AKP ភ្នំពេញ ថ្ងៃទី២៨ ខែកុម្ភៈ ឆ្នាំ២០២៥ -- ច្រកឆ្លងកាត់ព្រំដែនសម្រាប់អ្នកដំណើរតាមផ្លូវគោកមួយទៀតត្រូវបានបើកដំណើរការរវាងប្រទេសចិន និងវៀតណាម ដើម្បីជំរុញកិច្ចសហប្រតិបត្តិការទ្វេភាគី និងការផ្លាស់ប្ដូរប្រជាជនទៅប្រជាជន។

ច្រកឆ្លងកាត់ព្រំដែនសម្រាប់អ្នកដំណើរដែលតភ្ជាប់កំពង់ផែ Dongzhong របស់ប្រទេសចិន និងកំពង់ផែ Hoanh Mo របស់ប្រទេសវៀតណាម ត្រូវបានរចនាឡើងដើម្បីផ្ទុកអ្នកដំណើរឆ្លងកាត់ចំនួន ៥០០.០០០នាក់ប្រចាំឆ្នាំ និងការធ្វើដំណើរតាមរថយន្តដឹកអ្នកដំណើរចំនួន ៣០.០០០នាក់ ដែលធ្វើឱ្យមានកិច្ចសហប្រតិបត្តិការក្នុងការផ្លាស់ប្តូរបុគ្គលិក ដំណើរទស្សនកិច្ចទេសចរណ៍ និងពាណិជ្ជកម្មរវាងប្រទេសចិន និងវៀតណាម។

កំពង់ផែ Dongzhong របស់ប្រទេសចិន ស្ថិតនៅក្នុងទីក្រុងហ្វាងចេងហ្គាង នៃតំបន់ស្វយ័ត Guangxi Zhuang ភាគខាងត្បូងប្រទេសចិន ត្រូវបានបំបែកចេញពីកំពង់ផែ Hoanh Mo ក្នុងខេត្តឈួងនីញ ប្រទេសវៀតណាម ដោយទន្លេ និងបម្រើជាផ្លូវគោកដ៏សំខាន់មួយរបស់ប្រទេសចិន ទៅកាន់សមាគមប្រជាជាតិអាស៊ីអាគ្នេយ៍ (អាស៊ាន)។ កំពង់ផែ​នេះ​ពីមុន​មិន​បាន​បើក​សម្រាប់​ភ្ញៀវ​ទេសចរ​ចេញ​ចូល​ទេ។

ប្រទេសចិនមានកំពង់ផែដីគោកជាច្រើនដែលអាចឆ្លងទៅកាន់ប្រទេសវៀតណាមតាមព្រំដែនក្នុងខេត្តគ័ងស៊ី និងខេត្តយ៉ុនណាន។

ចាប់តាំងពីខែវិច្ឆិកា ឆ្នាំ២០២៣ មក ប្រទេសចិនបានបន្តកែសម្រួល និងបង្កើនប្រសិទ្ធភាពគោលនយោបាយឆ្លងកាត់ដោយគ្មានទិដ្ឋាការរបស់ខ្លួន ដើម្បីបង្កើនភាពបើកចំហ និងការផ្លាស់ប្តូរពីប្រជាជនទៅប្រជាជន។ ក្នុងការផ្លាស់ប្តូរថ្មីៗនេះ ដើម្បីបង្កើនកិច្ចសហប្រតិបត្តិការទេសចរណ៍ជាមួយបណ្តាប្រទេសអាស៊ាន ក្រុមទេសចរណ៍មកពីបណ្តាប្រទេសអាស៊ានត្រូវបានអនុញ្ញាតឱ្យទៅទស្សនាតំបន់ Xishuangbanna ដែលជាតំបន់ទេសចរណ៍ដ៏ពេញនិយមនៅក្នុងខេត្តយូណាន ដោយមិនបាច់មានទិដ្ឋាការរយៈពេល ៦ថ្ងៃ៕

ដោយ៖ មូល មិនា (ប្រភព៖ ភីបផលដេលី)