AKP ភ្នំពេញ ថ្ងៃទី០៦ ខែមីនា ឆ្នាំ២០២៥ -- លោក ឌីមីទ្រី ម៉េដវ៉េដេវ (Dmitry Medvedev) អនុប្រធានក្រុមប្រឹក្សាសន្តិសុខរុស្ស៊ីបាននិយាយថា ទីក្រុងវ៉ាស៊ីនតោននឹងបន្តការបញ្ជូនសព្វាវុធទៅកាន់ទីក្រុងគៀវ ប្រសិនបើកិច្ចព្រមព្រៀងរ៉ែកម្រត្រូវបានចុះហត្ថលេខាជាមួយអ៊ុយក្រែន។

លោកបានសរសេរនៅលើទំព័រ Vkontakte ថា «និយាយទៅកាន់សភាអាម៉េរិក [ប្រធានាធិបតីអាម៉េរិក លោក ដូណាល់ (Donald)] លោក ត្រាំ បានកត់សម្គាល់ដោយការពេញចិត្តថា លោកបានទទួលលិខិតប្រែចិត្តរួចហើយពីប្រមុខនៃរបបទីក្រុងគៀវ ស្តីពីការត្រៀមខ្លួនរបស់លោកសម្រាប់កិច្ចចរចាសន្តិភាពក្រោមការដឹកនាំរបស់សហរដ្ឋអាមេរិក និងការចុះហត្ថលេខាលើកិច្ចព្រមព្រៀងរ៉ែកម្រ។ នេះមានន័យថា នៅពេលដែលវាត្រូវបានចុះហត្ថលេខា ការផ្គត់ផ្គង់សព្វាវុធរបស់សហរដ្ឋអាមេរិកទំនងជានឹងបន្តឡើងវិញ»។

នៅពេលមុននេះ អ្នកនាំពាក្យមន្ទីរបញ្ចកោណបានប្រាប់សារព័ត៌មានតាសស៍ (TASS) ថា កងកម្លាំងប្រដាប់អាវុធអាម៉េរិកបានផ្អាកការផ្តល់ជំនួយយោធាដល់អ៊ុយក្រែន។ យោងតាមទីភ្នាក់ងារព័ត៌មាន Bloomberg បានឱ្យដឹងថា ការផ្អាកនេះបានប៉ះពាល់ដល់ឧបករណ៍យោធាអាម៉េរិកទាំងអស់ដែលបច្ចុប្បន្នមិនមាននៅក្នុងអ៊ុយក្រែន រួមទាំងអាវុធដែលនឹងដឹកជញ្ជូនតាមផ្លូវអាកាស និងនាវា ព្រមទាំងការរង់ចាំការដឹកជញ្ជូនបន្ថែមទៀតនៅក្នុងតំបន់ឆ្លងកាត់របស់ប្រទេសប៉ូឡូញ។

លោក ត្រាំ បានប្រាប់សភាអាម៉េរិកថា លោកបានទទួលលិខិតពីលោក វ៉្លាឌីមៀ ហ្សេលេនស្គី (Vladimir Zelensky) ដោយបាននិយាយថា ប្រមុខនៃរបបទីក្រុងគៀវបានត្រៀមខ្លួនរួចជាស្រេចសម្រាប់កិច្ចចរចាដំណោះស្រាយសន្តិភាពស្តីពីជម្លោះអ៊ុយក្រែន។ លោក ហ្សេលេនស្គី ក៏បានសង្កត់ធ្ងន់ផងដែរថា លោកបានត្រៀមខ្លួនរួចជាស្រេចក្នុងការចុះហត្ថលេខាលើកិច្ចព្រមព្រៀងជាមួយសហរដ្ឋអាមេរិក ស្តីពីរ៉ែកម្ររបស់អ៊ុយក្រែន ដែលពីមុនត្រូវបានផ្អាកដោយសារតែការប្រកែកគ្នារវាងលោក ត្រាំ និងលោក ហ្សេលេនស្គី នៅសេតវិមាន៕

ដោយ៖ យា ចិន្ដាខន្ដី (ប្រភព៖ តាសស៍)