AKP ភ្នំពេញ  ថ្ងៃទី២៧ ខែកុម្ភៈ ឆ្នាំ២០២៥--លោកឧត្តមសេនីយ៍ទោ ប៉ាន់ សុវណ្ណារិទ្ធ ប្រធាននាយកដ្ឋាននីតិកម្ម ផែនការ និងបណ្តុះបណ្តាលនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ថា អាស៊ានបានរួមគ្នាពង្រឹងសមត្ថភាពអភិវឌ្ឍន៍គម្រោងប្រតិបត្តិការអាស៊ានប្រយុទ្ធប្រឆាំងគ្រឿងញៀនតំបន់។ ការលើកឡើងបែបនេះក្រោយទទួលបានការអនុញ្ញាតពីឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ដឹកនាំប្រតិភូជាមន្រ្តីជំនាញពីបណ្តាគ្រប់នាយកដ្ឋាន មន្ទីរពិសោធន៍ចំណុះអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនចូលរួមសិក្ខាសាលាលើកទី៣ស្តីពីការអភិវឌ្ឍន៍គម្រោងផែនការកិច្ចសហប្រតិបត្តិការអាស៊ានសម្រាប់មន្ត្រីបង្គោលនៃកិច្ចប្រជុំមន្ត្រីជាន់ខ្ពស់អាស៊ានស្តីពីបញ្ហាគ្រឿងញៀន (ASOD) ដែលជាកិច្ចប្រជុំតាមប្រព័ន្ធអនឡាញមានប្រទេសហ្វីលីពីនជាម្ចាស់ផ្ទះនិងមានការអញ្ជើញចូលរួមពីបណ្តាប្រទេសអាស៊ានទាំងអស់ និងលេខាធិការដ្ឋានអាស៊ាន នាថ្ងៃទី២៦ ខែកុម្ភៈ ឆ្នាំ២០២៥។

ជាមួយគ្នានេះដែរ លោកឧត្តមសេនីយ៍ទោ ប៉ាន់ សុវណ្ណារិទ្ធ បានថ្លែងបញ្ជាក់បន្ថែមថា សិក្ខាសាលានេះរៀបចំឡើងក្នុងគោលបំណងគឺផ្ដល់ចំណេះដឹងស្ដីពីការអភិវឌ្ឍន៍និងអនុវត្តការរៀបចំគម្រោងកិច្ចសហប្រតិបត្តិការអាស៊ាន ACP រួមមាន:ការរៀបចំលើកឡើងនូវមូលនិធិគម្រោងនិងធនធានដែលកៀរគរបានពីដៃគូនានាដើម្បីគាំទ្រដល់យន្តការនៃការលើកសំណើគម្រោងកិច្ចសហប្រតិបត្តិការអាស៊ានពាក់ព័ន្ធនឹងការងារប្រយុទ្ធប្រឆាំងគ្រឿងញៀនក្នុងតំបន់៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន