AKP ភ្នំពេញ ថ្ងៃទី០៣ ខែមីនា ឆ្នាំ២០២៥ -- នាយករដ្ឋមន្ត្រីថៃ លោកស្រី ផែថុងថាន​ ស៊ីណាវ៉ាត្រា (Paetongtarn Shinawatra) បានគូសបញ្ជាក់នូវអ្វីដែលលោកស្រីគិតថាកំពុងធ្វើឱ្យមានកំណើនសេដ្ឋកិច្ចយឺតរបស់ប្រទេសថៃហើយបានសន្យាថារដ្ឋបាលរបស់លោកស្រីនឹងពន្លឿនការពង្រីកសេដ្ឋកិច្ច។

នៅក្នុងកម្មវិធី «Empowering Thais» ប្រចាំសប្តាហ៍នៅព្រឹកថ្ងៃទី០២ខែមីនា លោកស្រីនាយករដ្ឋមន្ត្រីបាននិយាយថា ផលិតផលក្នុងស្រុកសរុប(GDP) របស់ប្រទេសក្នុងតំបន់អាស៊ីអាគ្នេយ៍មួយនេះបានកើនឡើងត្រឹមតែ២,៥% កាលពីឆ្នាំមុន ដោយសារតែខ្លួនមិនបានវិនិយោគច្រើននៅក្នុងឧស្សាហកម្មថ្មីៗ និងមិនបានរៀបចំប្រជាជនសម្រាប់ឧស្សាហកម្មនាពេលអនាគតក្នុងទសវត្សរ៍កន្លងមក។

លោកស្រី​ក៏​បាន​ជំរុញឱ្យ​វិស័យ​ឯកជន​ជួយ​ដល់រដ្ឋាភិបាលដើម្បី​អភិវឌ្ឍ​សេដ្ឋកិច្ចជាតិផងដែរ។ លោកស្រី ផែថុងថាន បាននិយាយថាធនាគារពាណិជ្ជគួរតែអនុម័តប្រាក់កម្ចី ដូច្នេះសហគ្រាសធុនតូច និងមធ្យមអាចបង្កើនការវិនិយោគរបស់ពួកគេ។

មេដឹកនាំរូបនេះបាននិយាយថា ឧបសគ្គថវិកាក៏ជាមូលហេតុនៃកំណើនGDP យឺតផងដែរ ដោយសារតែថវិកាជាតិភាគច្រើនត្រូវបានចំណាយទៅលើការចំណាយថេររបស់រដ្ឋាភិបាល។

លោក​ស្រីបាននិយាយ​បន្ត​ថា រដ្ឋាភិបាល​កំពុង​ព្យាយាម​រក្សា​ការ​ទូទាត់​ថេរ រក្សា​ថវិកា​ដែល​នៅ​សល់​សម្រាប់​ការ​វិនិយោគ និង​ទាក់ទាញ​ការ​វិនិយោគ​ពី​បរទេស។

លោកស្រីនាយករដ្ឋមន្ត្រីបាននិយាយថា កាលពីឆ្នាំមុន វិនិយោគិនបរទេសបានវិនិយោគទឹកប្រាក់ចំនួន ១,១៣ពាន់ពាន់លានបាត (៣៣ពាន់លានដុល្លារអាម៉េរិក) នៅក្នុងគម្រោងមួយចំនួនក្នុងប្រទេសថៃដែលជាចំនួនខ្ពស់បំផុតក្នុងរយៈពេលមួយទសវត្សរ៍កន្លងមក ហើយនៅក្នុងឆ្នាំនេះក្រុមហ៊ុន Google ក្រុមហ៊ុន TikTok និងក្រុមហ៊ុន Nvidia នឹងបណ្តាក់ទុននៅក្នុងប្រទេសនេះ៕

ដោយ៖ យា ចិន្ដាខន្ដី (ប្រភព៖ VN