AKP ភ្នំពេញ ថ្ងៃទី២៨ ខែកុម្ភៈ ឆ្នាំ២០២៥ -- អាជ្ញាធរប្រទេសឡាវបានប្រកាសខេត្តសាយសំប៊ូននៅភាគកណ្តាលជាតំបន់ក្រហម បន្ទាប់ពីរកឃើញករណីជំងឺប៉េស្តជ្រូកអាហ្វ្រិក (ASF) នៅទីនោះ។

យោងតាមវិទ្យុជាតិឡាវបានឱ្យដឹងថា អាជ្ញាធរមូលដ្ឋានបានអះអាងពីវត្តមានរបស់ជំងឺ ASF នៅភូមិវ៉ាងហៃ ស្រុកថាំធំ ខេត្តសាយសំប៊ូន កាលពីថ្ងៃទី១៩ ខែកុម្ភៈ។

ជាការឆ្លើយតប មន្ត្រីជំនាញបានហាមឃាត់ការកែច្នៃ និងលក់សាច់ជ្រូកដែលមានមេរោគ ដើម្បីទប់ស្កាត់ការរីករាលដាលនៃជំងឺនេះ។

ជំងឺ ASF បង្កការគំរាមកំហែងយ៉ាងធ្ងន់ធ្ងរដល់ផលិតកម្មជ្រូក និងជីវភាពរស់នៅរបស់ប្រជាជនឡាវ។ អាជ្ញាធរកំពុងអំពាវនាវឱ្យមានការសម្របសម្រួលកិច្ចខិតខំប្រឹងប្រែងដើម្បីទប់ស្កាត់ និងលុបបំបាត់ការផ្ទុះឡើងនេះ រួមទាំងការឃ្លាំមើលឱ្យកាន់តែខ្ពស់នៅក្នុងភូមិមួយចំនួននៅទូទាំងខេត្តសាយសំប៊ូន និងខេត្តបូលីខាំសាយ។

ដើម្បីកាត់បន្ថយការខាតបង់ អាជ្ញាធរនឹងធ្វើការត្រួតពិនិត្យ និងប្រមូលសំណាកយកទៅវិភាគ។ កសិករត្រូវបានជំរុញឱ្យពង្រឹងវិធានការជីវសុវត្ថិភាព និងអនុវត្តតាមការរឹតបន្តឹងនានាដើម្បីជួយគ្រប់គ្រងការរីករាលដាល។

ជំងឺ ASF មិន​អាច​ចម្លង​ពី​សត្វ​ទៅ​មនុស្ស​បាន​ទេ ប៉ុន្តែ​វា​គ្រោះថ្នាក់​ខ្លាំង​ដល់​សត្វជ្រូក និងសត្វ​ជ្រូក​ព្រៃ ដោយ​មាន​អត្រា​ស្លាប់​ជិត ១០០%។ មេរោគនេះអាចរស់បានរហូតដល់ ៣ឆ្នាំក្នុងសាច់ក្លាសេ និងរហូតដល់មួយឆ្នាំក្នុងសាច់ស្ងួត ដែលទាមទារឱ្យមានសីតុណ្ហភាពខ្ពស់ទើបអាចសម្លាប់វាបាន៕

ដោយ៖ យា ចិន្ដាខន្ដី (ប្រភព៖ VNA)