AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៥-- គណៈប្រតិភូស្នងការនគរបាលខេត្តបាត់ដំបង កាលពីថ្ងៃទី២៦ ខែកុម្ភៈ ឆ្នាំ២០២៥ បានចុះសំណេះសំណាលសួរសុខទុក្ខ និងបាននាំយកអំណោយរបស់ស្នងការនគរបាលខេត្តបាត់ដំបង ជូនដល់កម្លាំងចុះបេសកកម្មបង្រ្កាបបទល្មើសនេសាទខុសច្បាប់នៅក្នុងភូមិសាស្រ្តយោធភូមិភាគទី៥ ជាមួយនាយទាហាន នាយទាហានរង និងពលទាហាន ដែលឈរជើងការពារបទល្មើសនេសាទខុសច្បាប់នៅ ឃុំកំពង់លួង ស្រុកក្រគរ ខេត្តពោធិ៍សាត់។

ឯកឧត្តម ឧត្តមសេនីយ៍ទោ សេង ធារិន បានថ្លែងកោតសរសើរចំពោះគណៈប្រតិភូស្នងការនគរបាលខេត្តបាត់ដំបង យកចិត្តទុកដាក់ដល់កងកម្លាំងទាំងអស់ដែលកំពុងបំពេញភារកិច្ចប្រកបដោយស្មារតីទទួលខុសត្រូវខ្ពស់ក្នុងការការពារទប់ស្កាត់ និងបង្ក្រាបបទល្មើសនេសាទ ទទួលបានលទ្ធផលល្អគួរជាទីមោទនៈ និងកំពុងបន្តសកម្មភាពឱ្យដូចភ្លៀងរលឹមដាច់ខាតមិនឱ្យមានបទល្មើសនេសាទ កើតមានឡើងជាថ្មីទៀតបានឡើយ។  កងយោធពលខេមរភូមិន្ទត្រូវតែស្មោះត្រង់ក្នុងភារកិច្ចរបស់ខ្លួន ដោយមិនត្រូវចូលរួមឃុបឃិតជាមួយជនប្រព្រឹត្តបទល្មើសជាដាច់ខាត។  ក្នុងករណីមានយោធិនណាម្នាក់ប្រព្រឹត្តផ្ទុយពីបទបញ្ជានេះ ត្រូវទទួលវិន័យតាមច្បាប់លក្ខន្តិកៈរបស់កងយោធពលខេមរភូមិន្ទ និងច្បាប់របស់រដ្ឋ ដោយគ្មានការលើកលែងឡើយ។

ក្នុងឱកាសសាកសួរសុខទុក្ខ សំណេះសំណាល គណៈប្រតិភូស្នងការនគរបាលខេត្តបាត់ដំបង បានយកអំណោយរបស់ស្នងការនគរបាលខេត្តបាត់ដំបងមួយចំនួន រួមមាន ទឹកត្រី ចំនួន ៥០យួរ ទឹកស៊ីអ៊ីវចំនួន៥០យួរ មីចំនួន៣០កេស សាច់គោចំនួន១០០គីឡូក្រាម អង្ករចំនួន១០០០គីឡូក្រាម ទឹកសុទ្ធ ចំនួន ១០០កេស និងថវិកាចំនួន ២ ០០០ ០០០រៀល ផងដែរ៕

ដោយ ណយ នឿន (ប្រភព៖ កងទ័ពជើងគោក)