AKP សៀមរាប ថ្ងៃទី២៦ កុម្ភៈ ឆ្នាំ២០២៥-- សវនករស្ថាប័នធានាគុណភាពជប៉ុន Japan Quality Assurance ហៅកាត់ថា (JQA) បានចាប់ផ្តើមរៀបចំធ្វើសវនកម្មផ្ទៃក្រៅប្រព័ន្ធគ្រប់គ្រងបរិស្ថាន ISO 14001: 2015 ក្នុងគោលបំណងដើម្បីបញ្ជាក់ថា តើប្រព័ន្ធគ្រប់គ្រងបរិស្ថាន-អង្គរ បន្តអនុលោមជាប្រចាំ ស្របតាមស្ដង់ដារដែរឬទេ ដែលសវនកម្មនេះបានចាប់ផ្តើមធ្វើនៅថ្ងៃទី២៥ ខែកុម្ភៈ ឆ្នាំ២០២៥ ដែលគ្រោងធ្វើរយៈពេល៣ថ្ងៃគឺថ្ងៃទី២៥ ដល់ថ្ងៃទី២៧ ខែកុម្ភៈ។

ក្នុងជំនួបរវាងសវនករស្ថាប័នធានាគុណភាពជប៉ុន និងអាជ្ញាធរជាតិអប្សរានោះ ឯកឧត្តម ឡុង កុសល អគ្គនាយករងអាជ្ញាធរជាតិអប្សរា បានមានប្រសាសន៍ថា ក្រោមការដឹកនាំពីមន្រ្តី និងបុគ្គលិកពាក់ព័ន្ធតាមនាយកដ្ឋានជំនាញ បានធ្វើឱ្យប្រព័ន្ធគ្រប់គ្រងបរិស្ថាន-អង្គរ របស់អាជ្ញាធរជាតិអប្សរា បន្តមានភាពល្អប្រសើរ និងទទួលកម្រិតស្ដង់ដារពីស្ថាប័នធានាគុណភាពជប៉ុន JQAជាបន្តបន្ទាប់ ហើយលើកនេះ គឺជាឆ្នាំទី១៩ហើយ ដោយឯកឧត្តមសង្ឃឹមថា ក្រោយពីសវនកម្មផ្ទៃក្រៅលើកនេះរួច អាជ្ញាធរជាតិអប្សរា នឹងបន្តទទួលបានកម្រិតស្ដង់ដារផ្នែកបរិស្ថានបន្តទៀតសម្រាប់រយៈពេល៣ឆ្នាំ គឺចាប់ពីឆ្នាំ២០២៥ ដល់ឆ្នាំ២០២៧។

ឯកឧត្តមអគ្គនាយករងបានឱ្យដឹងទៀតថា ក្នុងនាមស្ថាប័នដែលគិតគូរពីបរិស្ថានខ្ពស់ អាជ្ញាធរជាតិអប្សរាបាន និងកំពុងធ្វើការភ្ជាប់ខ្លួនទៅនឹងការងារបរិស្ថាន ដែលជាគុណតម្លៃដ៏ធំធេងមិនអាចកាត់ថ្លៃបាន។ ហើយតំណាងឱ្យឯកឧត្តមអគ្គនាយកអាជ្ញាធរជាតិអប្សរា ក៏ដូចជាស្ថាប័នអាជ្ញាធរជាតិអប្សរាទាំងមូល ឯកឧត្តម ឡុង កុសល បានសម្តែងការគោរព និងអរគុណជូនចំពោះថ្នាក់ដឹកនាំគ្រប់ជាន់ថ្នាក់ដែលបានបំពេញការងារប្រកបទៅដោយការយកចិត្តទុកដាក់ និងមានការលះបង់ខ្ពស់ ចំពោះសកម្មភាពការងារដ៏មានតម្លៃមួយនេះ។

រីឯតំណាងស្ថាប័ន JQA និងជាសវនករលោក ម៉ាម៉ូរុ យ៉ាម៉ាដា បានលើកឡើងថា ចំណុចដែលត្រូវយកមកពិនិត្យនៅក្នុងសវនកម្មផ្ទៃក្រៅនាពេលនេះ មានដូចតទៅ៖ ទី១. ពិនិត្យលើសវនកម្មផ្ទៃក្នុងនិងត្រួតពិនិត្យការគ្រប់គ្រង ទី២. ពិនិត្យសវនកម្មលើកមុនដែលមិនមានភាពមិនអនុលោម ទី៣. ឆ្លើយតបរបស់អាជ្ញាធរជាតិអប្សរាទៅនឹងមតិផ្សេងៗពីមជ្ឍដ្ឋានខាងក្រៅ ទី៤.  ប្រសិទ្ធភាពនៃប្រព័ន្ធគ្រប់គ្រងបរិស្ថានទៅលើការសម្រេចគោលបំណង ទី៥. ស្ថានភាពរីកចម្រើនទៅមុខសម្រាប់សកម្មភាពកែលម្អជាបន្តបន្ទាប់ ទី៦. ការគ្រប់គ្រងប្រតិបត្តិការជាប្រចាំដែលបានចារនៅក្នុងសៀវភៅគ្រប់គ្រងបរិស្ថាន ទី៧. ការផ្លាស់ប្តូរផ្សេងៗនៅក្នុងប្រព័ន្ធគ្រប់គ្រង និងទី៨. ភាពសមស្របនៃការប្រើប្រាស់ស្លាកសញ្ញាចុះបញ្ជី និងការបោះពុម្ពផ្សាយ ព័ត៌មានដែលបានចុះបញ្ជី៕

ដោយ ហង្ស សៀក