AKP ភ្នំពេញ ថ្ងៃទី០៣ ខែមីនា ឆ្នាំ២០២៥ -- ប្រធានគណៈកម្មាធិការស៊ើបអង្កេតរបស់រុស្ស៊ី លោក អាឡិចសាន់ដឺរ បាស្រ្ទីគីន (Alexander Bastrykin) បាននិយាយនៅក្នុងបទសម្ភាសន៍មួយជាមួយសារព័ត៌មានតាសស៍ (TASS) ថា កងកម្លាំងប្រដាប់អាវុធនៃប្រទេសអ៊ុយក្រែនទទួលបានអាវុធដ៍សាហាវបំផុតរបស់ពួកគេពីចក្រភពអង់គ្លេស កាណាដា អាល្លឺម៉ង់ និងអ៊ីតាលី។

លោកបាននិយាយថា «រួមជាមួយក្រសួងការពារជាតិ យើងកំពុងចងក្រងឯកសារការពិតនៃការផ្គត់ផ្គង់សព្វាវុធ និងឧបករណ៍ផ្សេងៗទៀតពីបរទេស។ លើសពីនេះទៀត សព្វាវុធដ៍សាហាវបំផុតត្រូវបានផ្គត់ផ្គង់ដោយចក្រភពអង់គ្លេស កាណាដា អ៊ីតាលី អាល្លឺម៉ង់ រូម៉ានី អេស្តូនី និងប្រទេសមួយចំនួនទៀត»។

យោងតាមលោក បាស្រ្ទីគីន បានឱ្យដឹងថា គ្រាប់កាំជ្រួច Storm Shadow កាំភ្លើងធំ រថក្រោះការពារ គ្រាប់កាំភ្លើងត្បាល់ និងគ្រាប់បែកពីលើអាកាស កំពុងត្រូវបានផ្គត់ផ្គង់ពីអឺរ៉ុប។ លើសពីនេះទៀត កងកម្លាំងប្រដាប់អាវុធអ៊ុយក្រែនទទួលបានយន្តហោះគ្មានមនុស្សបើក ដែលត្រូវបានគេប្រើប្រាស់យ៉ាងទូលំទូលាយមិនត្រឹមតែក្នុងប្រតិបត្តិការប្រយុទ្ធប៉ុណ្ណោះទេ ប៉ុន្តែថែមទាំងក្នុងការវាយប្រហារលើហេដ្ឋារចនាសម្ព័ន្ធស៊ីវិលផងដែរ៕

ដោយ៖ យា ចិន្ដាខន្ដី (ប្រភព៖ តាសស៍)