AKP បន្ទាយមានជ័យ ថ្ងៃទី២៥ ខែកុម្ភៈ ឆ្នាំ២០២៥-- ឯកឧត្ដម អ៊ូច ភា រដ្ឋលេខាធិការក្រសួងមហាផ្ទៃ បានជំរុញដល់រដ្ឋបាលខេត្តបន្ទាយមានជ័យគ្រប់ស្ថាប័ន កងកម្លាំងមានសមត្ថកិច្ច គ្រប់ជាន់ថ្នាក់ ត្រូវរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដោយត្រូវបន្តជំរុញអនុវត្តគោលនយោបាយ “ភូមិ-ឃុំ-សង្កាត់ មានសុវត្ថិភាព” ឱ្យមានប្រសិទ្ធភាពដោយខិតខំកាត់បន្ថយ និងលុបបំបាត់បទល្មើស ព្រហ្មទណ្ឌគ្រប់ប្រភេទ ជាពិសេសបទល្មើសគ្រឿងញៀន បទល្មើសឆបោកតាមប្រព័ន្ធអនឡាញ បទល្មើសជួញដូរ មនុស្សគ្រប់ទម្រង់ និងចាត់វិធានការលុបបំបាត់ក្មេងទំនើងនៅក្នុងសហគមន៍មូលដ្ឋាន។

មានប្រសាសន៍ជំរុញយ៉ាងដូច្នេះក្នុងឱកាសឯកឧត្ដម អ៊ូច ភា និងឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ អញ្ជើញដឹកនាំកិច្ចប្រជុំត្រួតពិនិត្យ និងជំរុញការអនុវត្តគោលនយោបាយ “ភូមិ ឃុំ-សង្កាត់ មានសុវត្ថិភាព” ស្ថិតក្រោមសមត្ថកិច្ចក្រសួងមហាផ្ទៃ។ កិច្ចប្រជុំនេះក៏មានការអញ្ជេីញចូលរួមលោកឧត្តមសេនីយ៍ វរសេនីយ៍ មេបញ្ជាការ មេបញ្ជាការរងគ្រប់អង្គភាព មន្ទីរ/អង្គភាពនានាជុំវិញខេត្ត អភិបាលក្រុង-ស្រុក អ្នកពាក់ព័ន្ធ នៅសាលប្រជុំ ក សាលាខេត្តបន្ទាយមានជ័យ ថ្ងៃទី២៥ ខែកុម្ភៈ ឆ្នាំ២០២៥។

ឯកឧត្តម អ៊ូច ភា បានជំរុញឱ្យគ្រប់ភាគីពាក់ព័ន្ធត្រូវ បន្តរៀបចំសណ្តាប់ធ្នាប់សាធារណៈ និងសុវត្ថិភាពសង្គមឱ្យបានល្អប្រសើរ ជាពិសេសខិតខំកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍ ឱ្យបានជាអតិបរមា ដើម្បីសម្រេចបានគោលដៅដែលគណៈកម្មាធិការជាតិសុវត្ថិភាពចរាចរណ៍ផ្លូវគោកបានកំណត់។ អ្វីដែលរឹតតែមានសារៈសំខាន់ជាងទៀតនោះគឺ ការអនុវត្តគោលនយោបាយ "ភូមិ ឃុំ សង្កាត់មានសុវត្ថិភាព" ក្នុងរយៈពេលជាង១០ឆ្នាំកន្លងមកនេះ បានផ្តល់នូវមេរៀនបទពិសោធន៍ និងទទួលបាននូវផែនការណែនាំ កែលម្អជាបន្តបន្ទាប់ ដើម្បីឆ្លើយតបទៅនឹងស្ថានភាពជាក់ស្តែងនាពេលបច្ចុប្បន្ន ពោលគឺចាប់ពីខែមករា ឆ្នាំ២០២១មក រាជរដ្ឋាភិបាលបានសម្រេចកែលម្អលក្ខណៈសម្បត្តិនៃគោលនយោបាយ «ភូមិ ឃុំ-សង្កាត់មាន សុវត្ថិភាព» ព្រមទាំងលើកកម្រិតគោលនយោបាយនេះ ជារបស់រាជរដ្ឋាភិបាល ដែលមានគោលបំណងដើម្បីបន្តជំរុញសេវាសាធារណៈ លើកកម្ពស់សណ្តាប់ធ្នាប់ ពង្រឹងសន្តិសុខសុវត្ថិភាពសង្គម ទប់ស្កាត់បទល្មើសនានា ជាពិសេសការជួញដូរមនុស្ស (ស្ត្រី និងកុមារ) និងលើកកម្ពស់អនាម័យ បរិស្ថាន សុខុមាលភាពប្រជាពលរដ្ឋ និងកាត់បន្ថយគ្រោះថ្នាក់ដែលបណ្តាលមកពីគ្រោះមហន្តរាយ និងជំងឺឆ្លងរាតត្បាតផ្សេងៗនៅគ្រប់កាលៈទេសៈ ព្រមទាំងលើកទឹកចិត្តឱ្យមានការដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយប្រសិទ្ធភាព។

ជាមួយគ្នានោះដែរ ឯកឧត្តម អ៊ុ រាត្រី អភិបាលខេត្ត បានលើកឡើងថា រដ្ឋបាលខេត្តបានខិតខំយកចិត្តទុកដាក់ការពារ ថែរក្សាបាននូវសន្តិសុខ សណ្តាប់ធ្នាប់ សាធារណៈ ជំរុញពន្លឿននូវការផ្តល់សេវាសាធារណៈជូនប្រជាពលរដ្ឋ ទាំងសេវាតម្រូវការ និងសេវាសំណូមពរ រួមជាមួយនិងបញ្ហាសុខភាពក៏ដូចជាបញ្ហាគ្រោះមហន្តរាយផ្សេងៗ តាមរយៈការអនុវត្តយ៉ាងម៉ឺងម៉ាត់នូវគោលនយោបាយ សេចក្តីណែនាំ រួមទាំងបទបញ្ជានានារបស់រាជរដ្ឋាភិបាល ធ្វើឱ្យរក្សាបាននូវសុខសន្តិភាព ទាំងផ្ទៃក្នុង និងមានទំនាក់ទំនងសហប្រតិបត្តិការល្អ ជាមួយប្រទេសជិតខាងជាប់ព្រំដែន ជាពិសេសជាមួយប្រទសថៃ ដែលមានព្រំដែនគោកជាប់គ្នាលាតសន្ធឹងប្រវែង១៥៣គម ជាព្រំដែនមិត្តភាព សន្តិភាព និងការអភិវឌ្ឍ៕

ដោយ ឈុន សារ៉ាត