AKP ភ្នំពេញ ថ្ងៃទី០៥ ខែមីនា ឆ្នាំ២០២៥-- លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានបន្តលើកទឹកចិត្តដល់សមត្ថកិច្ចតាមបណ្ដោយផ្លូវជាតិលេខ១ ឱ្យអនុវត្តច្បាប់ និងគោលការណ៍ណែនាំរបស់ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ករណីរថយន្តក្រុងដឹកអ្នកដំណើរកម្ពុជា-វៀតណាម បន្ទាប់ពីបានណែនាំអគ្គស្នងការដ្ឋាននគរបាលជាតិ ឱ្យអនុវត្តវិធានការលើក្រុមរថយន្តដឹកអ្នកដំណើរតាមផ្លូវជាតិលេខ១ នាពេលកន្លងទៅថ្មីៗនេះរួចមកនោះ។

សូមជម្រាបជូនថា ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានចំណារណែនាំឱ្យអគ្គស្នងការដ្ឋាននគរបាលជាតិអនុវត្តវិធានការមួយចំនួន ដើម្បីបង្ការទប់ស្កាត់គ្រោះថ្នាក់ចរាចរណ៍តាមបណ្ដោយផ្លូវជាតិលេខ១ ពីរាជធានីភ្នំពេញទៅព្រំដែនកម្ពុជា-វៀតណាម ដោយផ្តោតលើរថយន្តដឹកអ្នកដំណើរទៅមកភ្នំពេញ-វៀតណាម ដោយចំណារណែនាំពីប្រមុខក្រសួងមហាផ្ទៃធ្វើឡើងបន្ទាប់ពីការសង្កេតឃើញថា រថយន្តដឹកអ្នកដំណើរទៅមកភ្នំពេញ-វៀតណាមមួយចំនួនទទួលរងការរិះគន់ និងមានការបង្ហាញក្ដីបារម្ភពីសំណាក់ប្រជាពលរដ្ឋដែលធ្វើដំណើរតាមដងផ្លូវ និងពលរដ្ឋរស់នៅតាមបណ្ដាផ្លូវជាតិលេខ១ អំពីការបើកបរលើសល្បឿនកំណត់ វ៉ាជែងគ្នា ដែលបង្កជាហានិភ័យ និងបណ្ដាលឱ្យមានគ្រោះថ្នាក់ជាញឹកញាប់ ហើយកន្លងមកក៏មានការស្នើសុំពីមហាជនឱ្យក្រសួងមហាផ្ទៃចាត់វិធានការលើបញ្ហានេះ ដើម្បីធានាសុវត្ថិភាពចរាចរណ៍តាមដងផ្លូវ ជាពិសេសគឺផ្លូវជាតិលេខ១ ដែលមានសភាពតូចចង្អៀត និងមានចរាចរណ៍យ៉ាងមមាញឹកនោះ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)