AKP កំពង់ស្ពឺ ថ្ងៃទី០៣ ខែមីនា ឆ្នាំ២០២៥-- 

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលខេត្តកំពង់ស្ពឺ តំណាងដ៏ខ្ពង់ខ្ពស់ សម្តេចវិបុលសេនាភក្តី សាយ ឈុំ ឧត្តមប្រឹក្សាផ្ទាល់ព្រះមហាក្សត្រ  នាព្រឹកថ្ងៃទី០៣ ខែមីនា ឆ្នាំ២០២៥នេះ បានអញ្ជើញជាអធិបតីក្នុងពិធីសម្ពោធសមិទ្ធផលនានាក្នុងវត្ត ក្នុងវត្តកោដូនតី ស្ថិតក្នុងភូមិកោដូនតី ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ ពិធីនេះមានការនិមន្ត និងអញ្ជើញចូលរួមពីព្រះមេគណ ខេត្តកំពង់ស្ពឺទាំងពីរគណៈ សមាជិកព្រឹទ្ធសភា រដ្ឋសភា ឯកឧត្តម លោកជំទាវ លោក លោកស្រី ក្រុមការងាររាជរដ្ឋាភិបាលចុះជួយ មូលដ្ឋានខេត្ត ក្រុង ស្រុក ថ្នាក់ដឹកនាំ និងមន្រ្តីរាជការចំណុះរដ្ឋបាល ខេត្ត និងប្រជាពលរដ្ឋ សរុបអ្នកចូលរួមប្រមាណជា៣២០០អង្គ/នាក់។

ក្នុងនាមជាពុទ្ធសាសនិកមួយរូប ឯកឧត្តមឧបនាយករដ្ឋមន្រ្តី ហ៊ុន ម៉ានី ថ្លែងអំណរព្រះគុណដល់ព្រះចៅអធិការវត្ត ព្រះថេរានុថេរៈ សប្បុរជន និងពុទ្ធបរិស័ទគ្រប់ទិសទី ដែលបានលះបង់កម្លាំងកាយចិត្ត សម្ភារ និងថវិកា ចូលរួមកសាងព្រះវិហារ និងសមិទ្ធផលជាបន្តបន្ទាប់ក្នុងវត្តកោដូនតីនេះ។ ឯកឧត្តមឧបនាយករដ្ឋមន្រ្តីបានបន្ថែមថា សមិទ្ធផលពេលនេះ មិនអាចកើតឡើងដោយឯកឯងបានទេ បើមិនមានការចូលរួមចំណែក ពីពុទ្ធបរិស័ទ ប៉ុន្តែយើងក៏មិនអាចមើលរំលងពីកត្តាសុខសន្តិភាព និង ស្ថិរភាពនយោបាយដែរ។ ឯកឧត្តមឧបនាយករដ្ឋមន្ត្រីបានគូសបញ្ជាក់ ថា កត្តាសុខសន្តិភាព និងស្ថិរភាពនយោបាយនេះហើយដែលបាន ផ្តល់ឱកាសឱ្យយើងបានជួបជុំគ្នា និងមានឱកាសធ្វើបុណ្យរួមគ្នា ក្នុង ការកសាងសមិទ្ធផលនានាឱ្យចេញជារូបរាងនៅថ្ងៃនេះ។

ផ្សារភ្ជាប់នឹងការលើកឡើងខាងលើ ឯកឧត្តមឧបនាយករដ្ឋមន្ត្រី រំលេចពីមូលដ្ឋានគ្រឹះនៃសន្តិភាព និងការអភិវឌ្ឍដែលរកបានដោយ អ្នកដឹកនាំជំនាន់មុន ជាពិសេសការលះបង់ដ៏ធំធេងរបស់សម្តេច តេជោ ហ៊ុន សែន និងការបន្តដឹកនាំរបស់អ្នកជំនាន់ក្រោយ ក្រោម ការដឹកនាំប្រកបដោយភាពស្វាហាប់ ឈ្លាសវៃ និងចក្ខុវិស័យវែងឆ្ងាយ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជានឹង បន្តរីកចម្រើន ហើយប្រជាពលរដ្ឋនឹងបន្តទទួលបានប្រយោជន៍ថ្មីៗ បន្ថែម ពីសុខសន្តិភាព និងគោលនយោបាយអភិវឌ្ឍជាតិរបស់ រាជរដ្ឋាភិបាល។

សូមបញ្ជាក់ថាៈវត្តឧត្តមគិរីព្រឹក្សា (កោដូនតី) ជាវត្តថ្មីទើបត្រូវបានកសាងបង្កើតឡើងក្នុងឆ្នាំ២០០០ ហើយមានព្រះចៅអធិការវត្ត ចំនួន៤ ជំនាន់។ចាប់ពីឆ្នាំ២០១១ ដល់បច្ចុប្បន្ន វត្តឧត្តមគិរីព្រឹក្សា(កោដូនតី) ត្រូវបានគ្រប់គ្រងនិងដឹកនាំដោយ ព្រះតេជគុណ «វរច្ឆន្ទោ ប៉ោ ហុំ» ជាព្រះគ្រូចៅអធិការវត្តជំនាន់ទី៤។ 

 ជាក់ស្តែងសមិទ្ធផលជាច្រើន សាលាឆាន់ធ្វើពីឈើ ១ខ្នង សាលាទទួលភ្ញៀវធ្វើពីឈើប្រក់ស្បូវ២ខ្នង កញ្ចុះទទួលភ្ញៀវ ២បន្ទប់ទឹក ស្រះទឹក១ ខ្លោងទ្វារវត្ត១ តបណ្តាញអគ្គិសនីចូលវត្ត រោងម៉ាស៊ីនភ្លើង១ ផ្លូវបេតុង១ខ្សែ និងដាំកូនឈើ ២០០ ដើម ក្នុងវត្តជាដើម។ល។ ព្រមជាមួយគ្នានេះដែរ ដោយមើលឃើញព្រះវិហារចាស់ (ធ្វើពីឈើ) មានសភាពចាស់ទ្រុឌទ្រោម ព្រះចៅអធិការ «ប៉ោ ហុំ» គណៈកម្មការអាចារ្យវត្ត បានឯកភាពគ្នារុះរើព្រះវិហារចាស់នោះចេញ ដើម្បីសាងសង់ជាថ្មីឡើងវិញ។រោងឧបោសថកម្ម(ព្រះវិហារ) ថ្មី នៃវត្តឧត្តមគិរីព្រឹក្សា ត្រូវបានរៀបចំពិធីក្រុងពលី បញ្ចុះបឋមសិលា បើកការដ្ឋានសាងសង់ កាលពីថ្ងៃទី១៧ ខែវិច្ឆិកា ឆ្នាំ២០១៤ ក្រោមការដឹកនាំរបស់ព្រះគ្រូចៅអធិការ គណៈកម្មការអាចារ្យវត្ត។  សម្តេចវិបុលសេនាភក្តី សាយ ឈុំ ឧត្តមប្រឹក្សាផ្ទាល់ព្រះមហាក្សត្រ នព្រះរាជាណាចក្រកម្ពុជា  មានសទ្ធជ្រះថ្លា បានជួយសាងសង់ជាថ្មីឡើងវិញ រួមនឹងសមិទ្ធផលជាច្រើនទៀត ដែលត្រូវសម្ពោធឆ្លងដាក់ឱ្យប្រើប្រាស់ក្នុងឱកានេះរួមមាន៖ រោងឧបោសថកម្មថ្មី (ព្រះវិហារ រួមទាំងព្រះពុទ្ធបដិមា គំនូរផ្សេងៗនៅក្នុងព្រះវិហារ) តម្លៃ ៣៥១.៦៧៤$ (បីរយហាសិបមួយពាន់ ប្រាំមួយរយចិត្តសិបបួនដុល្លារអាមេរិក) និងសមិទ្ធផលថ្មីៗជាហេដ្ឋារចនាសម្ព័ន្ធ តម្លៃ ៩៦.០៥០$ (កៅសិបប្រាំមួយពាន់ ហាសិបដុល្លារអាមេរិក) ដែលសរុបរួមមានតម្លៃ ៤៤៧,៧២៤$(បួនរយសែសិបប្រាំពីរពាន់ ប្រាំពីររយម្ភៃបួនដុល្លារអាមេរិក) ដោយមានចូលរួមចំណែកអំពីពុទ្ធបរិស័ទ្ធចំណុះជើងវត្ត និងសប្បុរសជននានា៕

ដោយ៖ គង់ សិរីរ័ត្ន, ប្រភព៖ AKP-កំពង់ស្ពឺ