AKP ព្រះសីហនុ ថ្ងៃទី២២ ខែកុម្ភៈ ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានដឹកនាំមន្ត្រីជំនាញបច្ចេកទេស មន្ទីរ អង្គភាពពាក់ព័ន្ធ និងអាជ្ញាធរស្រុកស្ទឹងហាវ ចុះពិនិត្យវឌ្ឍនភាពនៃដំណើរការសាងសង់រោងចក្រផលិតគ្រឿងបង្គំសូឡា ស្ថិតនៅភូមិ៤ សង្កាត់អូរត្រេះ ស្រុកស្ទឹងហាវ ខេត្តព្រះសីហនុ នៅព្រឹកថ្ងៃសៅរ៍ ទី២២ ខែកុម្ភៈ ឆ្នាំ២០២៥។

តាមតំណាងក្រុមហ៊ុន Jingying PV-Tech (Cambodia) ឯ.ក បានឱ្យដឹងថា ក្រុមហ៊ុនលោកគឺជាក្រុមហ៊ុនមូលបត្រនៅប្រទេសចិន ក្រុមហ៊ុនផលិតវត្ថុធាតុដើមគ្រឿងបង្គំផ្ទាំងសូឡា ក្រុមហ៊ុនចាប់ផ្តើមសាងសង់លើផ្ទៃដី ៧៥០០០ម៉ែត្រការ៉ ក៏ប៉ុន្តែផ្ទៃអគារមាន ៦០ ០០០ម៉ែត្រការ៉េ ក្នុងការសាងសង់បែងចែកជាពីរអគារ ក្នុងនោះអគារផលិតគ្រឿងបង្គំសូឡា និងអគារកាត់បន្ទះសូឡា ហើយមកដល់បច្ចុប្បន្ននេះ ក្រុមហ៊ុនសម្រេចការងារសាងសង់បានប្រមាណជា៧០ ទៅ៨០ភាគរយ និងគ្រោងបើកឱ្យដំណើការនៅខែឧសភា ឆ្នាំ២០២៥ខាងមុខ។  ក្នុងការដាក់ឱ្យដំណើការរបស់រោងចក្រផលិតគ្រឿងបង្គំសូឡាត្រូវការកម្លាំងពលកម្មរហូតដល់៥០០នាក់ ដែលជះឥទ្ធិពលជាវិជ្ជមានដល់ការអភិវឌ្ឍសេដ្ឋកិច្ចរបស់ប្រទេសកម្ពុជា និងការលើកកម្ពស់ផងដែរចំពោះវិសយ័ឧស្សាហកម្ម photovoltaic។ ទន្ទឹមនោះ ក៏នឹងផ្តល់នូវផលិតផលដែលមានគុណភាពខ្ពស់បន្ថែមទៀតសម្រាប់ទីផ្សារ photovoltaic ពិភពលោក និងជំរុញការអភិវឌ្ឍន៍ថាមពលកកើតឡើងវិញផងដែរ និងសុំឱ្យរដ្ឋបាលខេត្តជូយសម្រួលបញ្ហាទឹកសម្រាប់ប្រើប្រាស់ក្នុង រោងចក្រ ព្រោះនាពេលបច្ចុប្បន្ននៅមានការខ្វះខាតប្រភពទឹកស្អាតបម្រើការងារនៅរោងចក្រ។

ក្នុងឱកាសនោះ ឯកឧត្តម ម៉ាង ស៊ីណេត បានធ្វើការណែនាំដល់ក្រុមហ៊ុនធ្វើការសាងសង់ឱ្យបានលឿនឆាប់ ហើយអាជ្ញាធរខេត្ត និងជួយសម្របសម្រួល ដើម្បីឱ្យដំណើការសាងសង់ប្រព្រឹត្តទៅដោយរលូន ដោយសារទីតាំងនេះមានអំណោយផលល្អទាំងបរិស្ថាន អនាម័យធ្វើឱ្យយើងមានសុខភាពល្អ ទន្ទឹមសុខភាពល្អ ការបំពេញការងារនឹងទទួលបានលទ្ធផលផ្លែផ្កាតាមការគ្រោងទុក។

ឯកឧត្តម អភិបាលខេត្ត ក៏បានធ្វើការណែនាំដល់ក្រុមហ៊ុន ត្រូវធ្វើការដាំដុះដើមឈើឱ្យមានភាពបៃតងនៅក្នុងទីតាំងក្រុមហ៊ុន ដើម្បីជួយបង្កើនសោភ័ណភាពបរិស្ថាន អនាម័យកាន់តែល្អប្រសើរនៅពេលខាងមុខ ព្រោះការងារស្អាតវាអាស្រ័យទៅនឹងបរិស្ថានល្អប្រសើរផងដែរ៕

ដោយ ងូ សុមុនី