AKP ភ្នំពេញ ថ្ងៃទី២៨ ខែកុម្ភៈ ឆ្នាំ២០២៥--ឯកឧត្តមបណ្ឌិត មាស សារិន អគ្គលេខាធិការ សហព័ន្ធកីឡាទូកកានូ និងរ៉ូអ៊ីងកម្ពុជាបានដឹកនាំប្រតិភូជាក្រុមមន្រ្តី គ្រូបង្វឹកចូលជួបសម្តែងការគួរសម និងជូនពរចំពោះឯកឧត្តម នាយឧត្តមសេនីយ៍ ទៀ វិញ ក្នុងឱកាសដែលព្រះមហាក្សត្រត្រាស់បង្គាប់តែងតាំងមុខតំណែងជារដ្ឋលេខាធិការក្រសួងការពារជាតិ និងជូនចំពោះឯកឧត្តម ឧត្តមនាវីឯក ទៀ សុខា ក្នុងឱកាសដែលព្រះមហាក្សត្រត្រាស់បង្គប់តែងតាំងជាមេមញ្ជាការកងទ័ពជើងទឹក។

ឯកឧត្តម នាយឧត្តមសេនីយ៍ ទៀ វិញ ជាអនុប្រធានកិត្តិយស សហព័ន្ធកីឡាទូកកានូ និងរ៉ូអ៊ីងកម្ពុជា និងឯកឧត្តម ឧត្តមនាវីឯក ទៀ សុខា ជាអនុប្រធាន សហព័ន្ធកីឡាទូកកានូ និងរ៉ូអ៊ីងកម្ពុជា។ ការសម្តែងការគួរសម និងការជូនពរនេះត្រូវបានធ្វើឡើងនៅទីបញ្ជាការដ្ឋានកងទ័ពជើងទឹក ស្ថិតនៅខណ្ឌជ្រោយចង្វារ រាជធានីភ្នំពេញ នៅព្រឹកថ្ងៃទី២៨ ខែកុម្ភៈ ឆ្នាំ២០២៥។ នាឱកាសនោះ ឯកឧត្តមបណ្ឌិត មាស សារិន ក្នុងនាមជាអគ្គលេខាធិការ សហព័ន្ធកីឡាទូកកានូ និងរ៉ូអ៊ីងកម្ពុជាបានជូនពរ និងអបអរសាទរជូនចំពោះឯកឧត្តម នាយឧត្តមសេនីយ៍ ទៀ វិញ (អតីតមេបញ្ជាកងទ័ពជើងទឹក) ក្នុងឱកាសដែលត្រូវបានព្រះមហាក្សត្រត្រាស់បង្គាប់តែងតាំងទៅកាន់មុខតំណែងថ្មី ជារដ្ឋលេខាធិការ ក្រសួងការពារជាតិ ខណៈឯកឧត្តម ឧត្តមនាវីឯក ទៀ សុខា ត្រូវបានព្រះមហាក្សត្រត្រាស់បង្គាប់តែងតាំងមុខតំណែងជាមេបញ្ជាការកងទ័ពជើងទឹក។ ក្នុងនោះ ឯកឧត្តមអគ្គលេខាធិការបានជូនពរដល់ឯកឧត្តមទាំងពីររូបឱ្យទទួលបានសុខភាពល្អ និងជោគជ័យគ្រប់ភារកិច្ច ដែលរាជរដ្ឋាភិបាលកម្ពុជាប្រគល់ជូន ក្នុងការចូលរួមបម្រើជាតិមាតុភូមិ។

ជាមួយគ្នានេះ ឯកឧត្តមបណ្ឌិត មាស សារិន ក៏បានថ្លែងអំណរគុណ និងដឹងគុណយ៉ាងជ្រាលជ្រៅចំពោះការយកចិត្តទុកដាក់ខ្ពស់របស់ឯកឧត្តម នាយឧត្តមសេនីយ៍ ទៀ វិញ និងឯកឧត្តម ឧត្តមនាវីឯក ទៀ សុខា ដោយឯកឧត្តមទាំងពីររូបដែលបានរួមចំណែកផលិតបានធនធានកីឡាករ កីឡាការិនីទូកកងទ័ពជើងទឹក ដើម្បីរួមចំណែកចូលរួមការប្រកួតផ្សេងៗទាំងថ្នាក់ជាតិ និងអន្តរជាតិ។

ឯកឧត្តមអគ្គលេខាធិការបានចាត់ទុក អង្គភាពកងទ័ពជើងទឹក គឺជាសមាសភាពដ៏សំខាន់ ដែលតែងតែបានរួមចំណែកក្នុងដំណើការអភិវឌ្ឍវិស័យកីឡាទូក ក៏ដូចជាជួយជ្រោមជ្រែង ដល់ការផលិតធនធានកីឡាករ កីឡាការិនីទូកកងទ័ពជើងទឹក ប្រកបដោយសក្កានុពលខ្ពស់ៗជូនសហព័ន្ធកីឡាទូកកានូ និងរ៉ូអ៊ីងកម្ពុជា ព្រមទាំងបានយកធនធានអត្តពលិកទាំងនោះមកបំប៉នជាជម្រើសជាតិ ក្នុងការចូលរួមប្រកួតដណ្តើមមេដាយជូនជាតិមាតុភូមិពីការប្រកួតលើឆាកអន្តរជាតិជាបន្តបន្ទាប់ នាពេលកន្លងមក ក៏ដូចជាទិសដៅបន្ត នាពេលបច្ចុប្បន្ននេះផងដែរ៕

ដោយ ហេង ណាលីន