AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៥ -- ក្រសួងការបរទេសរបស់ទីក្រុងសេអ៊ូលបាននិយាយកាលពីថ្ងៃអង្គារថា ប្រទេសកូរ៉េខាងត្បូង «កំពុងតាមដានយ៉ាងដិតដល់» ចំពោះការវិវត្តដែលទាក់ទងនឹងកិច្ចខិតខំប្រឹងប្រែងដើម្បីបញ្ចប់សង្រ្គាមនៅអ៊ុយក្រែន ខណៈដែលសហរដ្ឋអាមេរិក និងរុស្ស៊ីនឹងធ្វើការពិភាក្សាគ្នាលើបញ្ហានេះនៅក្នុងសប្តាហ៍នេះ។

មន្ត្រី​ក្រសួង​មួយ​រូប​បាន​ធ្វើ​ការ​កត់​សម្គាល់ ខណៈ​មន្ត្រី​កំពូល​របស់​សហរដ្ឋ​អាមេរិក និង​រុស្ស៊ី ​គ្រោង​នឹង​ជួប​គ្នា​នៅ​ទីក្រុងរីយ៉ាដ ប្រទេស​អារ៉ាប៊ីសាអូឌីត នៅ​ថ្ងៃ​បន្ទាប់ ​ដើម្បី​ពិភាក្សា​អំពី​ការ​បញ្ចប់​សង្រ្គាម​ជិត​បី​ឆ្នាំ។

មន្ត្រីក្រសួងបានប្រាប់អ្នកយកព័ត៌មានក្នុងលក្ខខណ្ឌសុំមិនបញ្ចេញឈ្មោះថា «ដោយមានចំណាប់អារម្មណ៍ខ្ពស់ក្នុងកិច្ចខិតខំប្រឹងប្រែងដើម្បីបញ្ចប់សង្រ្គាម រដ្ឋាភិបាលកំពុងតាមដានយ៉ាងដិតដល់នូវការវិវត្តដែលទាក់ទងនឹងការចរចាបែបនេះ» ។

មន្ត្រីរូបនេះបាននិយាយថា ទីក្រុងសេអ៊ូលនឹងសហការជាមួយបណ្តាប្រទេសជាមិត្តសម្រាប់ការស្ដារឡើងវិញនូវសន្តិភាព និងការកសាងប្រទេសអ៊ុយក្រែនឡើងវិញ «យ៉ាងឆាប់រហ័ស» ដោយលោកបានបន្ថែមថា ខ្លួនគ្រោងនឹងបន្តផ្តល់ការគាំទ្រដល់ទីក្រុងគៀវ។

ប្រទេសកូរ៉េខាងត្បូងបានផ្តល់ជំនួយមនុស្សធម៌ និងជំនួយឥតសំណងដល់អ៊ុយក្រែន ចាប់តាំងពីការផ្ទុះសង្រ្គាមកាលពីខែកុម្ភៈ ឆ្នាំ២០២២៕

ដោយ៖ មូល មិនា (ប្រភព៖ យ៉ុនហាប់)