AKP កំពង់ធំ ថ្ងៃទី១៩ ខែកុម្ភៈ ឆ្នាំ២០២៥-- កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដឹកនាំដោយលោក​វរសេនីយ៍ទោ សេង សំអុល នាយសេនាធិការរង និងជាមេបញ្ជាការកងកម្លាំងអន្តរាគមន៍ សហការជាមួយកម្លាំងចម្រុះរួមមានមន្ត្រីជលផលសង្កាត់ផាត់សណ្ដាយ កងកម្លាំងប្រដាប់អាវុធទាំងបី មន្ត្រីឧទ្យានុរក្សតំបន់រ៉ាំសា កាលពីថ្ងៃទី១៨ខែកុម្ភៈឆ្នាំ២០២៥ បានចេញធ្វើសកម្មភាពបង្ក្រាបបទល្មើសនេសាទខុសច្បាប់ នៅតំបន់កោះតាបរ ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។

លោកវរសេនីយ៍ទោ សេង សំអុល បានបញ្ជាក់ថា ដោយអនុវត្តតាមបទបញ្ជារបស់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្ត និងជាអនុប្រធានគណៈបញ្ជាការឯកភាពរដ្ឋបាលខេត្តកំពង់ធំ កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានបន្តសហការជាមួយកម្លាំងចម្រុះប្រចាំការបង្ក្រាបបទល្មើសនេសាទនៅឃុំផាត់សណ្ដាយ បានបន្តចេញធ្វើសកម្មភាពនៅតំបន់កោះតាបរ នៅលើផ្ទៃបឹងទន្លេសាប ឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ដោយបានរុះរើបំផ្លាញចោលរបាំងសាច់អួនខុសច្បាប់ចំនួន៤របាំង ដែលមានប្រវែងជាង ៦០០ម៉ែត្រ លូសាច់អួនចំនួន៦មាត់ បង្គោលរបាំងជាង៧០០ដើម បានរុះរើបំផ្លាញចោលរបាំងស្បៃមុង ខុសច្បាប់ប្រវែងជាង ៣០០ម៉ែត្រ លបលូចំនួន១៤មាត់ និងបង្គោលរបាំងជាង២០០ ដើម និងបានចាក់លែងកូនត្រីស្រស់ចម្រុះមួយចំនួនចូលបឹងធម្មជាតិវិញ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)