AKP ភ្នំពេញ ថ្ងៃទី០៦ ខែមីនា ឆ្នាំ២០២៥ -- គេហទំព័រសារព័ត៌មាន onet.pl បានរាយការណ៍ថា ការផ្គត់ផ្គង់យោធាដែលទៅដល់ពីសហរដ្ឋអាមេរិកនៅមជ្ឈមណ្ឌលដឹកជញ្ជូនក្នុងទីក្រុង Rzeszow របស់ប្រទេសប៉ូឡូញ មិនត្រូវបានដឹកជញ្ជូនទៅអ៊ុយក្រែនទៀតទេ ប៉ុន្តែត្រូវបានបញ្ជូនបន្តទៅកាន់មូលដ្ឋាននៅក្បែរនោះនៃកងពលតូចទ័ពអាកាសទី៨២ របស់សហរដ្ឋអាមេរិក។

បុគ្គលិកប៉ូឡូញម្នាក់នៅមជ្ឈមណ្ឌលដឹកជញ្ជូននោះបានប្រាប់សារព័ត៌មានថា «រហូតមកដល់ពេលថ្មីៗនេះ យើងបានទទួលការផ្គត់ផ្គង់ពីសហរដ្ឋអាមេរិកតាមយន្តហោះ ហើយបានផ្ទុកវាឡើងវិញនៅលើឡានដឹកទំនិញ ឬរថយន្តផ្លូវដែក ហើយបញ្ជូនវាទៅកាន់ព្រំដែនអ៊ុយក្រែន។ ឥឡូវនេះ ដោយផ្អែកលើសំណើរបស់អាម៉េរិក យានជំនិះទាំងអស់ដែលដឹកមកពីសហរដ្ឋអាមេរិកត្រូវបានដកចេញ ហើយបញ្ជូនទៅមូលដ្ឋានទ័ពអាមេរិកដែលនៅក្បែរនោះ»។ លោក​បាននិយាយ​បន្ថែម​ថា «ការ​ផ្គត់ផ្គង់នេះ​ត្រូវ​បាន​គេ​រំពឹង​ថា​នឹងត្រូវ​រង់ចាំសេចក្តី​សម្រេច​ចិត្ត​បន្ថែម​ទៀត» នៅ​មូលដ្ឋាន​អាម៉េរិក។

សមាជិកនៃកងពលតូចទ័ពអាកាសទី៨២ របស់សហរដ្ឋអាមេរិក បានទៅដល់ទីក្រុង Rzeszow នៅក្នុងឆមាសទីមួយនៃឆ្នាំ២០២២។ យោងតាមទិន្នន័យក្រៅផ្លូវការ បានឱ្យដឹងថា ចំនួនកងទ័ពនោះមានប្រហែល ១០.០០០នាក់។

គេហទំព័រសារព័ត៌មាននោះបានកត់សម្គាល់ថា ការផ្គត់ផ្គង់យោធាមកដល់ទីក្រុង Rzeszow ពីប្រទេសផ្សេងៗទៀតនឹងត្រូវបញ្ជូនបន្តទៅអ៊ុយក្រែន៕

ដោយ៖ យា ចិន្ដាខន្ដី (ប្រភព៖ តាសស៍)