AKP ភ្នំពេញ ថ្ងៃទី០៥ ខែមីនា ឆ្នាំ២០២៥ – សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានជំរុញឱ្យពលរដ្ឋខ្មែរទាំងអស់គ្នា រួមគ្នាលេងល្បែងប្រជាប្រិយប្រពៃណីជាតិខ្មែរ នៅក្នុងឱកាសចូលឆ្នាំថ្មីប្រពៃណីជាតិខាងមុខ ឱ្យបានផុសផុល និងគ្រប់ទីកន្លែងទូទាំងប្រទេស។

ក្នុងឱកាសអញ្ជើញជាអធិបតី “ទិវាវប្បធម៌ជាតិ ៣មីនា លើកទី២៧ ឆ្នាំ២០២៥” និងសំណេះសំណាល​ ជាមួយសិល្បករសិល្បការិនីទូទាំងប្រទេស លើកទី៦ នារសៀលថ្ងៃទី៥ ខែមីនា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្តេច​ធិបតី ហ៊ុន ម៉ាណែត បានរំលឹកនូវភាពសប្បាយរីករាយ ដែលគ្រប់កន្លែងទាំងអស់ នៅថ្ងៃចូលឆ្នាំថ្មីប្រពៃណីជាតិកាលពីឆ្នាំមុន និងឃើញនូវការចូលរួមលេងល្បែងប្រពៃណីផុសផុលឡើងវិញ បើទោះមានការលេងល្បែងបាញ់ទឹកដោយ ។

ក្នុងឱកាសនោះ សម្តេចធិបតី សង្ឃឹមថា ចូលឆ្នាំខ្មែរឆ្នាំនេះ និងចូលឆ្នាំខ្មែរក្រោយៗបន្តទៅទៀត ពលរដ្ឋខ្មែរគ្រប់រូប នឹងនាំគ្នាលេងល្បែងប្រពៃណីឱ្យបានផុសផុលនៅគ្រប់ទីកន្លែង ទូទាំងប្រទេសផងដែរ ។

ជាមួយគ្នានេះ សម្តេចធិបតី សង្កេតឃើញថា សន្ទុះនៃការចូលរួមនៅឆ្នាំមុន ពីសំណាក់យុវជនខ្មែរបានរួមគ្នាយ៉ាងផុសផុលគាំទ្រទៅដល់សិល្បៈវប្បធម៌ខ្មែរ ដោយសម្តេចផ្តាំមិនត្រូវមានទស្សនៈ ទុទិដ្ឋិនិយមលើយុវជន ដែលជាកម្លាំងស្នូលនោះទេ ។

សម្តេចធិបតី មានប្រសាសន៍ថា "ហើយយុវជនរបស់យើង ជាកម្លាំងស្នូល ដែលខ្ញុំឃើញតាំងពីឆ្នាំទៅនេះ រួមគ្នាដើម្បីគាំទ្រទៅដល់សិល្បៈវប្បធម៌ ថតរូប TikTok ដែលមានរូបល្ខោនខោលផ្សេងៗ សិល្បករ សិល្បការិនីរបស់យើង ទាំងសិល្បករជំនាន់រៀមច្បង ទាំងសិល្បករជំនាន់ក្រោយរបស់យើង រួមគ្នាបន្តទៀត ជំរុញនូវសិល្បៈវប្បធម៌ល្បែងប្រពៃណីរបស់យើងឱ្យបានច្រើន" ។

ក្នុងនោះសម្តេចធិបតី បានបង្ហើបឱ្យដឹងថា នៅឆ្នាំ២០២៥នេះ នឹងមានការរៀបចំអង្គរសង្ក្រាន្តដែលមានការសម្តែងសិល្បៈវប្បធម៌ជាច្រើន និងឱ្យមានការរៀបចំការសម្តែងសិល្បៈវប្បធម៌នៅថ្នាក់ខេត្ត ថ្នាក់ស្រុកឱ្យបានច្រើនផងដែរ ។

សម្តេចធិបតី មានប្រសាសន៍បន្ថែមថា "ជំរុញការលេងល្បែងប្រជាប្រិយរបស់យើង​ឱ្យបានច្រើន ដើម្បីថែរក្សានិងលើកស្ទួយវប្បធម៌របស់យើង ។ និយាយចឹងមិនមែនបានន័យថា ហាមមិនឱ្យលេងល្បែងបាញ់ទឹកនោះទេ ប៉ុន្តែកុំភ្លេចល្បែងរបស់យើងផង ហើយលេងឱ្យបានច្រើន នេះគឺជាការជំរុញ និងសប្បាយរីករាយទាំងអស់គ្នា នៅក្នុងការថែរក្សាវប្បធម៌របស់យើង ទាំងសប្បាយ ទាំងរួមគ្នាថែរក្សាសម្បត្តិវប្បធម៌ល្បែងប្រជាប្រិយរបស់យើង" ។

ក្នុងនោះផងដែរ សម្តេចធិបតី បានបង្ហាញក្តីសង្ឃឹមថា សង្គ្រាន្តនៅកម្ពុជា នឹងអាចចុះនៅក្នុងបិតភណ្ឌពិភពលោក​ក្នុងពេលឆាប់ៗខាងមុខផងដែរ ខណៈដែលសម្តេចថា សង្ក្រាន្តអត់មានផ្តាច់មុខរបស់ប្រទេសណាទេ៕

ដោយ៖ គង់ សិរីរ័ត្ន, រូបថត៖ គល់ រ៉េននី