AKP ភ្នំពេញ ថ្ងៃទី០៧ ខែមីនា ឆ្នាំ២០២៥-- លោក ម៉ៅ ហាក់ អនុប្រធានអាជ្ញាធរទន្លេសាប និងក្រុមការងារមុខព្រួញខេត្តពោធ៍សាត់ កាលពីថ្ងៃទី០៦ ខែមីនា ឆ្នាំ២០២៥ បានចូលរួមកិច្ចប្រជុំលើកដំបូងរបស់ក្រុមការងារអន្តរក្រសួង ចុះពិនិត្យ ផ្ទៀងផ្ទាត់ ធ្វើបច្ចុប្បន្នភាព និងចងក្រងទិន្នន័យដីធ្លីតាមឃុំ ស្រុក ក្នុងភូមិសាស្រ្តខេត្តពោធិ៍សាត់ នៃតំបន់បឹងទន្លេសាប ។ 

កិច្ចប្រជុំនោះបានពិនិត្យ និងពិភាក្សាលើរបៀបវារៈ ចំនួន៣ ដើម្បីត្រៀមចុះអនុវត្តការងារ៖ ទី១.  រៀបចំកម្រងបញ្ជីសំណួរអង្កេត សម្រាប់ចុះប្រមូលទិន្នន័យ ព័ត៌មាន តាមបណ្តាភូមិ ដែលរួមបញ្ចូលកត្តាភូមិសាស្ត្រ និងវិទ្យាសាស្ត្រ ទី២. រៀបចំក្រុមការងារអន្តរក្រសួង និងក្រុមការងារថ្នាក់ខេត្តសម្រាប់ចុះអនុវត្តន៍ការងារ និងទី៣. រៀបចំផែនការ និងពេលវេលាក្នុងការអនុវត្តការងារ ព្រមទាំងធនធានសម្រាប់គាំទ្រ ។

ក្នុងឱកាសនោះក៏មានការចូលរួមពីឯកឧត្តម សុខ គាង រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ដោយកិច្ចប្រជុំមានគោលបំណងប្រមូលព័ត៌មាន ទិន្នន័យ និងគ្រប់គ្រង លើការប្រើប្រាស់ដីធ្លីនៅតំបន់ បឹងទន្លេសាបប្រកបដោយសុភវិនិច្ឆ័យ៕

ដោយ ណយ នឿន (ប្រភព៖ អាជ្ញាធរទន្លេសាប)