AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៥ -- ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃពុធថា មេដឹកនាំកូរ៉េខាងជើង លោក គីម ជុងអ៊ុន (Kim Jong-un) បានទៅទស្សនាសាលាយោធាក្នុងទីក្រុងព្យុងយ៉ាង ដោយលោកបានសង្កត់ធ្ងន់លើតម្រូវការក្នុងការអប់រំទាហានអំពី «បទពិសោធន៍ជាក់ស្តែងនៃសង្គ្រាមទំនើប» និងធ្វើជាម្ចាស់អាវុធទំនើបៗ។

ទីភ្នាក់ងារសារព័ត៌មានមជ្ឈិមកូរ៉េ (KCNA) បាននិយាយថា លោកគីម បានត្រួតពិនិត្យសាលាយោធា Kang Kon ដែលជាមជ្ឈមណ្ឌលបណ្តុះបណ្តាលមេបញ្ជាការដ៏មានកិត្យានុភាពបំផុតកាលពីថ្ងៃមុន ដែលជាថ្ងៃទីពីរនៃដំណើរទស្សនកិច្ចទៅកាន់ស្ថាប័នអប់រំយោធាមួយ។

កាលពីថ្ងៃចន្ទ លោក គីម បានត្រួតពិនិត្យសាកលវិទ្យាល័យនយោបាយ គីម អ៊ីលស៊ុង (Kim Il Sung) ដោយលោកបានសង្កត់ធ្ងន់លើគោលការណ៍ «មនោគមវិជ្ជា-ទីមួយ» និងភាពស្មោះត្រង់ក្នុងការកសាងយោធាដ៏មានឥទ្ធិពល។

ទីភ្នាក់ងារ KCNA រាយការណ៍ថា ក្នុងអំឡុងពេលអធិការកិច្ចកាលពីថ្ងៃអង្គារ លោក គីម បានសំដៅទៅលើស្ថានភាពអន្តរជាតិបច្ចុប្បន្ន ដោយលោកបាននិយាយថា «ចរិតឆេវឆាវ និងបះបោររបស់ចក្រពត្តិនិយមត្រូវបានសម្តែងដោយបើកចំហខ្លាំងបំផុត» ខណៈដែល «សង្រ្គាម និងការបង្ហូរឈាមក្លាយជារឿងធម្មតា»។

លោក គីម បានដាក់ចេញនូវភារកិច្ច «ពង្រឹងការអប់រំដែលផ្តោតលើការអនុវត្តយោធា» និងធានាថានិស្សិតទាំងអស់បាន «រៀនអំពីបទពិសោធន៍ជាក់ស្តែងនៃសង្គ្រាមសម័យទំនើប» ហើយ «ធ្វើជាម្ចាស់លើអាវុធទំនើបៗប្រយុទ្ធ និងឧបករណ៍បច្ចេកទេស និងទទួលបានសមត្ថភាពបញ្ជាដែលត្រូវគ្នាទៅនឹងសង្គ្រាមទំនើប»។

ការកត់សម្គាល់នេះបានកើតឡើងចំពេលមានការព្រួយបារម្ភថា ការដាក់ពង្រាយកងទ័ពរាប់ពាន់នាក់របស់ប្រទេសកូរ៉េខាងជើង ដើម្បីជួយគាំទ្ររុស្ស៊ីក្នុងសង្គ្រាមរបស់ខ្លួនប្រឆាំងនឹងអ៊ុយក្រែន អាចអនុញ្ញាតឱ្យកូរ៉េខាងជើងទទួលបានបទពិសោធន៍ក្នុងសង្គ្រាមសម័យទំនើប៕

ដោយ៖ មូល មិនា (ប្រភព៖ យ៉ុនហាប់)