AKP ស្ទឹងត្រែង ថ្ងៃទី0៦ ខែមីនា ឆ្នាំ២០២៥--អាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយសាលាមធ្យមសិក្សាសុខាភិបាលភូមិភាគស្ទឹងត្រែងបានបន្តរួមគ្នាផ្សព្វផ្សាយដល់និស្សិតចំនួន ២២១នាក់ ស្រី១៤៤នាក់ មកពីបណ្តាខេត្ត សហគមន៍ចម្រុះ នៃសាលាមធ្យមសិក្សាភូមិភាគស្ទឹងត្រែង ដើម្បីទទួលបានចំណេះដឹងពីបញ្ហាគ្រឿងញៀន សារធាតុគីមីផ្សំ និងអត្ថប្រយោជន៍ នៃការប្រើប្រាស់ App NoDrug នាព្រឹកថ្ងៃទី០៦ ខែមីនា ឆ្នាំ២០២៥។

លោកសាស្ត្រាចារ្យជំនួយ វេជ្ជបណ្ឌិត តាត សុវណ្ណ នាយកសាលាមធ្យមសិក្សាសុខាភិបាលភូមិភាគស្ទឹងត្រែងបានឱ្យដឹងថា បញ្ហាគ្រឿងញៀនជាបញ្ហារួម និងបានបំផុសឱ្យនិស្សិតទាំងអស់ចូលរួមឱ្យបានសកម្មក្នុងការងារប្រយុទ្ធប្រឆាំងគ្រឿងញៀនដែលមកដល់ពេលនេះមាននិស្សិតចំនួន៥០០នាក់ បានចូលរួម។ 

ក្នុងឱកាសនោះ ឯកឧត្ដម ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងអំណរគុណចំពោះការចូលរួមរបស់សាលា លោកគ្រូ អ្នកគ្រូ សាស្រា្ដចារ្យ និងនិស្សិតទាំងអស់សំដៅលើកកម្ពស់ប្រសិទ្ធភាពនៃការចូលរួមរបស់ពួកគាត់ ក្រុមគ្រួសារក៏ដូចជាសហគមន៍របស់ពួកគាត់ដើម្បីចៀសផុតបានពីបញ្ហាគ្រឿងញៀន និងទប់ស្កាត់ការផលិតកែច្នៃគ្រឿងញៀន។ ឯកឧត្ដមឧត្តមសេនីយ៍ឯក បានថ្លែងបញ្ជាក់ថា បញ្ហាគ្រឿងញៀននៅតែមិនទាន់ថមថយដូចនេះការចូលរួមជួយពីគ្រប់សមាសភាពនៅមូលដ្ឋានទាំងអស់នៅតែចាំបាច់បំផុត និងបានសំណូមពរដល់និស្សិតចូលរួមប្រើប្រាស់និងផ្សព្វផ្សាយឱ្យក្រុមគ្រួសារប្រើប្រាស់ App NoDrug ដើម្បីចំណេះដឹង ព័ត៌មាន និងរាយការណ៍រាល់ករណីគ្រឿងញៀនដោយគ្មានអត្តសញ្ញាណអ្នករាយការណ៍ ហើយទទួលបានការដោះស្រាយទាន់ពេលវេលា។ 

សូមជម្រាបជូនថា វាគ្មិនក្នុងកម្មវិធីផ្សព្វផ្សាយនេះ គឺលោកឧត្តមសេនីយ៍ទោ អ៊ុយ រ៉ាត់ ប្រធាននាយកដ្ឋានត្រួតពិនិត្យសារធាតុញៀន និងសារធាតុគីមីផ្សំ និងលោកឧត្តមសេនីយ៍ត្រី យិន យឿត អនុប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអាជ្ញាធរជាតិប្រយុទ្ធប្រឆាំងគ្រឿងញៀនបានបញ្ជាក់ឱ្យដឹងថា និស្សិតបានយល់ដឹងពីយន្តការគ្រប់គ្រង និងមុខងារសារធាតុគីមីផ្សំក្នុងសង្វាក់ផលិតកម្មគ្រឿងញៀនខុសច្បាប់ ហើយអ្វីទៅជាគ្រឿងញៀន? ឥទ្ធិពល និងគ្រោះថ្នាក់នៃការប្រើប្រាស់គ្រឿងញៀនគ្រប់ប្រភេទ ហេតុអ្វីគេប្រើគ្រឿងញៀន របៀបបដិសេធគ្រឿងញៀន ច្បាប់ស្តីពីការត្រួតពិនិត្យគ្រឿងញៀន អត្ថប្រយោជន៍នៃការប្រើប្រាស់App NoDrug៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន