AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៥ -- នាយកដ្ឋានតម្រង់ទិសវិជ្ជាជីវៈនៃក្រសួងអប់រំ យុវជន និងកីឡា ក្រោមការគាំទ្រពីអង្គការយូនីសេហ្វ (UNICEF) បានរៀបចំវគ្គសិក្ខាសាលាឆ្លុះបញ្ចាំង និងវាយតម្លៃសមត្ថភាពគ្រូឧទ្ទេសថ្នាក់ជាតិស្ដីពី “ការអនុវត្តកម្មវិធីអប់រំបំណិនជីវិត” ដែលបានប្រព្រឹត្តទៅចាប់ពីថ្ងៃទី១៨ ដល់ថ្ងៃទី២០ ខែកុម្ភៈ ឆ្នាំ២០២៥ នៅសាលប្រជុំសាលាគរុកោសល្យ និងវិក្រឹតការ ខេត្តសៀមរាប។

គោលបំណងនៃវគ្គសិក្ខាសាលានេះ គឺដើម្បីឆ្លុះបញ្ចាំងសមត្ថភាពគ្រូឧទ្ទេសថ្នាក់ជាតិ ឧត្តមានុវត្តន៍ និងបញ្ហាប្រឈមក្នុងការអនុវត្តកម្មវិធីអប់រំបំណិនជីវិត តាមមូលដ្ឋាន Local Life Skills Education (LLSE) និង Volunteer for My Community (VMC)  នៅកម្រិតមន្ទីរ កម្រិតស្រុក កម្រិតសាលារៀន ទាក់ទងនឹងការយល់ដឹងអំពីគោលគំនិតថ្មីនៃការអប់រំបំណិនជីវិតតាមមូលដ្ឋាន ដោយធានាថា ពួកគាត់មានការយល់ដឹងទូលំទូលាយអំពីកម្មវិធី LLSE និងVMC ជាពិសេសបច្ចេកទេសបង្រៀន សហការរៀបចំកម្មវិធីសិក្សា ដោយបញ្ចូលធាតុសំខាន់ៗ នៃកម្មវិធី LLSE ដោយបង្ហាញពីសមត្ថភាពរបស់ពួកគាត់ក្នុងការរួមបញ្ចូល និងអនុវត្តកម្មវិធី LLSE នៅក្នុងសាលារៀន ។

សិក្ខាសាលានេះ មានការចូលរួមពីគណៈគ្រប់គ្រង និងមន្ត្រីជំនាញ មកពីនាយកដ្ឋានអភិវឌ្ឍកម្មវិធីយុវជន នាយកដ្ឋានសុខភាពសិក្សា នាយកដ្ឋានបរិវត្តកម្មឌីជីថល និងនាយកដ្ឋានបឋមសិក្សា នាយកដ្ឋានកិច្ចការបណ្តុះបណ្តាល នាយកដ្ឋានអភិវឌ្ឍកម្មវិធីសិក្សា នាយកដ្ឋានកិច្ចការវិក្រឹតការ នាយកដ្ឋានអធិការកិច្ចគុណភាពអប់រំ នាយកដ្ឋានមធ្យមសិក្សាចំណេះទូទៅ គ្រូឧទ្ទេសមជ្ឈមណ្ឌលគរុកោសល្យភូមិភាគ ថ្នាក់ដឹកនាំមន្ទីរ ការិយាល័យអប់រំ យុវជន និងកីឡាស្រុក គណៈគ្រប់គ្រងគ្រឹះស្ថានមធ្យមសិក្សា និងគ្រូទទួលបន្ទុកបង្រៀនបំណិនជីវិត សរុប ៦០ នាក់ ស្រី ១១ នាក់៕

ដោយ ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)