AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៥ -- យោងតាមក្រសួងការពារជាតិកាលពីថ្ងៃអង្គារ បានឱ្យដឹងថា ក្រុមហ៊ុនហាន់វ៉ា គ្រុប (Hanwha Group)របស់ប្រទេសកូរ៉េខាងត្បូងបានពិភាក្សាជាមួយក្រុមហ៊ុនអេហ្គ គ្រុប (Edge Group) ដែលជាក្រុមហ៊ុនការពារជាតិមានមូលដ្ឋាននៅប្រទេសអេមីរ៉ាតអារ៉ាប់រួម (UAE) ដើម្បីស្វែងរកកិច្ចសហប្រតិបត្តិការជាយុទ្ធសាស្ត្រក្នុងវិស័យការពារជាតិ អាកាសចរណ៍ និងឧស្សាហកម្មដែនសមុទ្រ។

យោងតាមក្រុមហ៊ុន Hanwha Aerospace Co. បានឱ្យដឹងថា​ លោក គីម ដុងវ៉ាន់ (Kim Dong-kwan) អនុប្រធានក្រុមហ៊ុន Hanwha Group បានជួបជាមួយលោក ហ្វៃសាល អាល់ បានណៃ (Faisal Al Bannai)នាយកប្រតិបត្តិនៃក្រុមហ៊ុន Edge Group នៅខាងក្រៅពិពណ៌ IDEX 2025 ដែលជាការតាំងពិពណ៌ការពារជាតិដ៏ធំបំផុតនៅតំបន់មជ្ឈិមបូព៌ាកាលពីថ្ងៃចន្ទ (ម៉ោងក្នុងតំបន់) ក្នុងទីក្រុងអាប៊ូដាប៊ី។

ក្នុងជំនួបនោះ ភាគីទាំងពីរបានរិះរកវិធីពង្រីកផលិតកម្មក្នុងស្រុក និងសមត្ថភាពប្រតិបត្តិការក្នុងវិស័យការពារជាតិ ក៏ដូចជាកិច្ចសហការលើការអភិវឌ្ឍប្រព័ន្ធគ្មានមនុស្សបើក។

ក្រុមហ៊ុន Edge ដែលជាក្រុមហ៊ុនការពារជាតិ និងបច្ចេកវិទ្យារបស់ប្រទេសអេមីរ៉ាតអារ៉ាប់រួម ដែលគ្រប់គ្រងដោយរដ្ឋត្រូវបានបង្កើតឡើងដោយមានការចូលរួមពីក្រុមហ៊ុនសាធារណៈ និងឯកជនជាង ២០ក្រុមហ៊ុន។វាដំណើរការក្នុងវិស័យការពារជាតិ លំហអាកាស សន្តិសុខតាមប្រព័ន្ធអ៊ីនធឺណិត និងការពារដែនសមុទ្រ។

ក្រុមហ៊ុន Hanwha បានពិភាក្សាអំពីគម្រោងរួមគ្នាដែលមានសក្តានុពលជាមួយក្រុមហ៊ុន Edge ក្នុងវិស័យប្រព័ន្ធគ្មានមនុស្សបើក។ ក្រុមហ៊ុនEdge បានក្លាយខ្លួនជាអ្នកនាំមុខគេក្នុងវិស័យអាវុធគ្មានមនុស្សបើក បន្ទាប់ពីការទិញយកក្រុមហ៊ុនការពារជាតិអេស្តូនី Milrem Robotics នៅឆ្នាំ២០២៣៕

ដោយ៖ មូល មិនា (ប្រភព៖ យ៉ុនហាប់)