AKP ភ្នំពេញ ថ្ងៃទី២៧ ខែកុម្ភៈ ឆ្នាំ២០២៥ -- ក្រសួងបាននិយាយកាលពីថ្ងៃពុធថា អនុរដ្ឋមន្ត្រីការបរទេសកូរ៉េខាងត្បូង បានសង្កត់ធ្ងន់ថា ការបង្កើនកិច្ចសហប្រតិបត្តិការយោធារវាងរុស្ស៊ី និងកូរ៉េខាងជើងកំពុងធ្វើឱ្យមានភាពស្មុគស្មាញបន្ថែមទៀតដល់ស្ថានភាពសិទ្ធិមនុស្សដ៏ធ្ងន់ធ្ងររួចទៅហើយនៅក្នុងរបបផ្តាច់ការ។

អនុរដ្ឋមន្ត្រីការបរទេសទីពីរ លោកស្រី កាង អ៊ីនស៊ុន (Kang In-sun)បានធ្វើការកត់សម្គាល់ក្នុងអំឡុងកិច្ចប្រជុំកម្រិតកំពូលនៃក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវកាលពីថ្ងៃអង្គារ(ម៉ោងក្នុងតំបន់) ចំពេលមានទំនាក់ទំនងយោធាកាន់តែស៊ីជម្រៅរវាងទីក្រុងមូស្គូ និងទីក្រុងព្យុងយ៉ាង ជាមួយនឹងការដាក់ពង្រាយកងទ័ពរបស់កូរ៉េខាងជើងដើម្បីគាំទ្រដល់សង្រ្គាមរបស់រុស្ស៊ីនៅអ៊ុយក្រែន។

ក្រសួងបាននិយាយថា «ខ្លួនបានសម្តែងការព្រួយបារម្ភជាបន្តលើស្ថានភាពសិទ្ធិមនុស្សដ៏ធ្ងន់ធ្ងររបស់ប្រទេសកូរ៉េខាងជើង ដោយក្រសួងបានគូសបញ្ជាក់អំពីបញ្ហាកំពុងជាប់ពាក់ព័ន្ធកាន់តែខ្លាំងជាមួយនឹងសន្តិភាព និងសន្តិសុខអន្តរជាតិ ជាពិសេសដោយសារតែកិច្ចសហប្រតិបត្តិការយោធាខុសច្បាប់របស់ខ្លួនជាមួយរុស្ស៊ី»។

លោកស្រី កាង ក៏បានសម្តែងការព្រួយបារម្ភចំពោះទង្វើអមនុស្សធម៌លើជនភៀសខ្លួនកូរ៉េខាងជើងដែលត្រូវបានធ្វើមាតុភូមិនិវត្តន៍ដោយបង្ខំដោយលោកស្រីអំពាវនាវឱ្យប្រទេសនានាគោរពតាមគោលការណ៍អន្តរជាតិនៃការមិនបង្ខំជនភៀសខ្លួនឱ្យត្រឡប់ទៅប្រទេសដែលពួកគេប្រឈមមុខនឹងហានិភ័យនៃការធ្វើទុក្ខបុកម្នេញ។

លោកស្រីក៏បានជំរុញឱ្យប្រទេសកូរ៉េខាងជើងដោះលែងអ្នកជាប់ឃុំកូរ៉េខាងត្បូងជាបន្ទាន់នៅក្នុងប្រទេសកូរ៉េខាងជើង ហើយផ្តល់ដំណោះស្រាយចំពោះបញ្ហានៃការចាប់ពង្រត់អ្នកទោសទាំងអស់ និងអ្នកទោសសង្គ្រាមកូរ៉េខាងត្បូង។

ពេលនៅទីក្រុងហ្សឺណែវ លោកស្រី កាង បានជួបជាមួយមន្ត្រីសំខាន់ៗនៃស្ថាប័នពាក់ព័ន្ធរបស់អង្គការសហប្រជាជាតិ រួមទាំងលោក ហ្វីលីពប៉ូ ហ្គ្រេនឌី (Filippo Grandi) ស្នងការនៃឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងលោកស្រី ណាណា អាល់ ណាស៊ីហ្វ (Nada al-Nashif) ស្នងការរងជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស៕

ដោយ៖ មូល មិនា (ប្រភព៖ យ៉ុនហាប់)