AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៥–

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា ការភាន់ច្រឡំ ដោយចោទថាក្រសួងអប់រំ កំពុងតែព្យាយាមកែប្រវត្តិសាស្ត្រ តាមរយៈការរៀបចំសៀវភៅថ្មី ឱ្យទៅដឹងគុណប្រទេសជិតខាង ហើយក្បត់ប្រវត្តិសាស្ត្រឯង ដាច់ខាតត្រូវតែបកស្រាយ ឱ្យបានច្បាស់លាស់ ខណៈដែលសៀវភៅនេះ គឺជាសៀវភៅប្រវត្តិសាស្ត្រ បំពេញបន្ថែមថ្មី សម្រាប់សិស្សានុសិស្ស សិក្សាជាមួយសៀវភៅ ដែលកំពុងប្រើប្រាស់បច្ចុប្បន្ន។

ក្នុងឱកាសអញ្ជើញប្រគល់សញ្ញាបត្រ ដល់និស្សិត​ នៃសាកលវិទ្យាល័យ អាស៊ី អឺរ៉ុប សរុបចំនួន ២ ៥៥១ អង្គ/នាក់ នៅមជ្ឈមណ្ឌលសន្និបាតនិង ពិព័រណ៍កោះពេជ្រ នាថ្ងៃទី១៩ ខែកុម្ភៈ ឆ្នាំ២០២៥នេះ សម្តេចធបិតី ហ៊ុន ម៉ាណែត លើកឡើងថា សៀវភៅដែលបោះពុម្ភថ្មីនេះ គឺជាសៀវភៅបំពេញបន្ថែម របស់ក្រសួងអប់រំ ទៅលើសៀវភៅប្រវត្តិវិទ្យា សម្រាប់បឋមសិក្សា ដែលមាន៣ច្បាប់ ក្នុងនោះនិយាយអំពីប្រវត្តិសាស្ត្រខ្មែរ តាមដំណាក់កាល នៃប្រវត្តិសាស្ត្រ ដែលបានកកើត។

ក្នុងចំណោមសៀវភៅទាំង៣ក្បាល ត្រូវបានសម្តេចធិបតី មើលឃើញថា សៀវភៅមួយក្បាលដែលមានចំណងជើងថា "ខ្មែរ និងដំណើរឆ្ពោះទៅកាន់វិបុលភាព" ដែលមានភាពចម្រូងចម្រាស់ខ្លាំងជាងគេ ដែលទាមទារឱ្យសម្តេចត្រូវតែ ចេញមកបកស្រាយ ។

សម្តេចធិបតី បានពន្យល់ថា សៀវភៅខាងលើនេះ មិនមែនចេញមកជំនួសសៀវភៅ ប្រវត្តិសាស្ត្រចាស់នោះទេ និងមិនមានការកែប្រែអ្វីឡើយ ប៉ុន្តែបំពេញបន្ថែម នូវរូបភាពជាច្រើន ដើម្បីឱ្យសិក្សានុសិស្សសិក្សាងាយយល់តែប៉ុណ្ណោះ ។
ហើយត្រូវបានចាត់ទុកថាជាការ ធ្វើទំនើបកម្ម នៃរបៀបបង្រៀន។

ក្នុងនោះសម្តេចធិបតី បានកត់សម្គាល់ឃើញថា "ប៉ុន្តែបញ្ហាចោទមួយ ដែលធ្វើឱ្យមនុស្សយល់ច្រឡំ និងការបកស្រាយនោះ ហើយសារថ្ងៃនេះ មិនមែនសម្រាប់តែតេជគុណទេ គឺសម្រាប់បងប្អូនប្រជាពលរដ្ឋ ដែលកំពុងតែមើលតាមនេះ ឱ្យយល់ខុសអំពីសៀវភៅ មូលហេតុបានជាខ្ញុំ លើកនៅទីនេះ ហើយវាមិនខុសពីរឿងលូ៤០ដុល្លារមួយកង់ ឬមួយអីនោះទេ ។ ភាគច្រើនគឺយើងតាមគ្នា ហើយនិស្សិតបញ្ញវន្ត ទាំងសាស្ត្រាចារ្យ មូលហេតុដែលយើងរៀនមានចំណេះប៉ុននេះ គឺដើម្បីឯករាជ្យក្នុងការពិចារណា គិតគូររបស់ខ្លួន មុននឹងធ្វើការសម្រេចចិត្ត កុំជឿតែឭតែគេនិយាយ សូមស្រាវជ្រាវឱ្យបានច្បាស់លាស់ ទើបយើងធ្វើការសម្រេចចិត្តត្រូវ ​ហើយមូលហេតុដែលយើងត្រូវរៀនឱ្យកាន់តែខ្ពស់ ដើម្បីឯករាជ្យក្នុងការគិតគូរបស់យើង" ។

បន្ថែមលើនេះសម្តេចធិបតី គូសបញ្ជាក់ថា រឿងជាតិនិយម ការស្រឡាញ់ជាតិ ការថែរក្សាវប្បធម៌ អត្តសញ្ញាណជាតិ ត្រូវតែមានគ្រប់គ្នាទាំងអស់ ខណៈដែលអ្នកបារម្ភ លើបណ្តាញសង្គមភាគច្រើន មិនទាន់បានបើកមើល សិក្សាពីសៀវភៅនេះនៅឡើយនោះទេ ដោយគ្រាន់តែវាយតម្លៃ តាមគម្របមុខនៃសៀវភៅ​។

សម្តេចធិបតី មានប្រសាសន៍បន្ថែមថា "ចឹងរឿងនេះ វាមានរឿង២ រឿងនេះវារសើបរឿង២ ទី១រឿងប្រវត្តិសាស្ត្រខ្លឹមសារក្នុងនេះ ទី២ រឿងគម្រប ឱ្យតែមានរូបវិមានឈ្នះឈ្នះ គឺនាំគ្នាគិតថា អាហ្នឹងជាស្តូបវៀតណាម ហេតុនេះហើយបានជាគេនាំថា យកសៀវភៅនេះ ដើម្បីទៅដឹងគុណវៀតណាម ព្រោះគ្រាន់តែគម្របហ្នឹង ក៏ដាក់ស្តូបរបស់វៀតណាមហើយ" ។

បន្ថែមលើនេះ សម្តេចធិបតី គូសបញ្ជាក់ថា ការភាន់ច្រឡំទៅលើបញ្ហា ការចេញសៀវភៅប្រវត្តិសាស្ត្របំពេញបន្ថែមថ្មីនេះ មិនមែនជារឿងតូចឡើយ ដែលអាចនាំឱ្យខ្មែរនិងខ្មែរឈ្លោះគ្នាឯង ។

សម្តេចនាយករដ្ឋមន្ត្រី មានប្រសាសន៍បញ្ជាក់បន្ថែមថា "អ្នកដែលចោទថាយើង សរសេរសៀវភៅនេះ ដើម្បីដឹងគុណវៀតណាម គឺអត់មានទេ ក្នុងសៀវភៅនេះ មិនមាននិយាយច្រើនពីវៀតណាម ក្រៅពីទំព័រ៤១ មួយបន្ទាត់ ទំព័រ៤២ តែមួយបន្ទាត់ទេ និយាយអំពីរណសិរ្សសាមគ្គីសង្គ្រោះជាតិកម្ពុជា សហការជាមួយកងទ័ពស្ម័គ្រចិត្តវៀតណាម ដើ​ម្បីវៃរំលំរបបប្រល័យពូជសាសន៍ប៉ុលពត បូកជាមួយនិងការពារ ការស្តារឡើងវិញក្រោយពីនោះ ជាតថភាពជាក់ស្តែង ហើយក្រៅពីនេះ និយាយពីខ្មែរទាំងអស់ ស្នាដៃរបស់បុព្វបុរសខ្មែរ ជំនាន់សម្តេចតា ក្រោយមកខ្មែររួមគ្នារកសន្តិភាព បូកជាមួយនិងទិដ្ឋភាពឈឺចាប់មួយចំនួន ដែលយើងឆ្លងកាត់ កុំឱ្យឆ្លងកាត់ឡើងវិញ និយាយអំពីខ្មែរទាំងអស់ "៕

ដោយ៖ គង់ សិរីរ័ត្ន, រូបថត៖ គល់ រ៉េននី