AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៥--

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នារសៀល ថ្ងៃទី២៦ ខែកុម្ភៈ ឆ្នាំ២០២៥នេះ អញ្ជើញជាអធិបតី ក្នុងពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ នៅវិទ្យាស្ថានបច្ចេកវិទ្យាកម្ពុជា។

ក្នុងរយៈពេលជាង១ឆ្នាំកន្លះនៃការអនុវត្តយុទ្ធសាស្ត្របញ្ចកោណ-ដំណាក់កាលទី១ ដែល មានមុំទី១ របស់រាជរដ្ឋាភិបាល នីតិកាលទី៧នៃរដ្ឋសភា ក្រសួងអប់រំ យុវជន និងកីឡាបាន អនុវត្តកម្មវិធីកែទម្រង់ មានដូចខាងក្រោម៖
ទី១៖ ការបន្តពង្រឹងគុណភាពអប់រំ និងការបណ្តុះបណ្តាលគ្រប់កម្រិត, ការធ្វើបច្ចុប្បន្ន កម្មកម្មវិធីសិក្សានៅគ្រប់កម្រិត, និងការបង្កើតបរិយាកាសល្អសម្រាប់ការសិក្សាពេញមួយជីវិត។
ក្រសួងបានយកចិត្តទុកដាក់ជាប្រចាំពង្រឹងគុណភាពអប់រំគ្រប់កម្រិតថ្នាក់ ដោយផ្តោត លើការអភិវឌ្ឍសមត្ថភាពគ្រូបង្រៀន ការគ្រប់គ្រងនៅតាមសាលារៀន ដោយផ្តោតលើស្តង់ដា សាលារៀនគំរូ ការចុះអធិការកិច្ចអប់រំ ការអនុវត្តតេស្តស្តង់ដាតាមសាលារៀនបានទៀងទាត់ និង ចាត់វិធានការជួយសិស្សរៀនយឺត។ ជាក់ស្តែង ភាគរយសិស្សប្រឡងជាប់មធ្យមសិក្សាទុតិយភូមិ កើនពី ៧២,៩% នៅឆ្នាំសិក្សា ២០២២-២០២៣ ដល់ ៧៩% នៅឆ្នាំសិក្សា ២០២៣- ២០២៤។ ភាគរយសិស្សប្រឡងជាប់មធ្យមសិក្សាបឋមភូមិ កើនពី ៩៤,៥% នៅឆ្នាំសិក្សា ២០២២-២០២៣ ដល់ ៩៦,២៧% នៅឆ្នាំសិក្សា ២០២៣-២០២៤។

ក្រសួងបានប្រែក្លាយមជ្ឈមណ្ឌលសិក្សាសហគមន៍ជាមជ្ឈមណ្ឌលសិក្សាពេញមួយជីវិត ចំនួន ៣៣ និង បានទទួលស្គាល់មជ្ឈមណ្ឌលសិក្សាពេញមួយជីវិតចំនួន១ ជាមជ្ឈមណ្ឌល សិក្សាពេញមួយជីវិតគំរូ (ស្រែក្នុង) នៅខេត្តកំពត។ មជ្ឈមណ្ឌលសិក្សាសហគមន៍ ៣៣៨ មាន អ្នកសិក្សា ១០ ០២៧នាក់ ស្រី ៦ ២៦៧ នាក់។
ទី២៖ ការបន្តកែទម្រង់សាលារៀន ដោយផ្តោតលើការពង្រឹងសមិទ្ធផល ដែលមាន ស្រាប់, ការជំរុញការបង្កើតសាលារៀនជំនាន់ថ្មី និងសាលាគំរូ, ការពង្រឹងអភិបាលកិច្ច និង ប្រសិទ្ធភាពគ្រប់គ្រងនៅមន្ទីរអប់រំ យុវជន និងកីឡា, ព្រមទាំងការជំរុញការចូលរួម និងភាពជា ម្ចាស់របស់មាតាបិតា, សហគមន៍ និងវិស័យឯកជន។
ក្រសួងបានពង្រីកសាលារៀនគំរូ ដែលមាន៥ស្តង់ដា ផ្តោតលើ៖ ១. លទ្ធផលសិក្សារបស់ សិស្ស ២. ការបង្រៀន និងរៀន ៣. ការចូលរួមរបស់សហគមន៍ ៤. ដំណើរការប្រតិបត្តិការ និង រដ្ឋបាលសាលារៀន ៥. គណនេយ្យភាពរបស់សាលារៀន។ សាលារៀនគំរូបានកើនដល់ ២៦៤ នៅកម្រិតមត្តេយ្យសិក្សា បឋមសិក្សា មធ្យមសិក្សា និងសាលាគរុកោសល្យ។ សាលារៀនជំនាន់ ថ្មីបានកើនដល់ ១៣ (បឋមសិក្សា ៤ និងមធ្យមសិក្សា ៩) ជាមួយនឹងលទ្ធផលសិក្សារបស់សិស្សប្រឡងជាប់សញ្ញាបត្រមធ្យមសិក្សាទុតិយភូមិ និងសិស្សនិទ្ទេស A បានកើនឡើងធៀប នឹងឆ្នាំកន្លងមក។

ទី៣៖ ការពង្រឹងគុណភាពនៃការបណ្តុះបណ្តាលគ្រូបង្រៀន និងវិធីសាស្ត្របង្រៀន ព្រម ទាំងការបន្តលើកកម្ពស់ជីវភាព និងគុណតម្លៃបុគ្គលិកសិក្សាគ្រប់កម្រិត។
ក្រសួងបានអភិវឌ្ឍកម្មវិធីសិក្សាដែលផ្តល់ចំណេះដឹង និងបំណិនគរុកោសល្យបង្រៀន សម្រាប់សតវត្សទី២១ ដល់គរុនិស្សិត, កែទម្រង់នៃការបណ្តុះបណ្តាលគ្រូកម្រិតឧត្តម បរិញ្ញាបត្រ+១ មកជាគ្រូកម្រិតឧត្តមបរិញ្ញាបត្រ+២, កែទម្រង់នៃការបណ្តុះបណ្តាលគរុនិស្សិត បឋមសិក្សា(១២+៤) និងកម្រិតមូលដ្ឋាន (១២+៤) និង (បរិញ្ញាបត្រ+១) នៅវិទ្យាស្ថាន គរុកោសល្យរាជធានីភ្នំពេញ និងបាត់ដំបង និងធ្វើវិក្រឹតការគ្រូបង្រៀនអប់រំពិសេសមកពី វិទ្យា ល័យអប់រំពិសេសទាំង ៥ ចំនួន ១១៨នាក់ ស្រី ៥៧នាក់ ទៅលើជំនាញគថ្លង់ និងពិការភ្នែក។
ក្រសួងបានកំពុងរៀបចំក្របខ័ណ្ឌកម្មវិធីបណ្តុះបណ្តាលបរិញ្ញាបត្រ+១ សម្រាប់បណ្តុះ បណ្តាលគ្រូបឋមសិក្សា, កំពុងរៀបចំកម្មវិធីសិក្សាថ្នាក់បរិញ្ញាបត្រជាន់ខ្ពស់សម្រាប់គ្រូឧទ្ទេស ផ្នែកបឋមសិក្សា, បានបណ្តុះបណ្តាលគ្រូឧទ្ទេសនៅសាលាគរុកោសល្យឱ្យទទួលបានសញ្ញាបត្រ បរិញ្ញាបត្រអប់រំបឋមសិក្សាចំនួន ៦៧នាក់ ស្រី ៣២នាក់ និងសញ្ញាបត្របរិញ្ញាបត្រជាន់ខ្ពស់ តាមឯកទេស ៧៣នាក់ ស្រី ១១នាក់។

ក្រសួងបានផ្តល់ប្រាក់កម្រៃឧបត្ថម្ភប្រចាំខែ ៧០% នៃបៀវត្សសរុបតាមក្របខ័ណ្ឌ នីមួយៗ ដល់គរុសិស្ស គរុនិស្សិត និងសិស្សមន្ត្រី។ គរុសិស្សបឋមសិក្សា និងមធ្យមសិក្សាបណ្តុះ បណ្តាលតាមប្រព័ន្ធ (១២+៤) និងបរិញ្ញាបត្រ+១ ទទួលបានក្របខ័ណ្ឌ «ក» ក្រោយពីបញ្ចប់ វគ្គបណ្តុះបណ្តាលដោយជោគជ័យ។ បេក្ខជនមត្តេយ្យសិក្សា និងបឋមសិក្សា (១២+២) ដែល ប្រឡងប្រជែងជាប់ស្ថាពរ និងមានសញ្ញាបត្របរិញ្ញាបត្រឡើងទៅ នៅពេលចុះឈ្មោះប្រឡង ប្រជែង នឹងទទួលបានក្របខ័ណ្ឌប្រភេទ «ក»។
ទី៤៖ ការបន្តលើកកម្ពស់ការអប់រំឌីជីថល, ការអភិវឌ្ឍហេដ្ឋារចនាសម្ព័ន្ធឌីជីថលតាម សាលារៀន, និងការជំរុញការចាប់យកមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម សិល្បៈ និង គណិតវិទ្យា (STEAM)។

ក្រសួងបានរៀបចំយុទ្ធសាស្ត្រអប់រំឌីជីថលសម្រាប់សាលារៀន, លើកកម្ពស់អក្ខរកម្ម ឌីជីថល អភិវឌ្ឍខ្លឹមសារ និងវេទិកា តាមរយៈការអនុវត្តប្រព័ន្ធគ្រប់គ្រងការសិក្សា, ផ្សព្វផ្សាយ កម្មវិធីតម្រង់ទិសសិក្សា (មគ្គុទ្ទេសក៍អាជីព និងការផ្តល់ប្រឹក្សាតាមប្រព័ន្ធអនឡាញ «កម្មវិធី ត្រីវិស័យ»), វិនិយោគលើហេដ្ឋារចនាសម្ព័ន្ធសម្រាប់បច្ចេកវិទ្យាឌីជីថល, បង្កើត និងកែសម្រួលកម្មវិធីបណ្តុះបណ្តាលលើមុខជំនាញផ្នែកបច្ចេកវិទ្យាឌីជីថល, ពង្រីកនិងប្រើប្រាស់ផ្ទាលឌីជីថល សម្រាប់ការបង្រៀន និងរៀន។ ជាលទ្ធផល ថ្នាលអភិវឌ្ឍសមត្ថភាពវិជ្ជាជីវៈជាប្រចាំ បង្កើត វគ្គសិក្សា ១០វគ្គ អ្នកប្រើប្រាស់ ២៤ ៥៦៩នាក់ ស្រី ១២ ០០៣នាក់, សាលាឌីជីថលមាន ៤៨៥សាលា, ចំនួនអ្នកចូលប្រើប្រាស់ថ្នាលសាលាឌីជីថល ៩៦ ២៦០នាក់។ គិតត្រឹមថ្ងៃទី ៣១ ខែមករា ឆ្នាំ ២០២៥ ចំនួនអ្នកប្រើប្រាស់ កម្មវិធី «ត្រីវិស័យ» គណនីប្រើប្រាស់សរុបចំនួន ១២៤ ៥៣៩គណនី ក្នុងនោះគណនីជាស្ត្រីចំនួន ៥៧ ៨៦១គណនី និងមានអ្នកចូលទស្សនា ចំនួន ៤៤៣ ៨០៧ដង។
ក្រសួងបានយកចិត្តទុកដាក់ពង្រីកការសិក្សាតាមប្រព័ន្ធអនឡាញ។ កម្មវិធីសមមូលអប់រំ កម្រិតមូលដ្ឋានតាមអ៊ីនធឺណិត មានអ្នកសិក្សាបានបញ្ចប់ ៤៨២ នាក់ ស្រី ៤០%។ ភាគរយនិស្សិតសិក្សាជំនាញស្ទែមមានចំនួន ៣៣,៧៨ ភាគរយ ក្នុងនោះនិស្សិតស្រីមាន ២៣,២៥ ភាគរយ និងប្រុសមាន ៤៧,៩១ ភាគរយ។
ទី៥៖ ការលើកកម្ពស់សុខភាពសិក្សា និងការបង្កើនអាហារូបករណ៍សម្រាប់សិស្ស- និស្សិតក្រីក្រ និងងាយរងគ្រោះ។

រាជរដ្ឋាភិបាលកម្ពុជាបានដាក់ឱ្យអនុវត្តគោលនយោបាយជាតិស្តីពី ការផ្តល់អាហារតាម សាលារៀន ឆ្នាំ២០២៤-២០៣៥ ដើម្បីចូលរួមចំណែកក្នុងការអភិវឌ្ឍសង្គម-សេដ្ឋកិច្ចកម្ពុជា ស្របតាមក្របខ័ណ្ឌគោលនយោបាយជាតិគាំពារសង្គម។ គិតចាប់ពីឆ្នាំ ២០១៩ រហូតមកដល់ ឆ្នាំ២០២៤ កម្មវិធីផ្តល់អាហារតាមសាលារៀននៅកម្ពុជា មានសាលារៀនគោលដៅសរុបចំនួន ១,១១៤ សាលារៀន ក្នុងខេត្តចំនួន ១០ ទូទាំងប្រទេស និងមានសិស្សទទួលផលប្រមាណ ៣០០,០០០នាក់។ នៅក្នុងឆ្នាំ២០២៤ ក្រសួងអប់រំ យុវជន និងកីឡា បាននិងកំពុងអនុវត្ត កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ នៅតាមសាលារៀន គោលដៅចំនួន ៥៥៣សាលា ក្នុងខេត្តចំនួន ១០ រួមមាន៖ ខេត្តសៀមរាប កំពង់ធំ ព្រះវិហារ បាត់ដំបង ស្ទឹងត្រែង បន្ទាយមានជ័យ កំពង់ចាម កំពង់ឆ្នាំង ពោធិ៍សាត់ និងឧត្តរមានជ័យ ក្នុងនោះមានសិស្សទទួលផលចំនួន ១៥៣,៥៨៦នាក់ និងចុងភៅ ១,៥១៨នាក់។
ក្រសួងបានចេញសេចក្តីណែនាំស្តីពី ការហាមឃាត់ការទទួលទាន ការចែកចាយ ការ តាំងលក់ និងការផ្សព្វផ្សាយពាណិជ្ជកម្ម ផលិតផលភេសជ្ជៈប៉ូវកម្លាំងគ្រប់ប្រភេទ នៅក្នុង និង ជុំវិញជាប់

បរិវេណគ្រឹះស្ថានសិក្សាចំណេះទូទៅសាធារណៈ និងឯកជន និងគ្រឹះស្ថានអប់រំបច្ចេកទេស។
ក្រសួងបានផ្តល់អាហារូបករណ៍ដល់សិស្សក្រីក្រ សិស្សពូកែ និងសិស្សមានពិការភាពនៅ បឋមសិក្សាចំនួន ១៤៨ ៩០១ នាក់ នៅមធ្យមសិក្សាបឋមភូមិចំនួន ១០២ ៣៥៩ នាក់ នៅ មធ្យមសិក្សាទុតិយភូមិចំនួន ១១ ១៦៧នាក់ និងនៅកម្រិតអប់រំពិសេសចំនួន ១ ០៩០នាក់។

ការផ្តល់អាហារូបករណ៍ដល់និស្សិតចំនួន ៨ ៦២១នាក់ ចូលរៀនថ្នាក់បរិញ្ញាបត្រមិនបង់ ថ្លៃសិក្សា ១០០% នៅតាមគ្រឹះស្ថានឧត្តមសិក្សា ៤២ ក្នុងឆ្នាំសិក្សា២០២៤-២០២៥ ក្នុងនោះ និស្សិតក្រីក្រចំនួន ១ ៥១៩នាក់ និងនិស្សិតពិការភាពមិនកំណត់ចំនួន (សិស្សពិការភាពបាន ដាក់ពាក្យស្នើសុំអាហារូបករណ៍ និងបានប្រឡងជាប់សញ្ញាបត្រមធ្យមសិក្សាទុតិយភូមិមានសិទ្ធិ ទទួលបានអាហារូបករណ៍ដោយស្វ័យប្រវត្តិ)។

ទី៦៖ ការពង្រឹងអភិបាលកិច្ចគ្រឹះស្ថានឧត្តមសិក្សា, ការលើកកម្ពស់ការស្រាវជ្រាវ, ការ អភិវឌ្ឍ និងការនវានុវត្ត, និងការជំរុញភាពជាដៃគូរវាងរដ្ឋ និងឯកជន។
ក្រសួង បាននិងកំពុងអនុវត្តកំណែទម្រង់អាទិភាពការអប់រំនៅឧត្តមសិក្សាដូចខាងក្រោម៖
ការកែលម្អប្រព័ន្ធអភិបាលកិច្ច និងភាពជាអ្នកដឹកនាំអនុវិស័យ និងគ្រឹះស្ថានឧត្តមសិក្សា៖ ការអនុវត្តប្រព័ន្ធគ្រប់គ្រងផ្អែកលើលទ្ធផល និងការប្រើប្រាស់បច្ចេកវិទ្យាឌីជីថល និងការកសាង សមត្ថភាពអ្នកដឹកនាំ និងគ្រប់គ្រងគ្រប់កម្រិត ដើម្បីធានាបាននូវស្វ័យភាព, តម្លាភាព និង គណនេយ្យភាព។ គ្រឹះស្ថានឧត្តមសិក្សារដ្ឋចំនួន៦ ក្រោមឱវាទក្រសួងអប់រំ យុវជន និងកីឡា បានប្រែក្លាយទៅជាគ្រឹះស្ថានសាធារណៈរដ្ឋបាល។

ការពង្រឹងការអនុវត្តប្រព័ន្ធធានាគុណភាពអប់រំផ្ទៃក្នុង គ្រឹះស្ថានឧត្តមសិក្សាចំនួន ៤៨ បានចូលរួមអនុវត្តប្រព័ន្ធធានាគុណភាពអប់រំផ្ទៃក្នុង ដោយបានធ្វើស្វ័យវាយតម្លៃ និងរៀបចំ របាយការណ៍ស្វ័យវាយតម្លៃ លើកម្មវិធីសិក្សាចំនួន ១០២, និង កម្មវិធីសិក្សាចំនួន៣ ត្រូវបាន វាយតម្លៃ និងទទួលស្គាល់ដោយបណ្តាញសាកលវិទ្យាល័យអាស៊ាន។
ការលើកកម្ពស់សមត្ថភាពស្រាវជ្រាវ និងនវានុវត្តន៍៖ ក្រសួងបានកសាងប្រព័ន្ធអេកូឡូស៊ី ស្រាវជ្រាវ តាមរយៈការសាងសង់ និងជួសជុលបន្ទប់ពិសោធន៍ ការបំពាក់បរិក្ខារ និងឧបករណ៍ ស្រាវជ្រាវទំនើបៗ ការអភិវឌ្ឍសមត្ថភាព និងគុណវុឌ្ឍអ្នកស្រាវជ្រាវ ការជំរុញការបោះពុម្ពអត្ថ បទស្រាវជ្រាវក្នុងទស្សនាវដ្ដីស្រាវជ្រាវជាតិ ឬអន្តរជាតិ។

ការបង្កើនគុណវុឌ្ឍ និង កែលម្អសមត្ថភាពគ្រូបង្រៀន, អ្នកស្រាវជ្រាវ និង មន្ត្រីប្រតិបត្តិ៖ បុគ្គលិកអប់រំចំនួន២០៣នាក់ បានបន្តការសិក្សាថ្នាក់ក្រោយបរិញ្ញាបត្រ ក្នុងនោះបរិញ្ញាបត្រ ជាន់ខ្ពស់១៤៧នាក់ និងថ្នាក់បណ្ឌិត៥៦នាក់។ ក្នុងចំណោម ២០៣ នាក់ មាន ១៤២ នាក់បន្ត ការសិក្សានៅក្រៅប្រទេស ក្នុងនោះថ្នាក់បណ្ឌិតមាន ៤២ នាក់។
ការបង្កើតជំនាញថ្មីៗឆ្លើយតបនឹងតម្រូវការនៃបច្ចេកវិទ្យាឌីជីថល៖ ក្រសួងបាននិងកំពុង ពង្រីកការវិនិយោគលើការអប់រំឌីជីថល និងជំនាញថ្មីៗ រួមមាន ជំនាញសេដ្ឋកិច្ចឌីជីថល, វិស្វកម្មវិទ្យាសាស្ត្រទិន្នន័យ, ប្រព័ន្ធបញ្ជានិងបណ្តាញអគ្គិសនី, មេកាត្រូនិក, អេឡិកត្រូនិក, វិស្វកម្ម Software, បញ្ញាសប្បនិម្មិត (AI), សន្តិសុខសាយប័រ, រ៉ូបូទិកនិងស្វ័យប្រវត្តិកម្ម ។
ទី៧៖ ការលើកកម្ពស់វិស័យកីឡាផ្សារភ្ជាប់ នឹងការអប់រំ និងការបន្តជំរុញចលនាយុវជន ម្នាក់ចេះលេងកីឡាមួយ ប្រភេទយ៉ាងតិចប្រចាំជីវិត។
ក្រសួងបានរៀបចំទិវាកីឡាដើម្បីទាំងអស់គ្នា ទិវាកីឡាអាស៊ាន ទិវាអាស៊ានហាត់ប្រាណ ដើម្បីសុខភាព និងទិវាជាតិអប់រំកាយ។ ក្រសួងបានជំរុញការអនុវត្តការអប់រំកាយ និងកីឡា ២ម៉ោង ក្នុងមួយសប្តាហ៍, និងបានរៀបចំការប្រកួតកីឡាសិស្សបឋមសិក្សា មធ្យមសិក្សា និង ឧត្តមសិក្សា។

ក្រសួងបានរៀបចំការប្រកួតកីឡាជាតិលើកទី៤ និងកីឡាជាតិជនពិការលើកទី២ ក្រោម ប្រធានបទ “កីឡាដើម្បីព្រែកជីកហ្វូណនតេជោ” និងបានសហការរៀបចំការប្រកួតកីឡា យុទ្ធគុនចម្រុះខ្មែរបុរាណ “ពានរង្វាន់សម្តេចមហាបវរធិបតី” លើកទី១។ក្រសួងបានបណ្តុះបណ្តាលបរិញ្ញាបត្រសិល្បៈមនុស្សសាស្ត្រ ឯកទេសអប់រំកាយ ជំនាន់ ទី២ ចំនួន២៥នាក់ ស្រី២នាក់៕

ដោយៈ គង់ សិរីរ័ត្ន