AKP ព្រះសីហនុ ថ្ងៃទី០៧ ខែមីនា ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានបញ្ជាក់ថា សាលាមត្តេយ្យធនធានក្រុងព្រះសីហនុ ខេត្តព្រះសីហនុ បានទទួលពានរង្វាន់ចំណាត់ថ្នាក់លេខ១ ក្នុងការប្រឡងប្រណាំងអង្គភាពផ្តល់សេវាគំរូឆ្នាំ២០២៤ សម្រាប់សាលាមត្តេយ្យធនធានក្រុងនៅទូទាំងប្រទេស សម្រាប់ឆ្នាំ២០២៤ របស់ក្រសួងមុខងារសាធារណៈ។ នេះជាការបញ្ជាក់កាលពីរសៀលថ្ងៃព្រហស្បតិ៍ ទី០៦ ខែមីនា ឆ្នាំ២០២៥ ក្នុងឱកាសដែលឯកឧត្តមអភិបាលខេត្តអញ្ជើញចូលរួមសំណេះសំ ណាលជាមួយនារីសាលាខេត្តព្រះសីហនុ ក្នុងឱកាសទិវាអន្តរជាតិនារី ៨មីនា ឆ្នាំ២០២៥។

ឯកឧត្តមអភិបាលខេត្តបានបញ្ជាក់ថា ការទទួលបានចំណាត់ថ្នាក់លេខ១របស់សាលាមត្តេយ្យធនធានក្រុងព្រះសីហនុ ខេត្តព្រះសីហនុ លើអង្គភាពផ្តល់សេវាគំរូរបស់ក្រសួងមុខងារសាធារណៈ ជាកិត្តិយសក្នុងក្របខ័ណ្ឌខេត្តព្រះសីហនុ។ យើងទទួលបាន TOP Time មាន៣ស្ថាប័នក្នុងនោះ ទី១. ចំណាត់ថ្នាក់លេខ៧ សម្រាប់មន្ទីរពេទ្យបង្អែកខេត្ត ២. វិទ្យាល័យ ហ៊ុន សែន វាលរេញទទួលបានចំណាត់ថ្នាក់លេខ៥ និង៣. សាលាមត្តេយធនធានក្រុងព្រះសីហនុទទួលបានពានចំណាត់ថ្នាក់លេខ១ទូទាំងប្រទេស។ នេះជាកិត្តិយសនៃវិស័យអប់រំរបស់ខេត្តព្រះសីហនុ និងវិស័យសុខាភិបាល ហើយសមិទ្ធផលដែលយើងទទួលបាននាពេលនេះ គឺជាការចូលរួមចំណែករបស់យើងទាំងអស់គ្នា ទោះបីយើងមិនបានចូលរួមដោយផ្ទាល់ ក៏ប៉ុន្តែយើងបានចូលរួមធ្វើការងារតាមជំនាញរៀងៗខ្លួន តាមរយៈសន្តិសុខ សុវត្ថិភាពសាធារណៈ ការផ្តល់សេវាជូនដល់ប្រជាពលរដ្ឋ ព្រមទាំងការចូលរួមពីអាណាព្យាបាល លោកគ្រូ អ្នកគ្រូ និងអាជ្ញាធរ រួមទាំងសប្បុរសជន ដែលបានចូលរួមមាន។

ឯកឧត្តមអភិបាលខេត្ត្តព្រះសីហនុ បានបន្តទៀតថា ការទទួលបានសមិទ្ធផលចំណាត់ថ្នាក់លេខ១ លេខ៥ និងលេខ៧ ពិសេសចំពោះចំណាត់ថ្នាក់លេខ១របស់សាលាមត្តេយ្យធនធាន ក្រុងព្រះសីហនុ គឺមិនអាចកាត់ផ្តាច់ពីការជួយជ្រោមជ្រែងពីឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះជួយខេត្តព្រះសីហនុ ដោយមានការសម្របសម្រួលពីរដ្ឋបាលខេត្ត ក្នុងការអភិវឌ្ឍទីតាំងអប់រំសម្រាប់ទទួលកុមារអាយុចាប់ពី៣ឆ្នាំឡើងទៅចូលសិក្សារៀនសូត្រ។ ទោះបីសាលារៀបចំបានល្អយ៉ាងណាក៏ដោយ ប្រសិនបើមិនមានការចូលរួមពីលោកគ្រូ អ្នកគ្រូ គណ:គ្រប់គ្រងសាលា គ្មានឆន្ទ:ក្នុងការគ្រប់គ្រង ក៏យើងមិនអាចទទួលបានពានជ័យលាភីសាលាមត្តេយ្យធនធានជាប់ចំណាត់ថ្នាក់លេខ១បានឡើយ ព្រោះការទទួលបានចំណាត់ថ្នាក់ពានលេខ១នេះ ត្រូវបានត្រួតពិនិត្យ វាយតម្លៃដោយគណ:កម្មការអន្តរក្រសួងយ៉ាងសុក្រឹត្យ ដែលធ្វើឱ្យគណៈកម្មការវាយតម្លៃសម្រេចវាយតម្លៃចំណាត់ថ្នាក់សម្រាប់ការប្រឡងប្រណាំងអង្គភាពបម្រើសេវាគំរូប្រចាំឆ្នាំ២០២៤ ដូច្នេះយើងត្រូវត្រៀមខ្លួនសម្រាប់ការចូលរួមប្រឡងប្រណាំងនៅឆ្នាំ២០២៦ខាងមុខ។

ដូច្នេះអាជ្ញាធរក្រុង ស្រុក និងមន្ទីរ អង្គភាពពាក់ព័ន្ធត្រូវបន្តការយកចិត្តទុកដាក់ក្នុងការចូលរួមបម្រើសេវាសាធារណៈឱ្យបានកាន់តែល្អបន្ថែមទៀត ដែលទាមទារឱ្យយើងធ្វើការដឹកនាំកែទម្រង់នៅលើវិស័យអាទិភាពមួយចំនួន ជាពិសេសវិស័យសុខាភិបាល ដើម្បីឱ្យប្រជាពលរដ្ឋរបស់យើងមានសុខភាពល្អ។ កាលណាប្រជាពលរដ្ឋមានសុខភាពល្អ ពួកគាត់នឹងទទួលបាននូវចំណេះដឹង ជំនាញពិតប្រាកដ ដែលជាធនធានក្នុងការចូលរួមចំណែកការអភិវឌ្ឍប្រទេសជាតិ ក៏ដូចជាការអភិវឌ្ឍធនធានមនុស្សប្រកបដោយកាយសម្បទា និងសក្តានុពល បើប្រទេសជាតិមួយខ្លាំង ប្រជាជននៃប្រទេសនោះខ្លាំងផងដែរ តាមរយចំណេះដឹង ជំនាញវិជ្ជាជីវ: ក្រមសីលធម៌ និងសុខភាពល្អ ទើបការអភិវឌ្ឍប្រទេសជាតិមានការរីកចម្រើន ហើយការបម្រើសេវាសាធារណៈ គឺជាវិធានការប្រកបដោយប្រសិទ្ធភាព គុណភាព គុណធម៌ ក្នុងក្របខ័ណ្ឌខេត្តព្រះសីហនុ។

ទន្ទឹមនឹងនេះ ឯកឧត្តមអភិបាលខេត្តព្រះសីហនុបានធ្វើការណែនាំឱ្យមានការរៀបចំពិធីដង្ហែរពានជ័យលាភីចំណាត់ថ្នាក់លេខ១ លេខ៥ និងលេខ៧ នៅពេលខាងមុខផងដែរ៕

ដោយ ងូ សុមុនី