AKP ភ្នំពេញ ថ្ងៃទី០៥ ខែមិនា ឆ្នាំ២០២៥ -- លោក ប៉ាកទីយ័រ ឃូដូយ័រហ្សូដា (Bakhtiyor Khudoyorzoda) ប្រធានគណៈកម្មាធិការរៀបចំការបោះឆ្នោតមជ្ឈិមបានប្រកាសកាលពីថ្ងៃច័ន្ទថា លទ្ធផលបឋមបង្ហាញថាគណបក្សប្រជាធិបតេយ្យប្រជាជនដែលកំពុងកាន់អំណាចរបស់ប្រទេសតាហ្ស៊ីគីស្ថានបានឈ្នះការបោះឆ្នោតសភាកាលពីថ្ងៃអាទិត្យជាមួយនឹងសំឡេង ៥១,៩% ។

យោងតាមគណៈកម្មាធិការរៀបចំការបោះឆ្នោត បានឱ្យដឹងថា​ គណបក្សកាន់អំណាចដែលដឹកនាំដោយប្រធានាធិបតី លោក អេម៉ូម៉ាលី រ៉ាហ៍ម៉ុន (Emomali Rahmon) ទទួលបានអាសនៈចំនួន ១២ ក្នុងចំណោម២២អាសនៈក្នុងបញ្ជីគណបក្ស និង ៣៧អាសនៈក្នុង ៤១មណ្ឌលបោះឆ្នោតតែមួយអាណត្តិ។

ក្នុងចំណោមអាសនៈទាំង ២២ក្នុងបញ្ជីគណបក្ស គណបក្សកសិកម្មទទួលបាន ៥អាសនៈ គណបក្សកំណែទម្រង់សេដ្ឋកិច្ចទទួលបាន ៣អាសនៈហើយគណបក្សសង្គមនិយម និងគណបក្សប្រជាធិបតេយ្យទទួលបាន១អាសនៈ។

អាសនៈចំនួន ២២ក្នុងចំណោមអាសនៈទាំង ៦៣នៅក្នុងសភាជាន់ទាបត្រូវបានប្រកួតប្រជែងដោយបេក្ខជនចំនួន ៦៨រូបដែលត្រូវបានតែងតាំងដោយគណបក្សនយោបាយ ខណៈដែលអាសនៈដែលនៅសល់ចំនួន៤១នឹងត្រូវបោះឆ្នោតជ្រើសរើសក្នុងចំណោមបេក្ខជនចំនួន ១៥២រូបនៅទូទាំង ៤១មណ្ឌលបោះឆ្នោត ។

គណៈកម្មាធិការ​បាន​ឲ្យ​ដឹង​ថា ការបោះឆ្នោតបានចាប់ផ្តើមនៅម៉ោង៦:០០នាទីព្រឹក (ម៉ោងក្នុងស្រុក) ហើយបានបញ្ចប់នៅម៉ោង ៨:០០នាទីយប់នៅថ្ងៃអាទិត្យ។ ដោយមាន​ការិយាល័យ​បោះឆ្នោត​ចំនួន ៣.៥១៣ នៅ​ទូទាំង​ប្រទេស រួម​នឹង​ការិយាល័យ​បោះឆ្នោត​នៅ​ក្រៅ​ប្រទេស​ចំនួន ៣៦៕

ដោយ៖ មូល មិនា (ប្រភព៖ ស៊ីនហួ)