួលបាននូវសុវត្ថិភាពផ្ទាល់ខ្លួន ព្រមទាំងអាចចូលរួមយ៉ាងពេញលេញនៅក្នុងកិច្ចការសង្គម មានភាពអង់អាចនិងការធ្វើសេចក្តីសម្រេចនៅគ្រប់កម្រិត និងគ្រប់វិស័យ ដោយស្មើភាពគ្នា ជាមួយបុរស និងក្មេងប្រុស ដើម្បីធានាបាននូវភាពម្ចាស់ការលើខ្លួនឯង និងមានសុខុមាលភាព ក្នុងគ្រួសារ សហគមន៍ និងសង្គមជាតិ។

ក្នុងឱកាសនោះ  ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលខេត្ត និងលោកជំទាវ ក៏បានឧបត្ថមជូនបងប្អូនស្ត្រីនូវសារុង១ និងថវិកា៥ម៉ឺនរៀល៕

ដោយ ឆាយ ម៉ុត