AKP ភ្នំពេញ ថ្ងៃទី២៨ ខែកុម្ភៈ ឆ្នាំ២០២៥ -- រដ្ឋមន្ត្រីការបរទេសកូរ៉េខាងត្បូង លោក ចូ តេយុល (Cho Tae-yul) នឹងធ្វើដំណើរទៅកាន់ប្រទេសប៉ូឡូញ និងបារាំងនៅសប្តាហ៍ក្រោយ ដើម្បីពិភាក្សាអំពីកិច្ចសហប្រតិបត្តិការទ្វេភាគីក្នុងវិស័យនានា រួមទាំងឧស្សាហកម្មការពារជាតិផងដែរ។

ក្រសួងការបរទេសបាននិយាយថា លោក ចូ នឹងធ្វើដំណើរទៅកាន់ប្រទេសប៉ូឡូញនៅថ្ងៃអង្គារសម្រាប់ដំណើរទស្សនកិច្ចផ្លូវការលើកដំបូងរបស់រដ្ឋមន្ត្រីការបរទេសកូរ៉េខាងត្បូងទៅកាន់ប្រទេសនេះក្នុងរយៈពេល ១៨ឆ្នាំ ហើយនឹងជួបពិភាក្សាជាមួយរដ្ឋមន្ត្រីការបរទេសប៉ូឡូញ លោក រ៉ាដូស្លាវ ស៊ីករស្គី (Radoslaw Sikorski) នៅថ្ងៃបន្ទាប់។

រដ្ឋមន្ត្រីទាំងពីរនឹងពិភាក្សាអំពីវិធីជំរុញទំនាក់ទំនងទ្វេភាគីក្នុងវិស័យផលិតកម្មការពារជាតិ ថាមពល ហេដ្ឋារចនាសម្ព័ន្ធ និងវិស័យផ្សេងៗទៀត ព្រមទាំងផ្លាស់ប្តូរទស្សនៈលើបញ្ហាតំបន់ និងពិភពលោក ដូចជាស្ថានភាពនៅឧបទ្វីបកូរ៉េ និងសង្គ្រាមរុស្ស៊ីជាមួយអ៊ុយក្រែនជាដើម។

បច្ចុប្បន្នប្រទេសទាំងពីរកំពុងដំណើរការកិច្ចសន្យាបន្ទាប់ពីឧស្សាហកម្មការពារជាតិរបស់ប្រទេសកូរ៉េខាងត្បូងបានចុះហត្ថលេខារួមគ្នាលើកិច្ចព្រមព្រៀងក្របខ័ណ្ឌដែលមានតម្លៃប្រហែល ៤៤,២ប៊ីលានដុល្លារអាម៉េរិកជាមួយប្រទេសប៉ូឡូញក្នុងខែកក្កដា ឆ្នាំ២០២២ សម្រាប់ការនាំចេញអាវុធ។

ក្នុងអំឡុងពេលស្នាក់នៅប្រទេសប៉ូឡូញ លោក ចូ ក៏នឹងចូលជួបសម្តែងការគួរសមជាមួយប្រធានាធិបតីប៉ូឡូញ លោក អានដ្រេច ឌូដា (Andrzej Duda) និងទស្សនាមូលដ្ឋានទ័ពអាកាស Minsk Mazowiecki របស់ប្រទេស។

នៅថ្ងៃទី៧ ខែមីនា លោក ចូ នឹងជួបពិភាក្សាជាមួយរដ្ឋមន្ត្រីការបរទេសបារាំង លោក ជីន នូអែល បាររ៉ុត (Jean-Noel Barrot) នៅប្រទេសបារាំង ដើម្បីពិភាក្សាអំពីកិច្ចសហប្រតិបត្តិការលើវិស័យឧស្សាហកម្មការពារជាតិ ក៏ដូចជាវិស័យអវកាស បញ្ញាសិប្បនិម្មិត និងវិស័យផ្សេងៗទៀត។

ក្រសួងបាននិយាយថា ពួកគេក៏នឹងពិភាក្សាអំពីបញ្ហាសន្តិសុខក្នុងតំបន់ និងអន្តរជាតិ ហើយបញ្ជាក់ឡើងវិញនូវកិច្ចសហប្រតិបត្តិការរបស់រដ្ឋាភិបាលរបស់ពួកគេ ដើម្បីរៀបចំព្រឹត្តិការណ៍រួមគ្នាប្រកបដោយជោគជ័យនៅឆ្នាំក្រោយ ដើម្បីអបអរសាទរខួបលើកទី១៤០ នៃការបង្កើតទំនាក់ទំនងការទូតរវាងប្រទេសទាំងពីរ។

ក្រសួងក៏បានបង្ហាញផងដែរថា លោក ចូ គ្រោងនឹងជួបពិភាក្សាជាមួយឧបនាយករដ្ឋមន្ត្រី និងជារដ្ឋមន្ត្រីការបរទេសនូវែលសេឡង់ លោក វីនស្តុន ផេទឺស៍ (Winston Peters) ក្នុងទីក្រុងសេអ៊ូល នៅថ្ងៃសុក្រ ដើម្បីពិភាក្សាអំពីវិធានការជំរុញកិច្ចសហប្រតិបត្តិការលើវិស័យការពារជាតិ សន្តិសុខ សេដ្ឋកិច្ច អវកាស វិទ្យាសាស្ត្រ និងវិស័យផ្សេងៗទៀត៕

ដោយ៖ មូល មិនា (ប្រភព៖ យ៉ុនហាប់)