AKP ព្រះវិហារ ថ្ងៃទី១៩ ខែកុម្ភៈ ឆ្នាំ២០២៥

ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារបានចាត់ទុកការផ្លាស់ប្តូរភារកិច្ចភារកិច្ចប្រធានមន្ទីរបរិស្ថានខេត្តព្រះវិហារថ្មីនាពេលនេះ គឺស្របតាមកំណែទម្រង់ស៊ីជម្រៅរបស់រាជរដ្ឋាភិបាល សំដៅផ្លាស់ប្តូរបទពិសោធន៍ ចំណេះដឹង និងការអភិវឌ្ឍធនធានមនុស្ស លើវិស័យបរិស្ថាន និងគ្រប់គ្រងធនធានធម្មជាតិឱ្យកាន់តែមានការអភិវឌ្ឍរីកចម្រើនបន្ថែមទៀត។ ការលើកឡើងរបស់ឯកឧត្ដមអភិបាលខេត្ដបែបនេះ ក្នុងពិធីប្រកាសតែងតាំង លោក មឿន សុភេទ ឱ្យចូលកាន់មុខតំណែងជាប្រធានមន្ទីរបរិស្ថានខេត្តព្រះវិហារថ្មី ជំនួសលោក សុង ច័ន្ទសុជាតិ ដែលត្រូវបានទទួលភារកិច្ចថ្មី នៅក្រសួងបរិស្ថាន កាលពីថ្ងៃទី១៨ ខែកុម្ភៈ ឆ្នាំ២០២៥ នៅសាលប្រជុំរដ្ឋបាលសាលាខេត្តព្រះវិហារ ដោយមានការអញ្ជើញចូលរួមជាអធិបតីភាពពីឯកឧត្តម សាន វណ្ណទី រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន និងក៏មានការអញ្ជើញចូលរួមពី ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្តព្រះវិហារ   លោក លោកស្រីជាអភិបាលរងខេត្ត មេបញ្ជាការកងកម្លាំងទាំងបី ថ្នាក់ដឹកនាំមន្ទីរ-អង្គភាពជុំវិញខេត្ត អភិបាលក្រុង-ស្រុក មន្ត្រីរាជការ មន្រ្តីឧទ្យានុរក្សា និងមន្រ្តីជាប់កិច្ចសន្យា នៃមន្ទីរបរិស្ថាន ខេត្តជាច្រើនរូបទៀត។

ក្នុងឱកាសនោះ ឯកឧត្តម គីម រិទ្ធី អភិបាលខេត្តព្រះវិហារបានសម្តែងនូវការអបអរសាទរចំពោះ លោក មឿន    សុភេទ ដែលត្រូវបានថ្នាក់ដឹកនាំផ្តល់សេចក្តីទុកចិត្ត តែងតាំងជាប្រធានមន្ទីរបរិស្ថានខេត្តព្រះវិហារថ្មី ហើយឯកឧត្ដមក៏សូមជូនពរ លោក សុង ច័ន្ទសុជាតិ អតីតប្រធានមន្ទីរបរិស្ថានខេត្តព្រះវិហារ ដែលត្រូវបានទទួលភារកិច្ចថ្មី នៅក្រសួងបរិស្ថានផងដែរ។

ជាមួយគ្នានេះដែរ ឯកឧត្តម សាន វណ្ណទី រដ្ឋលេខាធិការប្រចាំការ ក្រសួងបរិស្ថានបានមានប្រសាសន៍ណែនាំដល់ប្រធានមន្ទីរដែលទទួលបានការតែងតាំងថ្មី ត្រូវមានសាមគ្គីភាព សម្របសម្រួល និងសហការល្អជាមួយគ្រប់អង្គភាពជុំវិញខេត្ត ដោយពង្រឹងចំណេះដឹង ទាំងបច្ចេកទេស និងច្បាប់ និងសិក្សាឱ្យបានច្បាស់អំពីតួនាទីរបស់ខ្លួន និងសិទ្ធិក្នុងការអនុវត្តច្បាប់ លិខិតបទដ្ឋាន ពិសេសក្រមបរិស្ថាន។ ទន្ទឹមនេះ ត្រូវយកយុទ្ធសាស្រ្តចក្រា ដែលមានសសរស្តម្ភទាំងបី ទៅរៀបចំជាផែនការសកម្មភាពជាក់ស្តែង តាមភូមិសាស្ត្រ និងស្ថានភាព ដើម្បីធានាសម្រេចឱ្យបាននូវកម្មវត្ថុយុទ្ធសាស្រ្តចក្រា, សិក្សាឱ្យច្បាស់អំពីការងារដែលបានផ្ទេរតាមគោលការណ៍វិមជ្ឈការ និងវិសហមជ្ឈការ ដោយត្រូវទទួលខុសត្រូវអនុវត្តន៍ឱ្យមានប្រសិទ្ធភាព។

ឯកឧត្ដមរដ្ឋលេខាធិការប្រចាំការបានជំរុញដល់ប្រធានមន្ទីរដែលទើបតែងតាំងថ្មី ក្នុងការដឹកនាំ ត្រូវចេះប្រើកម្លាំងសរុប ក្នុងពេលដែលស្ថានភាពខ្វះមន្ត្រី ករណីចាំបាច់ឱ្យទាន់ពេលវេលា ហើយការសុំអន្តរាគមន៍ពីខេត្ត ពីក្រសួង ក្នុងករណីចាំបាច់ឱ្យទាន់ពេលវេលា ត្រូវរាយការណ៍ និងស្នើសុំកម្លាំងក្នុងក្របខ័ណ្ឌគណៈបញ្ជាការឯកភាពខេត្ត ដើម្បីអនុវត្តន៍វិធានការនានា។ ទន្ទឹមនេះ ត្រូវចេះប្រើប្រព័ន្ធបច្ចេកវិទ្យា ក្នុងការគ្រប់គ្រង និងដឹកនាំការងារ និងត្រូវរៀបចំឱ្យមានផែនការការងារច្បាស់លាស់ជាក់ស្តែង និងតាមដានការអនុវត្ត ជាពិសេសត្រូវគោរពការចាត់តាំងការងារ ត្រូវគោរពវិជ្ជាជីវៈ ស្មោះត្រង់ជាមួយការងារ និងថ្នាក់លើ៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ