AKP កំពង់ធំ ថ្ងៃទី០៧ ខែមីនា ឆ្នាំ២០២៥ -- លោក ព្រឹម រដ្ឋា អភិបាលរងខេត្តកំពង់ធំ លោក ឡុង រតនៈកុមា នាយករងនាយកដ្ឋានព្រៃឈើនៃសហគមន៍ព្រៃឈើ លោកស្រី អ៊ឹម ម៉ារ៉ាឌី ប្រធានការិយាល័យសហគមន៍ព្រៃឈើនៃខណ្ឌរដ្ឋបាលព្រៃឈើ លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ លោក ហេង ដា ប្រធានប្រតិបត្តិការទីវាលរបស់អង្គការ រីខូហ្វ លោក ញឹម ស៊ីញន នាយកកម្មវិធីរបស់អង្គការសកម្មភាពដើម្បីអភិវឌ្ឍន៍(AFD) និងមន្ត្រីរាជការ ស្រុក ឃុំ ព្រមទាំងសហគមន៍ព្រៃឈើទាំង៣៤ ព្រមទាំងអង្គការដៃគូ បានអញ្ជើញចូលរួមក្នុងពិធីចុះហត្ថលេខារវាងខណ្ឌរដ្ឋបាលព្រៃឈើកំពង់ធំ និងគណៈកម្មការគ្រប់គ្រងសហគមន៍ព្រៃឈើដើម្បីបន្តកិច្ចព្រមព្រៀងព្រៃសហគមន៍ អាណត្តិទី២ កាលពីរសៀលថ្ងៃទី០៦ ខែមីនា ឆ្នាំ២០២៥ នៅសាលប្រជុំសាលាខេត្តកំពង់ធំ។

លោក ព្រឹម រដ្ឋា បានលើកឡើងថា ព្រៃឈើជាធនធានធម្មជាតិមួយបែបដ៏មានតម្លៃមហាសាល សម្រាប់មនុស្ស សត្វនិងបរិស្ថានជាសកល។ រាជរដ្ឋាភិបាលកម្ពុជា បានចាត់ទុកព្រៃឈើជាវិស័យអាទិភាពក្នុងការរួមចំណែក នៃកិច្ចអភិវឌ្ឍសេដ្ឋកិច្ចជាតិ និងបានខិតខំប្រឹងប្រែងដោយឥតឈប់ឈរ ក្នុងការបង្កើតច្បាប់ អនុក្រឹត្យ គោលការណ៍ណែនាំ និងលិខិតបទដ្ឋាននានា ទាក់ទងនឹងវិស័យ ព្រៃឈើ និងការធ្វើកំណែទម្រង់វិស័យព្រៃឈើដើម្បីពឈានឆ្ពោះទៅរកការគ្រប់គ្រងធនធានព្រៃឈើឱ្យមាននិរន្តរភាព។ ការបង្កើតសហគមន៍ព្រៃឈើគឺជាយុទ្ធសាស្ត្រនៃការគ្រប់គ្រងព្រៃឈើដោយនិរន្តរភាពដូចមានចែងនៅក្នុងកម្មវិធី ព្រៃឈើជាតិនិងស្ថិតក្នុងបរិបទនៃកំណែទម្រង់វិស័យព្រៃឈើរបស់រាជរដ្ឋាភិបាលកម្ពុជាសំដៅជំរុញសម្រេចគោលដៅ ក្នុងកិច្ចការពារបរិស្ថានជីវៈចម្រុះ ការកាត់បន្ថយភាពក្រីក្រ និងការពង្រឹងអភិបាលកិច្ចល្អដល់ស្ថាប័ន ដូចមានចែងក្នុង កម្មវិធីនយោបាយរបស់រាជរដ្ឋាភិបាលកម្ពុជា ស្តីពីវិស័យព្រៃឈើនិងផែនការអភិវឌ្ឍន៍សេដ្ឋកិច្ចសង្គម។ រាជរដ្ឋាភិបាលកម្ពុជាបានយកចិត្តទុកដាក់ចំពោះការអភិរក្ស និងគ្រប់គ្រងធនធានធម្មជាតិដោយធានាភាពស្ថិតស្ថេរនៃអេកូឡូស៊ី និងសេដ្ឋកិច្ចសង្គមដែលជាសសរគ្រឹះមួយ ដ៏សំខាន់សម្រាប់សុខមាលភាពសាធារណៈ និងជាវិភាគទានដោយផ្ទាល់ចំពោះកិច្ចការពារបរិស្ថានសកល។

លោក ញឹម ស៊ីញន នាយកកម្មវីធីរបស់អង្គការសកម្មភាពដើម្បីអភិវឌ្ឍន៍ (AFD) បានបញ្ជាក់ថា បច្ចុប្បន្នអង្គការសកម្មភាពដើម្បីអភិវឌ្ឍន៍បាន និងកំពុងអនុវត្តគម្រោង “ការប្រើប្រាស់ដីនិងការការពារធនធានធម្មជាតិជនជាតិដើមភាគតិច” ដោយមានការគាំទ្រថវិកាពី Swiss Agency for Development and Cooperation (SDC)និង Irish Aid(IA) តាមរយៈអង្គការDanChurchAid Cambodia(DCA)និងគម្រោង“លើកកម្ពស់ភាពជាម្ចាស់សហគមន៍ក្នុងគ្រប់គ្រងធនធានធម្មជាតិនិងជីវភាពឱ្យកាន់តែប្រសើរឡើង” ក្រោមជំនួយថវិកាពីអង្គការNPA ដោយសហការជាមួយអង្គការ រីខូហ្វនិងខណ្ឌរដ្ឋបាលព្រៃឈើកំពង់ធំរៀបចំសហគមន៍ព្រៃឈើបានចំនួន ៨៥សហគមន៍ ដែលមានទំហំផ្ទៃដីព្រៃសរុប៧៦៦៧៧,៨៦ហិកតាមានប្រជាពលរដ្ឋជាសមាជិកចូលរួមចំនួន១២ ៦២៥គ្រួសារ ស្មើនឹង៣៤៦២៨នាក់ (ស្ត្រី១៧.៦២៥នាក់)នៅក្នុង ១០៤ភូមិ២៣ឃុំ០៦ស្រុក។ គិតត្រឹមខែកុម្ភៈ ឆ្នាំ២០២៥នេះ សហគមន៍ព្រៃឈើនៅក្នុងខេត្តមានប្រកាសទទួលស្គាល់ដោយក្រសួងកសិកម្ម រុក្ខាប្រមាញ់និងនេសាទចំនួន៧១សហគមន៍ដែលគ្របបណ្តប់ផ្ទៃដីព្រៃសរុបទំហំ៦២២៩៣,៨៤ហិកតាក្នុងនោះមាន៦៩សហគមន៍ផ្ទៃដីព្រៃសរុបចំនួន៥៦៧៧១,៣៣ហិកតាបានចុះកិច្ចព្រមព្រៀងព្រៃសហគមន៍និងបានទទួលការយល់ព្រមលើផែនការគ្រប់គ្រងព្រៃសហគមន៍ពីខណ្ឌរដ្ឋបាលព្រៃឈើសរុបចំនួន៣៨សហគមន៍ មានផ្ទៃដីទំហំ២១៩៦៧,៦៥ហិកតា រួចហើយ។ ដោយឡែកសហគមន៍បានផុតសុពលភាពនៃកិច្ចព្រមព្រៀងព្រៃសហគមន៍អាណត្តិទី១ រយៈពេល១៥ឆ្នាំដែលតម្រូវឱ្យបន្តចុះកិច្ចព្រមព្រៀងរយៈពេល១៥ឆ្នាំបន្តទៀត ដោយយោងតាមច្បាប់ស្តីពីព្រៃឈើឆ្នាំ២០០២ អនក្រស្តីពីការគ្រប់គ្រងសហគមន៍ព្រៃឈើឆ្នាំ២០០៣និងប្រកាសគោលការណ៍ណែនាំអំពីសហគមន៍ព្រៃឈើ ឆ្នាំ២០០៦៕

ដោយ ស៊ុម វណ្ណា