AKP កណ្ដាល ថ្ងៃទី០១ ខែមីនា ឆ្នាំ២០២៥-- ដើម្បីជួយលើកកម្ពស់ការយល់ដឹងផ្នែកច្បាប់ ការគោរពច្បាប់ ក្នុងជីវភាពប្រចាំថ្ងៃរបស់ប្រជាពលរដ្ឋ និងសិស្សានុសិស្ស និងសំដៅចូលរួមអនុវត្តគោលនយោបាយភូមិឃុំ សង្កាត់មានសុវត្ថិភាព លុបបំបាត់បញ្ហាគ្រឿងញៀន មន្ទីរអធិការកិច្ចខេត្តកណ្តាល នៅថ្ងៃទី២៨ ខែកុម្ភៈ ឆ្នាំ២០២៥ បានចុះផ្សព្វផ្សាយច្បាប់ស្តីពីការត្រួតពិនិត្យរគ្រឿងញៀន ជូនដល់សិស្សានុសិស្ស ជាង២៥០នាក់ នៅវិទ្យាល័យ សម្តេចអគ្គមហាធម្មពោធិសាល ជាស៊ីម ព្រែកអញ្ចាញ ស្រុកមុខកំពូល ដោយបានការអញ្ជើញចូលរួមពីលោក គា ប៊ុនថន ប្រធានមន្ទីរអធិការកិច្ចខេត្តកណ្ដាល លោក ហុង គីរី អភិបាលរងស្រុកមុខកំពូល និងអាជ្ញាធរពាក់ព័ន្ធផងដែរ។

លោក គា ប៊ុនថន បានមានប្រសាសន៍ថា បញ្ហាគ្រឿងញៀនបាន និងកំពុងរាតត្បាតនៅពាសពេញពិភពលោក ហើយបានទន្ទ្រានចូលមក ប្រទេសកម្ពុជា ដោយបានបង្កនូវគ្រោះមហន្តរាយធ្ងន់ធ្ងរជាច្រើន ចំពោះប្រជាពលរដ្ឋ ជាពិសេសយុវជន យុវនារី និងកុមារកម្ពុជា។ ដ៏រាបណាការចរាចរណ៍គ្រឿងញៀនខុសច្បាប់នៅតែកើតឡើង នោះផលវិបាកធ្ងន់ធ្ងរក៏នៅតែមានជានិច្ចចំពោះប្រទេសជាតិយើង ព្រោះថាវាបានបង្កឱ្យមានឧក្រិដ្ឋកម្មផ្សេងៗទៀតជាច្រើន។ គ្រឿងញៀន គឺជាអន្ទាក់ប្រកបដោយគ្រោះថ្នាក់សម្រាប់មនុស្សគ្រប់រូប ប្រសិនបើនរណាម្នាក់ធ្លាក់ចូលក្នុងអន្ទាក់នេះហើយ អ្នកនោះកម្រនឹងដកខ្លួនរួចណាស់ ហើយរមែងតែងតែផ្តល់ផលអាក្រក់ចំពោះអ្នកប្រព្រឹត្ត ដល់គ្រួសារ សហគមន៍ និងសង្គមជាតិ។ មានន័យថា មនុស្សដែលជុ្រលខ្លួនជាទាសករគ្រឿងញៀនហើយ មិនអាចស្វែងរកអនាគតភ្លឺស្វាងបានទេ មិនតែប៉ុណ្ណោះពួកគេនឹងបាត់បង់នូវក្តីស្រឡាញ់ គ្មានគោលដៅក្នុងជីវិត បាត់បង់សតិបញ្ញា ស្មារតី ក្លាយខ្លួនជាមនុស្ស ឯកោ វិកលចរិក និងឈានទៅរកសេចក្តីស្លាប់ដោយឥតន័យ។

ទន្ទឹមនឹងនេះ លោកប្រធានមន្ទីរក៏បានធ្វើការអំពាវនាវដល់គ្រប់ស្ថាប័នពាក់ព័ន្ធ ជាពិសេសអង្គភាពជំនាញ ត្រូវមានផែនការគ្រប់គ្រង និងអនុវត្តច្បាប់ឱ្យបានច្បាស់លាស់គ្រប់ជ្រុងជ្រោយ ព្រមទាំងជួយផ្សព្វផ្សាយបន្តដល់ប្រជាពលរដ្ឋឱ្យបានយល់ដឹងអំពីច្បាប់នេះឱ្យបានត្រឹមតែទូលំទូលាយ។ ជាងនេះទៅទៀត ប្អូនៗដែលជាសិស្សានុសិស្ស ត្រូវចៀសឱ្យឆ្ងាយពីគ្រឿងញៀន ពេលសេពគប់មិត្តភក្តិ ត្រូវមានការប្រុងប្រយ័ត្ន ហើយជាពិសេសត្រូវខិតខំរៀនសូត្រ ដើម្បីក្លាយខ្លួនទៅជាមិត្តល្អ សិស្សល្អ កូនល្អ និងដើម្បីធ្វើជាទំពាំងដ៏ល្អ ក្នុងការស្នងឫស្សីនាពេលអនាគត៕

ដោយ ណយ នឿន (ប្រភព៖ រដ្ឋបាលខេត្តកណ្តាល)