AKP ភ្នំពេញ ថ្ងៃទី០៦ ខែមីនា ឆ្នាំ២០២៥ -- ជំនួបរវាងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) មេដឹកនាំសហរដ្ឋអាមេរិក លោក ដូណាល់ ត្រាំ (Donald Trump) និងប្រធានាធិបតីអ៊ុយក្រែន លោក វ្ល៉ាឌីមៀ ហ្សេលេនស្គី (Vladimir Zelensky) នៅទីក្រុងមីនស្ក៍ (Minsk) មិនទាន់ត្រូវបានពិភាក្សានៅឡើយទេ ប៉ុន្តែរដ្ឋធានីនៃប្រទេសបេឡារុស្សមួយនេះនឹងក្លាយជាកន្លែងដ៏ល្អបំផុតសម្រាប់ទីក្រុងម៉ូស្គូ។ នេះបើយោងតាមអ្នកនាំពាក្យប្រធានាធិបតីរុស្ស៊ី លោក ឌីមីទ្រី ប៉េសកូវ (Dmitry Peskov)។

លោកបាននិយាយនៅពេលដែលត្រូវបានចោទសួរថា តើកិច្ចចរចានៅទីក្រុងមីនស្ក៍អាចទៅរួចដែរឬទេ ថា «វាមិនត្រូវបានគេលើកឡើង និងមិនត្រូវបានពិភាក្សាក្នុងវិធីណាមួយនោះទេ។ ប៉ុន្តែជាការពិតណាស់ ទីក្រុងមីនស្ក៍ គឺជាកន្លែងដ៏ល្អបំផុតសម្រាប់ពួកយើង។ នេះជាសម្ព័ន្ធមិត្តដ៏សំខាន់របស់យើង ហើយនេះជាមូលហេតុដែលវាជាទីតាំងដ៏ល្អបំផុតសម្រាប់ពួកយើងសម្រាប់កិច្ចចរចា»។

ប្រធានាធិបតី​បេឡារុស្ស លោក អាឡិចសាន់ដឺរ លូកាស្សិនកូ (Alexander Lukashenko) នៅពេលមុន​នេះ​បាន​និយាយ​ថា ទីក្រុងមីនស្ក៍បាន​ត្រៀម​ខ្លួនរួច​ជា​ស្រេច​ក្នុង​ការ​រៀបចំ​កិច្ច​ចរចានេះ៕

ដោយ៖ យា ចិន្ដាខន្ដី (ប្រភព៖ តាសស៍)