AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៥ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានស្នើឱ្យពលរដ្ឋខ្មែរទាំងអស់ កុំឆាប់ជឿតាមអ្វីដែលគេលើកឡើង​ ក្នុងចេតនាបំបែកបំបាក់ផ្ទៃក្នុងរបស់កម្ពុជា ដោយឱ្យនាំគ្នាធ្វើយ៉ាងណា ថែរក្សាសន្តិភាព ហើយការពារដែនអធិបតេយ្យភាពទឹកដី និងឯករាជ្យភាព កុំឱ្យមានការបែកបាក់សាមគ្គីផ្ទៃក្នុង។

ការថ្លែងរបស់សម្តេចធិបតី ខាងលើនេះ ធ្វើឡើងក្នុងឱកាសអញ្ជើញចូលរួម​ ជាអធិបតីដ៏ខ្ពង់ខ្ពស់បំផុត ក្នុងពិធីប្រគល់សញ្ញាបត្រ ដល់និស្សិតជ័យលាភី ថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ ថ្នាក់បណ្ឌិត និង បណ្ឌិតកិត្តិយស​ នៃសាកលវិទ្យាល័យ អាស៊ី អឺរ៉ុប សរុបចំនួន ២ ៥៥១ អង្គ/នាក់ (នារី ១ ១៦៩ នាក់) នាថ្ងៃទី១៩ ខែកុម្ភៈ ឆ្នាំ២០២៥ នៅមជ្ឈមណ្ឌលសន្និបាតនិង ពិព័រណ៍កោះពេជ្រ ។

ថ្លែងក្នុងឱកាសនោះ សម្តេចធិបតី បានរំលឹក នូវទុក្ខវេទនា ដែលកម្ពុជា បានឆ្លងកាត់នូវសង្គ្រាមជាហូរហែ ពោលប្រមាណ៥០០ឆ្នាំ ដែលធ្វើឱ្យកម្ពុជា មិនអាចស្វែងរកសន្តិភាព ។ ហេតុដូចនេះ សម្តេចធិបតី ផ្តាំកុំឱ្យបែកបាក់សាមគ្គីផ្ទៃក្នុង បើកាលណាបែកបាក់សាមគ្គីផ្ទៃក្នុង នឹងធ្វើឱ្យប្រទេសជិតខាងឆ្លៀតឱកាស​ ច្បាមយកនូវផលប្រយោជន៍ តួយ៉ាងប្រវត្តិសាស្ត្រខ្មែរ បានចងក្រងឱ្យស្វែងយល់ស្រាប់ បន្ទាប់ពីខ្មែរបែកបាក់ផ្ទៃក្នុង ធ្វើឱ្យខ្មែរកាន់តែចុះខ្សោយទៅៗ ។

សម្តេចធិបតី មានប្រសាសន៍ថា "ការស្វែងរកសន្តិភាព វាលំបាកណាស់ ប៉ុន្តែការថែរក្សាសន្តិភាព កាន់តែលំបាកជាងនេះទៅទៀត ទាមទារឱ្យកូនខ្មែរយើង ត្រូវយល់គ្នា ត្រូវយល់ពីកត្តាប្រវត្តិសាស្ត្រ ដែលថាខ្មែរចុះខ្សោយ មិនមែនមកពីគេវាយលុកទេ ប៉ុន្តែកត្តាធំបំផុតទី១ គឺដោយសារយើងបែកបាក់ វៃគ្នាផ្ទៃក្នុងសង្គ្រាមតាំងពីជំនាន់ក្រោយអង្គរ នឹងហើយដែលទុកឱកាសឱ្យយើងកាន់តែខ្សោយទៅៗ ចឹងការថែរក្សាសាមគ្គីភាព ការរក្សាសន្តិភាព នៅក្នុងប្រទេស គឺជាកិច្ចការសំខាន់ ដែលយើងត្រូវធ្វើ"៕

ដោយ៖ គង់ សិរីរ័ត្ន,រូបថត៖ គល់ រ៉េននី