AKP ព្រះសីហនុ ថ្ងៃទី០៥ ខែមីនា ឆ្នាំ២០២៥ -- សមាគមនារីកម្ពុជា ដើម្បីសន្តិភាព និងអភិវឌ្ឍខេត្តព្រះសីហនុ បានរៀបចំពីធីសំណេះសំណាលជាមួយប្រធាន អនុប្រធាន សមាជិកាកិត្តិយស និងប្រតិបត្តិនៃគណៈកម្មការសាខាសមាគមនារីកម្ពុជា ដើម្បីអបអរសាទរ ទិវាអន្តរជាតិនារី ៨មីនា ២០២៥ ខួបលើកទី១១៤ ក្រោមប្រធានបទ «សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប» “ For All women and girls: Rights, Equality, Empowerment” ក្រោមអធិបតីឯកឧត្តម វង្ស ផាណាត ប្រធានក្រុមប្រឹក្សាខេត្តនិងលោកជំទាវ  ឯកឧត្តម ម៉ាង ស៊ីណេត អភិបាល នៃគណ:អភិបាលខេត្តព្រះសីហនុ និងលោកជំទាវ នារសៀលថ្ងៃពុធ ទី០៥ ខែមីនា ឆ្នាំ២០២៥។

ឯកឧត្តម ម៉ាង ស៊ីណេត អភិបាលខេត្តព្រះសីហនុ បានសំណេះសំណាលជាមួយថ្នាក់ដឹកនាំសមាជិកានៃសមាគមនារី ដើម្បីសន្តិភាព និងអភិវឌ្ឍន៍ខេត្តព្រះសីហនុ ក្នុងឱកាសទិវាអន្តរជាតិនារី ៨មីនា ២០២៥ ខួបលើកទី១១៤ និងគូសបញ្ជាក់ពីសារៈសំខាន់នៃការទទួលបាន និងអនុវត្តសិទ្ធិ ការលើកកម្ពស់សមត្ថភាព និងការពង្រឹងភាពអង់អាចចំពោះស្រ្តី និងក្មេងស្រីគ្រប់រូបនៅកម្ពុជា ដោយផ្តោតសំខាន់អត្ថប្រយោជន៍ពីភាគលាភយេនឌ័រជូនគ្រួសារ សហគមន៍ និងជំរុញកំណើរការអភិវឌ្ឍសេដ្ឋកិច្ច និងលើកកម្ពស់សុខុមាលភាពសង្គម។

ឯកឧត្តមអភិបាលខេត្តបានកោតសរសើរ និងវាយតម្លៃចំពោះថ្នាក់ដឹកនាំ សមាជិកាគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្តព្រះសីហនុ ខិតខំយកអស់កម្លាំងកាយ ចិត្ត ប្រាជ្ញាស្មារតីក្នុងការបំពេញតួនាទីភារកិច្ច ជំរុញការអនុវត្តបេសកកម្មដ៏ថ្លៃថ្លា ដើម្បីស្រ្តី និងក្មេងស្រីទទួលនូវកិច្ចការពារសិទ្ធិ និងផលប្រយោជន៍ តាមរយៈការទទួលស្គាល់ ការផ្ដល់តម្លៃចាត់ទុកស្ត្រី ក្មេងស្រីជាមូលធនមនុស្សដ៏សំខាន់ក្នុងការអភិវឌ្ឍគ្រួសារ និងសង្គម ផ្ដល់ឱកាសឱ្យពួកគេចូលរួមប្រកបដោយសមភាព និងសមធម៌នៅលើគ្រប់វិស័យ។ រាជរដ្ឋាភិបាលកម្ពុជា បន្តលើកកម្ពស់សមភាពយេនឌ័រ តាមរយៈការបង្កើនភាពអង់អាចលើស្រ្តីក្នុងវិស័យសេដ្ឋកិច្ច វិស័យអប់រំ សុខភាព និងតួនាទីជាអ្នកដឹកនាំ បង្កលក្ខណៈអំណោយផលដល់ស្រ្តីក្នុងការប្រើប្រាស់សិទ្ធិលើការសម្រេចចិត្តពីគ្រួសារ កាត់បន្ថយភាពងាយរងគ្រោះ និងអំពើហិង្សាទាក់ទងនឹងយេនឌ័រ លើស្រ្តី និងក្មេងស្រី។ ផែនការយុទ្ធសាស្ត្រនារីរតនៈទី៦ ឆ្នាំ២០២៤-២០២៨ បានដាក់ចេញនូវអភិក្រមបរិវត្តកម្មយេនឌ័រ ដោយផ្តោតលើការពង្រឹងយន្តការបញ្ជ្រាបយេនឌ័រនៅគ្រប់កម្រិត ការធ្វើស្ថាប័នីយកម្មថវិកាឆ្លើយតបយេនឌ័រ ការពង្រឹងភាពជាអ្នកដឹកនាំរបស់ ស្រ្តី និងក្មេងស្រី។

រាជរដ្ឋាភិបាលបន្តទប់ស្កាត់រាល់ទម្រង់នៃអំពើហិង្សាទាក់ទងនឹងយេន ឌ័រ និងពង្រឹងភាពអង់អាចដល់ស្រ្តី និងក្មេងស្រីតាមរយៈកម្មវិធី និងយុទ្ធសាស្ត្រអាទិភាពដូចជា៖ លើកកម្ពស់សីលធម៌សង្គម តម្លៃស្ត្រី និងទប់ស្កាត់អំពើហិង្សាទាក់ទងនឹងយេនឌ័រ អនុវត្តរបៀបវារៈ និងផែនការសកម្មភាពជាតិ ស្ដីពីស្ត្រីសន្តិភាព និងសន្តិសុខ លើកកម្ពស់កិច្ចគាំពារសង្គមឆ្លើយតបនឹងយេនឌ័រ ការងារសមរម្យ និងកន្លែងដែលមានមេត្រីភាពសម្រាប់ស្ត្រី និងការថែទាំសុខភាពឆ្ពោះទៅកម្មវិធីគ្របដណ្តប់ជាសកលសំដៅធានាឱ្យប្រជាពលរដ្ឋគ្រប់រូបទទួលបានដោយសមធម៌។ ពង្រឹងភាពអង់អាចដល់ស្រ្ដីក្នុងសេដ្ឋកិច្ចឌីជីថល សហគ្រិនភាព ការអភិវឌ្ឍជំនាញ សេដ្ឋកិច្ច សុខុមាលភាព ព្រមទាំងភាពជាអ្នកដឹកនាំ និងអភិបាលកិច្ចប្រកបដោយបរិយាបន្ន។ ឆ្លើយតបទៅនឹងការយកចិត្តទុកដាក់របស់រាជរដ្ឋាភិបាលក្នុងការលើកកម្ពស់សម ភាពយេនឌ័រ និងសិទ្ធិរបស់ស្រ្តី និងក្មេងស្រី។ រដ្ឋបាលខេត្តបានបង្កើនចំនួនស្រ្តីនៅក្នុងមុខតំណែងក្នុងរចនាសម្ព័ន្ធដឹកនាំ នៃរដ្ឋបាលខេត្ត ក្រុង ស្រុក និងមន្ទីរ-អង្គភាព ព្រមទាំងបន្តលើកកម្ពស់សីលធម៌សង្គម តម្លៃស្ត្រី និងសុខដុមរមនាក្នុងគ្រួសារ តាមរយៈការ ទប់ស្កាត់អំពើហិង្សាលើស្រ្តី និងកុមារ ទប់ស្កាត់រាល់ទម្រង់នៃការរើសអើងប្រឆាំងនឹងស្ត្រី និងអំពើហិង្សាទាក់ទងនឹងយេនឌ័រ អំពើជួញដូរ និងកេងប្រវ័ញ្ចគ្រប់ទម្រង់ ជាពិសេសចាត់វិធានការទប់ស្កាត់ និងកាត់បន្ថយហានិភ័យនានា ដែលប៉ះពាល់ដល់សុវត្ថិភាព និងសេចក្តីថ្លៃថ្នូររបស់ស្រ្តី និងក្មេងស្រីនៅតាមប្រព័ន្ធបច្ចេកវិទ្យា និងអនឡាញ។ យកចិត្តទុកដល់ការងារសង្គម ជាពិសេសជួយដល់ស្រ្តី កុមារ និងជនងាយរងគ្រោះ ត្រូវមានសាមគ្គីភាពផ្ទៃក្នុង ត្រូវចេះជួយគ្នា ក្នុងគ្រាមានអាសន្ន ស្រ្តីជួយស្រ្តី មុននឹងស្វែងរកការគាំទ្រ និងជំនួយពីបុរស (ស្រ្តីជាឆ្អឹងខ្នងនៃសេដ្ឋកិច្ច និងការអភិវឌ្ឍសង្គម)។

ទន្ទឹមនឹងនេះ ឯកឧត្តមបានលើកទឹកចិត្តឱ្យបងប្អូនជាស្រ្តីនៅក្នុងខេត្តត្រូវសកម្ម ហ៊ានបកស្រាយពន្យល់ វាយបកការពារភាពត្រឹមត្រូវ និងប្រឆាំងដាច់ខាតចំពោះក្រុមជនអគតិទំាងឡាយ ដែលបង្កការញុះញង់បំភ្លៃការពិតក្នុងចេតនាដ៏ខ្មៅងងឹត សំដៅបង្កចលាចលបំផ្លាញសកម្មភាពសមិទ្ធផលរបសថ្នាក់ដឹកនាំជាតិ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា តាមបទពិសោធន៍នៃភាពជោគជ័យកន្លងមក គឺអាស្រ័យលើការឯកភាពគ្នារួមមាន ឯកភាពខាងឆន្ទៈ ឯកភាពខាងស្មារតី ឯកភាពខាងភាសានិយាយ និងឯកភាពខាងសកម្មភាពនានាក្នុងសង្គមប្រកបដោយប្រសិទ្ធភាពខ្ពស់៕

ដោយ ងូ សុមុនី