AKPភ្នំពេញថ្ងៃទី២៤ ខែកុម្ភៈ ឆ្នាំ ២០២៥៖ 

ក្រសួងពាណិជ្ជកម្ម៖ កម្ពុជាបានរៀបចំ ស្តង់សម្រាប់តាំងបង្ហាញផលិតផលស្វាយចន្ទី ដើម្បីបង្ហាញសក្តានុពលនៃស្វាយចន្ទីកម្ពុជា ក៏ដូចជាផ្ដល់ជាទីតាំងសម្រាប់កិច្ចពិភាក្សាពាណិជ្ជកម្ម និងលើកកម្ពស់ឱកាសវិនិយោគនៅក្នុងវិស័យស្វាយចន្ទីនៅកម្ពុជា។

ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ អមដោយ លោកជំទាវ សុមេធ សុមនា អនុរដ្ឋលេខាធិការក្រសួងពាណិជ្ជកម្ម បានអញ្ជើញចូលរួមកម្មវិធីសន្និសីទស្វាយចន្ទីពិភពលោក (World Cashew Conference 2025) ដែលបានប្រព្រឹត្តទៅចាប់ពីថ្ងៃទី២១ ដល់ថ្ងៃទី ២៣ ខែកុម្ភៈ ឆ្នាំ២០២៥ នៅទីក្រុងឌូបៃ ប្រទេសអេមីរ៉េតអារ៉ាប់រួម ក្រោមការរៀបចំដោយកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) ។

កម្មវិធីនេះមានរយៈពេលបីថ្ងៃ និងទាក់ទាញអ្នកចូលរួមជាង ៦៥០ នាក់មកពី ៤០ ប្រទេស ទូទាំងពិភពលោកដែលរួមមាន អ្នកកែច្នៃ, ពាណិជ្ជករ, អ្នកវិនិយោគ, និងដៃគូអភិវឌ្ឍន៍ នៅក្នុងវិស័យស្វាយចន្ទី។ គោលបំណងនៃសន្និសីទនេះគឺដើម្បី ពិភាក្សា និងចែករំលែកព័ត៌មានអំពីនិន្នាការទីផ្សារពិភពលោក, ទស្សនវិស័យរយៈពេល ១០ ឆ្នាំ (២០២៥-២០៣៥), ការគ្រប់គ្រងផលិតកម្ម, ការកែច្នៃ, និងការគាំទ្ររបស់រដ្ឋាភិបាល ដើម្បីអភិវឌ្ឍវិស័យស្វាយចន្ទី។

ប្រតិភូកម្ពុជារួមមានតំណាងពីក្រុមហ៊ុនផលិត និងលក់គ្រាប់ស្វាយចន្ទីចំនួន៥ក្រុមហ៊ុន៖ Handcrafted Cashew Nuts Stung Treng (HCST), Khmer Organic Cooperative Co., Ltd, MIRARTH Agri Tech, Welwilling Agriculture Technology and Unique Noble Trading តំណាងពី សហព័ន្ធស្វាយចន្ទីកម្ពុជា, សមាគមស្វាយចន្ទីកម្ពុជា, កម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED), ក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្ម។

ក្នុងឱកាសនេះ កម្ពុជាក៏បានរៀបចំ ស្តង់សម្រាប់តាំងបង្ហាញផលិតផលស្វាយចន្ទី ដើម្បីបង្ហាញសក្តានុពលនៃស្វាយចន្ទីកម្ពុជា ក៏ដូចជាផ្ដល់ជាទីតាំងសម្រាប់កិច្ចពិភាក្សាពាណិជ្ជកម្ម និងលើកកម្ពស់ឱកាសវិនិយោគនៅក្នុងវិស័យស្វាយចន្ទីនៅកម្ពុជា។

សូមបញ្ជាក់ផងដែរថា កម្មវិធី World Cashew Conference 2024 បានប្រព្រឹត្តទៅនៅខេត្តសៀមរាប, ព្រះរាជាណាចក្រកម្ពុជាកាលពីឆ្នាំ២០២៤៕

ដោយ៖ ចរិយា ប្រភព៖ ក្រសួងពាណិជ្ជកម្ម