AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៥ -- រដ្ឋមន្ត្រីការបរទេសរុស្ស៊ី លោកសើហ្គេយ ឡាវរ៉ូវ (Sergei Lavrov) បាននិយាយថា សហរដ្ឋអាមេរិកអាចជួយដោះស្រាយជម្លោះអ៊ុយក្រែន ដោយលោកបានលើកឡើងពី «តួនាទីកណ្តាល» របស់ខ្លួន ចាប់តាំងពីការប្រយុទ្ធបានចាប់ផ្តើមជិតបីឆ្នាំមុន។

ការកត់សម្គាល់របស់លោក ឡាវរ៉ូវ បានធ្វើឡើងមុនកិច្ចប្រជុំរបស់លោកជាមួយតំណាងសហរដ្ឋអាមេរិក ដែលគ្រោងធ្វើនៅថ្ងៃអង្គារ នៅប្រទេសអារ៉ាប៊ីសាអូឌីត។ វិមានក្រឹមឡាំងបាននិយាយថា ភាគីទាំងពីរត្រូវបានគេរំពឹងថានឹងធ្វើកិច្ចចរចាបញ្ចប់ជម្លោះដែលនឹងត្រួសត្រាយផ្លូវសម្រាប់ជំនួបរវាងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) និងប្រធានាធិបតីរុស្ស៊ី លោក វ្លាឌីមៀ ពូទីន (Vladimir Putin) ។

លោក ឡាវរ៉ូវ បាននិយាយថា លោកមិនរំពឹងថាជនជាតិអឺរ៉ុបនឹងមានកៅអីនៅតុចរចានោះទេ ដោយលោកបានចោទប្រកាន់ពួកគេថាកំពុងស្វែងរកការប្រើប្រាស់បទឈប់បាញ់ដ៏មានសក្តានុពល ដើម្បីអាចឱ្យអ៊ុយក្រែនបន្តជម្លោះ។

លោក​បាន​បន្ថែម​ថា ទីក្រុង​ម៉ូស្គូ​បដិសេធ​រាល់​ការ​ពិភាក្សា​ស្តីពី​សម្បទាន​ទឹកដី​ដល់​អ៊ុយក្រែន​ក្នុង​អំឡុង​ពេល​ការ​ចរចា​ដ៏មាន​សក្តានុពល។សហរដ្ឋអាមេរិក​ធ្លាប់​បាន​ជំរុញ​ឲ្យ​រុស្ស៊ី និង​អ៊ុយក្រែន​ធ្វើ​សម្បទាន​ដើម្បី​សន្តិភាព។

ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បាននិយាយថា ទីក្រុងគៀវនឹងមិនចូលរួមការចរចារវាងសហរដ្ឋអាមេរិក និងរុស្ស៊ី នាពេលខាងមុខ ដោយបដិសេធមិនទទួលយកលទ្ធផលណាមួយដែលមិនរាប់បញ្ចូលអ៊ុយក្រែននោះទេ៕

ដោយ៖ មូល មិនា (ប្រភព៖ ស៊ីនហួ)