AKP ហាណូយ, វៀតណាម ថ្ងៃទី២៥ ខែសីហា ឆ្នាំ២០២៦--គណៈប្រតិភូក្រសួងព័ត៌មានកម្ពុជា និងថ្នាក់ដឹកនាំស្ថានីយទូរទស្សន៍ជាតិវៀតណាម (VTV) បានជួបពិភាក្សាអំពីការការផ្លាស់ប្តូរប្រព័ន្ធអាណាឡូក ទៅឌីជីថល និងការប្រើប្រាស់បញ្ញាសប្បនិម្មិត(AI) ក្នុងវិស័យព័ត៌មាន ដើម្បីឆ្លើយតបទៅនឹងការវិវត្តយ៉ាងឆាប់រហ័សនៃការផលិត និងការផ្សព្វផ្សាយព័ត៌មានទំនើប។

ក្នុងដំណើរបំពេញទស្សនកិច្ចសិក្សាការងារនៅរដ្ឋធានីហាណូយ សាធារណរដ្ឋសង្គមនិយមវៀតណាម កាលពីថ្ងៃទី២៤ ខែសីហា ឆ្នាំ២០២៦ គណៈប្រតិភូក្រសួងព័ត៌មានកម្ពុជា ដឹកនាំដោយ លោក ជ្រីម ឆេងលីម អគ្គលេខាធិការរង នៃអគ្គលេខាធិការដ្ឋាន ក្រសួងព័ត៌មាន បានចូលជួបសម្តែងការគួរសម និងពិភាក្សាការងារជាមួយ លោក ឡេ ខ្វៀន (Le Quyen) អគ្គនាយករងទូរទស្សន VTV ដែលជំនួបលើកនេះ ធ្វើឡើងផ្អែកលើស្មារតីនៃអនុស្សរណៈកិច្ចសហប្រតិបត្តិការ រវាងក្រសួងព័ត៌មានកម្ពុជា និងក្រសួងវប្បធម៌ កីឡា និងទេសចរណ៍វៀតណាម។ 

សម្រាប់គោលដៅចម្បងនៃជំនួបនេះ គឺការបើកផ្លូវឱ្យមន្ត្រីបច្ចេកទេស និងអ្នកជំនាញព័ត៌មានកម្ពុជា ដកស្រង់បទពិសោធន៍ផ្ទាល់ពី VTV លើការផ្លាស់ប្តូរប្រព័ន្ធផ្សាយអាណាឡូកចាស់ ដើម្បីជំនួសដោយប្រព័ន្ធឌីជីថលពេញលេញ ព្រមទាំងការយកបច្ចេកវិទ្យា AI។

ក្នុងឱកាសនោះ លោក ជ្រីម ឆេងលីម បានសម្តែងនូវការអរគុណចំពោះបដិសណ្ឋារកិច្ច និងបានរម្លឹកពីគុណតម្លៃនៃកិច្ចសហប្រតិបត្តិការជាប្រវត្តិសាស្ត្រ ដែល VTV តែងតែជួយជ្រោមជ្រែងដល់ទូរទស្សន៍ជាតិកម្ពុជា (TVK) ដូចជាការបញ្ជូនក្រុមបច្ចេកទេសមកជួយផ្សាយផ្ទាល់ក្នុងព្រឹត្តិការណ៍ធំៗ និងការរក្សាទំនាក់ទំនងយ៉ាងជិតស្និទ្ធតាមរយៈការិយាល័យតំណាងអចិន្ត្រៃយ៍ VTV នៅរាជធានីភ្នំពេញ។

ជាការឆ្លើយតប លោក ឡេ ខ្វៀន បានគូសបញ្ជាក់ថា VTV និងស្ថាប័នព័ត៌មានកម្ពុជា មានចំណងមិត្តភាពការទូតព័ត៌មានយ៉ាងរឹងមាំតាំងពីឆ្នាំ១៩៨១ មកម្ល៉េះ។ លោកអគ្គនាយករងបានកោតសរសើរ ទូរទស្សន៍ជាតិកម្ពុជា ដែលបានចាប់ផ្តើមយកចិត្តទុកដាក់លើបច្ចេកវិទ្យា AI ហើយ VTV រីករាយនឹងចែករំលែកបទពិសោធន៍ដែលខ្លួនកំពុងអនុវត្តន៍ប្រកបដោយជោគជ័យ។ 

ជាមួយគ្នានេះ ភាគីវៀតណាមបានស្នើឱ្យកម្ពុជា ជួយសម្រួលការផ្សព្វផ្សាយប៉ុស្តិ៍ "Vietnam Today" នៅកម្ពុជា ដែលសំណើនេះ ត្រូវបានភាគីកម្ពុជា ទទួលយកដើម្បីជម្រាបជូន ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ពិនិត្យ និងសម្រេច៕

ដោយ៖ ទូច វលក័្ខណ