AKP ព្រះសីហនុ ថ្ងៃទី០៣ ខែមីនា ឆ្នាំ២០២៥ -- លោកជំទាវ សេង សុមេត្តា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងលោក អ៊ី សុខឡេង អភិបាលរងខេត្តព្រះសីហនុ បានអញ្ជើញបើកការដ្ឋានសាងសង់ស្ថានីយបូមទឹកកខ្វក់ចំនួន២ទីតាំង និងប្រព័ន្ធទុយោទឹកកខ្វក់មានទីតាំងគម្រោងស្ថានីយទី១ ស្ថិតនៅភូមិ១ សង្កាត់លេខ១ ក្រុង ខេត្តព្រះសីហនុ នាព្រឹកថ្ងៃចន្ទ ទី០៣ ខែមីនា ឆ្នាំ២០២៥។

លោកជំទាវ សេង សុមេត្តា បានមានប្រសាសន៍ថា ទាក់ទងទៅនឹងគម្រោងស្ថានីយបូមទឹកកខ្វក់ទី១នេះ មានទីតាំងនៅភូមិ១ សង្កាត់លេខ១ ក្រុងព្រះសីហនុ និងស្ថានីយទីពីរស្ថិតនៅភូមិ២ ក្នុងគោលដៅរំដោះជំនន់ជន់លិចនៅតំបន់នេះ ដែលមានផលប៉ះពាល់ដល់ប្រជាពលរដ្ឋ ទី១. ជាការគិតគូរពីការជន់លិចរបស់ប្រជាពលរដ្ឋ ២. ពាក់ព័ន្ធលំហូនឹងភូមិសាស្ត្រ ដោយសារភូមិសាស្ត្រនៅខេត្តព្រះសីហនុរបស់យើងជាតំបន់ភ្នំ និងទីជំរាល។ យើងបានសិក្សាពីជំរាលខាងលើមកខាងក្រោម គឺមានបូមពីស្ថានីយទី២ ទម្លាក់មកស្ថានីយទី១ និងហូរបន្តទៅស្ថានីយ ទី៣ ក្នុងសង្កាត់លេខ១។ យើងមានក្រុមការងារបច្ចេកទេស និងអាជ្ញាធរខេត្ត ដែលមានលោកអភិបាលរងខេត្តព្រះសីហនុ ដែលបានចុះមកធ្វើការសិក្សាចេញជាគម្រោងនេះឡើង មកដល់បច្ចុប្បន្នជំហានទី១ អាចដោះស្រាយបានអាស្រ័យទៅលើស្ថានភាព និងផ្អែកទៅលើបញ្ហាហិរញ្ញវត្ថុ ក្នុងការឆ្លើយតប។

លោកជំទាវ បានបញ្ជាក់ថា នេះជាគម្រោងរបស់រាជរដ្ឋាភិបាល តាមរយ:គណកម្មាធិការឆ្នេរ ក្រុមការងាររាជរដ្ឋាភិបាលចុះជួយខេត្តព្រះសីហនុ និងមានការចូលរួមពីអាជ្ញាធរខេត្តផងដែរ យើងបានស្មើសុំជាកញ្ចប់ថវិការដ្ឋ ព្រោះកញ្ចប់ថវិកានេះ ក្នុងរាជរដ្ឋាភិបាលអាណត្តិទី៧ មានការអភិវឌ្ឍហេដ្ឋារចនាសម្ព័ន្ធច្រើន ហើយថវិកាត្រូវបានបែងចែកអភិវឌ្ឍគម្រោងជាច្រើន ហើយគម្រោងរបស់យើងត្រូវបានចាត់ទុកជាគម្រោងអធិភាពមួយផងដែរ ដែលក្រសួងសេដ្ឋកិច្ចបានទម្លាក់ថវិកាតាមរយ:គណកម្មការឆ្នេរសមុទ្រកម្ពុជា ក្រោមក្រសួងរៀបចំដែនដី នគរូបនីយកម្ម និងសំណង់ អនុវត្តគម្រោងនេះមានរយៈពេល៤ឆ្នាំ គឺចាប់ពីឆ្នាំ២០២៥ ដល់ឆ្នាំ២០២៨។

លោកជំទាវបានបន្តទៀតថា បញ្ហារបស់យើងនៅក្នុងភូមិ១ ភូមិ២ ប្រជាពលរដ្ឋមករស់នៅក្នុងតំបន់ថ្មី ហើយហេដ្ឋារចនាសម្ព័ន្ធមួយចំនួនរបស់យើងមិនទាន់បានក៏សាងរឹងមាំបញ្ហាអាចកើតមានច្រើន កន្លងមកអាជ្ញាធរមូលដ្ឋានបានធ្វើការដោះស្រាយជាបន្ត បន្ទាប់តាមរយការចុះមកជាប់ជាមួយក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ តាមរយ:ការធ្វើវេទិការសាធារណៈ ព្រោះបញ្ហាការស្តុកទឹកប្រើប្រាស់មានការជន់ លិចដល់លំនៅឋានរបស់បងប្អូនប្រជាពលរដ្ឋ ដើម្បីធ្វើការដោះស្រាយរំដោះទឹកជូនពួកគាត់ ក្រុមការងាររបស់យើងបានចុះមកមើលឃើញផ្ទាល់ ឈានដល់ការចូលរួមដោះស្រាយជាមួយបងប្អូនប្រជាពលរដ្ឋនៅភូមិ១ ភូមិ២ សង្កាត់លេខ១នាពេលនេះ។

លោកជំទាវក៏បានធ្វើការថ្លែងអំណរគុណដល់ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង ដែលបានផ្តួចផ្តើមគំនិតក្នុងការរៀបចំហេដ្ឋារចនាសម្ព័ន្ធ តាមរយ:គណកម្មការឆ្នេរ និងប្រធានក្រុមការងារចុះមូលដ្ឋានក្រុងព្រះសីហនុ និងអាជ្ញាធរខេត្ត បានធ្វើការងារជាប់ជាប្រចាំក្នុងការចូលរួមដោះស្រាយបញ្ហាប្រឈមជូនប្រជាពលរដ្ឋ  ព្រមទាំងសូមអំពាវនាវដល់ភាគីពាក់ព័ន្ធ ពិសេសប្រជាពលរដ្ឋចូលរួមជាមួយយើងទាំងអស់គ្នារួមគ្នាដោះស្រាយបញ្ហាចំពោះមុខ ដើម្បីភាពរីកចម្រើនទៅថ្ងៃខាងមុខបន្ថែមទៀត៕

ដោយ ងូ សុមុនី