AKP បន្ទាយមានជ័យ ថ្ងៃទី០៤ ខែមីនា ឆ្នាំ២០២៥-- ឯកឧត្តម អ៊ុំ រាត្រី អភិបាលខេត្តបន្ទាយមានជ័យ កាលពីថ្ងៃទី០៣ ខែមីនា ឆ្នាំ២០២៥ បានដឹកនាំក្រុមការងារចុះត្រួតពិនិត្យស្ថានភាពទឹក និងស្ទាបស្ទង់សុខទុក្ខអាជីវករលក់ដូរនៅអាងត្រពាំងថ្ម ស្រុកភ្នំស្រុក។ ការចុះមួយជំហាននេះបានផ្តោតលើការវាយតម្លៃប្រសិទ្ធភាពការគ្រប់គ្រងទឹក ក៏ដូចជាការទទួលស្តាប់បញ្ហាប្រឈមពីសំណាក់អាជីវករលក់ដូរក្នុងតំបន់រមណីដ្ឋានទេសចរណ៍មួយនេះ។

ក្នុងការត្រួតពិនិត្យស្ថានភាពទឹក ឯកឧត្តមបានពិនិត្យមើលកម្រិតទឹក និងគុណភាពទឹកនៅអាងត្រពាំងថ្ម ដែលជាប្រភពទឹកសំខាន់សម្រាប់កសិកម្ម និងការប្រើប្រាស់ផ្ទាល់ខ្លួនរបស់ប្រជាពលរដ្ឋ និងបានចង្អុលបង្ហាញពីតម្រូវការកែលម្អប្រព័ន្ធបង្ហូរទឹក និងការព្រមានអំពីការប្រើប្រាស់ទឹកឱ្យប្រមូលផ្តុំទៅលើរដូវប្រាំងខាងមុខ។

ទន្ទឹមនឹងនេះ ឯកឧត្តមអភិបាលខេត្តបានមានប្រសាសន៍ថា អាជ្ញាធរមានសមត្ថកិច្ចត្រូវបន្តដាក់អាទិភាពលើការថែទាំហេដ្ឋារចនាសម្ព័ន្ធទឹក និងធានាការបង្ការការខ្វះខាតទឹក ជាពិសេសនៅពេលមានគ្រោះរាំងស្ងួត។ ឯកឧត្តមបានជួបជាមួយអាជីវករលក់ដូរនៅតំបន់អាងទឹក ដើម្បីស្តាប់បញ្ហារបស់ពួកគេ។ អ្នកលក់ជាច្រើនបានលើកឡើងពីការលំបាកក្នុងការរក្សាស្តង់ដារអនាម័យ និងការប្រកួតប្រជែងពីការលក់ដូរតាមអនឡាញ។

ឯកឧត្តមអភិបាលខេត្តបានផ្តោតលើចំពោះអាជ្ញាធរដោយបានជំរុញបង្កើនការត្រួតពិនិត្យអនាម័យ និងសុវត្ថិភាពអាហារនៅតំបន់លក់ដូរនេះ សហការជាមួយសហគ្រាសឯកជនដើម្បីធានាការចែកចាយទឹកស្អាតដល់សហគមន៍។ ចំពោះអាជីវកររក្សាបរិស្ថានដែលមានសណ្តាប់ធ្នាប់ និងស្អាត ប្រើប្រាស់ទឹកឱ្យមានប្រសិទ្ធភាព និងចៀសវាងការបំពាក់ប្រព័ន្ធបង្ហូរទឹក។

ឯកឧត្តមបានបញ្ជាក់ថា ការអភិវឌ្ឍប្រកបដោយចីរភាពនៃធនធានទឹកគឺជាគន្លឹះសម្រាប់ការលូតលាស់សេដ្ឋកិច្ច និងសុខុមាលភាពប្រជាជន និងបានសន្យាថា អាជ្ញាធរខេត្តនឹងបន្តគាំទ្រដល់អាជីវករតូចៗ តាមរយៈកម្មវិធីជំរុញសកម្មភាពពាណិជ្ជកម្ម និងការពង្រីកហេដ្ឋារចនាសម្ព័ន្ធ។ ការចុះមួយដងនេះ បានបង្ហាញពីការយកចិត្តទុកដាក់របស់អាជ្ញាធរខេត្តក្នុងការដោះស្រាយបញ្ហាប្រចាំថ្ងៃរបស់ប្រជាពលរដ្ឋ និងការពង្រឹងស្ថេរភាពធនធានធម្មជាតិសម្រាប់អនាគត។

សូមបញ្ជាក់ថា អាងត្រពាំងថ្ម ស្ថិតនៅក្នុងឃុំប៉ោយចា ស្រុកភ្នំស្រុក ខេត្តបន្ទាយមានជ័យ បច្ចុប្បន្នអាងអាចរក្សាទឹកបានប្រមាណ១៨០លានម៉ែត្រគូបនៅរដូវវស្សា។ នៅរដូវប្រាំងអាងទឹកនេះអាចរក្សាទឹកបាន១២០លានម៉ែត្រគូប ដែលមានលទ្ធភាពស្រោចស្រពលើផ្ទៃដីស្រូវវស្សាទំហំ ២៥ ០០០ហិកតា និងស្រែប្រាំងទំហំ ១២ ០០០ហិកតា។ បន្ទាប់ពីបានស្ថារឡើងវិញជាបន្តបន្ទាប់ រហូតមកដល់ពេលនេះ អាងត្រពាំងថ្មមិនមែនគ្រាន់តែជាប្រព័ន្ធធារាសស្រ្តដ៏មានសក្តានុពលប៉ុណ្ណោះទេ តែថែមទាំងក្លាយជាតំបន់ទេសចរណ៍បែបធម្មជាតិ ដែលមានសម្រស់ដ៏ស្រស់ត្រកាល មានទេសភាពដាច់កន្ទុយភ្នែក ទិដ្ឋភាពវាលស្រែធំល្វឹងល្វើយលាយឡំជាមួយនឹងខ្យល់អាកាសបរិសុទ្ធ។ ដោយមានទីតាំងនៅជិតជើងភ្នំ អាងត្រពាំងថ្មក៏ត្រូវបានគេរៀបចំអភិរក្សជាតំបន់អេកូទេសចរណ៍មួយ ដែលសម្បូរទៅដោយធនធានជីវចម្រុះនានា និងជាតំបន់ប្រវត្តិសាស្រ្ត និងធម្មជាតិគំរូរបស់កម្ពុជាមុនគេ៕

ដោយ ឈុន សារ៉ាត