AKP កំពង់ធំ ថ្ងៃទី០៣ ខែមីនា ឆ្នាំ២០២៥-- លោក ប៊ុន ឈួន ប្រធានក្រុមប្រឹក្សាស្រុក និងលោក ហាក់ ម៉ុងហួត អភិបាលស្រុកតាំងគោក កាលពីថ្ងៃទី០២ ខែមីនា ឆ្នាំ២០២៥ បានអញ្ជើញចូលរួមក្នុងពិធីបុណ្យពុទ្ធាភិសេកសម្ពោធឆ្លងសាលាឆាន់ និងសមិទ្ធផលនានាក្នុងវត្តរស្មីសាមគ្គី ហៅវត្តពង្រចាស់ ស្ថិតនៅក្នុងឃុំពង្រ ស្រុកតាំងគោក ខេត្តកំពង់ធំ ដោយមានការអញ្ជើញចូលរួមពីមន្រ្តីរាជការ កងកម្លាំងទាំងបីចំណុះឱ្យរដ្ឋបាលស្រុក លោកយាយ លោកតា ប្រជាពលរដ្ឋ និងសិស្សានុសិស្សប្រមាណ៥០០នាក់។

លោក ហាក់ ម៉ុងហួត បានមានប្រសាសន៍ថា ក្រោមម្លប់សុខសន្តិភាព និងក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបន្តមកសម្តេចធិបតី ហ៊ុន ម៉ាណែត នាយករដ្ឋមន្រ្តី នៃប្រទេសកម្ពុជាទទួលបានសុខសន្តិភាព និងសម្រេចបានការអភិវឌ្ឍគ្រប់វិស័យទាំងផ្នែកពុទ្ធចក្រនិងអាណាចក្រ។ សម្រាប់ផ្នែកពុទ្ធចក្រ ពុទ្ធសាសនាមានការរីកចម្រើនគួរឱ្យកត់សម្គាល់ ក្លាយជាកម្លាំងមួយដែលជួយពង្រឹងសង្គមកម្ពុជាមានសាមគ្គីភាព និងជាម្លប់សម្រាប់ប្រជាជនទូទាំងប្រទេស។

លោកអភិបាលស្រុកបានបន្តទៀតថា សមិទ្ធផលថ្មីមួយដែលកើតចេញពីការដឹកនាំកសាងរបស់ព្រះអង្គចៅអធិការវត្ត រួមទាំងកម្លាំងសទ្ធាជ្រះថ្លារបស់បងប្អូនពុទ្ធបរិស័ទប្រជាពលរដ្ឋទីជិតឆ្ងាយដែលបានចំណាយនូវថវិកាធនធានដើម្បីចូលរួមកសាងនូវសមិទ្ធផលនានាទាំងអស់នេះឡើងដើម្បីទុកជាប្រយោជន៍ក្នុងព្រះពុទ្ធសាសនា ដែលជាផ្នែកមួយក្នុងការពង្រឹងនៃអាយុកាលព្រះពុទ្ធសាសនាគ្រប់៥ពាន់ព្រះវស្សា។

សូមបញ្ជាក់ថាសមិទ្ធិផលដែលសម្ពោធឆ្លងនាពេលនេះរួមមាន៖ សាលាឆាន់ទំហំ២៥ម៉ែត្រគុណ២០ម៉ែត្រដោយចំណាយថវិកាអស់ចំនួន៣០ម៉ឺនដុល្លារអាមេរិក និងរបងប្រវែង៤០០ម៉ែត្រអំពូលសូឡា និងអណ្តូងទឹក ដោយចំណាយថវិកាចំនួន៣០៨៩០ដុល្លារសហរដ្ឋអាមេរិកផងដែរ៕

ដោយ ស៊ុម វណ្ណា