AKP បន្ទាយមានជ័យ ថ្ងៃទី១៨ ខែកុម្ភៈ ឆ្នាំ២០២៥-- គ្រួសារកងទ័ពក្នុងអង្គភាពកងពលតូចថ្មើរជើងលេខ៥១ដែលជួបការលំបាកចំនួន៣២គ្រួសារបានទទួលអំណោយសម្តេចធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត នៅព្រឹកថ្ងៃទី១៨ ខែកុម្ភៈ ឆ្នាំ២០២៥នេះ សម្រាប់ទ្រទ្រង់ដល់ជីវភាពក្រុមគ្រួសារឱ្យមានភាពប្រសើរ។

អំណោយដ៏ថ្លៃថ្លានេះរួមមានគ្រឿងឧបភោគបរិភោគ និងថវិកា និងត្រូវបានលោក វរសេនីយ៍ឯក ប៉ែន សុគន្ធ មេបញ្ជាការរង នាយសេនាធិការកងពលតូចថ្មើរជើងលេខ៥១ និងក្រុមការងារ នាំយកចែកជូនដល់ដៃគ្រួសារកងទ័ពដែលជួបការលំបាក ស្ថិតនៅភូមិភ្នំជញ្ជាំង ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។

ក្នុងឱកាសនោះ លោកវរសេនីយ៍ឯកបានបញ្ជាក់ថា ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់តែងតែយកចិត្តទុកដាក់គិតគូរដល់សុខទុក្ខជីវភាពកងទ័ព និងគ្រួសារកងទ័ពដែលជួបការលំបាកនៅគ្រប់ទីកន្លែង ជាពិសេសសម្តេចធិបតី  ហ៊ុន ម៉ាណែត និងលោកជំទាវបណ្ឌិត ជានិច្ចកាលបានផ្តល់អំណោយជាគ្រឿងឧបភោគបរិភោគ និងថវិកាជួយដល់គ្រួសារកងទ័ពសម្រាប់សម្រួលការលំបាកបានទាន់ពេលវេលា។ ជាក់ស្តែងនៅថ្ងៃនេះគ្រួសារកងទ័ពចំនួន៣២គ្រួសារ ទទួលបានអំណោយរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ក្នុងមួយគ្រួសារទទួលបានគ្រឿងឧបភោគបរិភោគចំនួន៩មុខ និងថវិកាមួយចំនួន។

ជាមួយគ្នានោះដែរ គ្រួសារកងទ័ពទាំងអស់សូមគោរពជូនពរ និងថ្លែងអំណរគុណយ៉ាងជ្រាលជ្រៅបំផុតចំពោះសម្តេចធិបតី ហ៊ុន ម៉ាណែត និងលោកជំទាវ  ដែលតែងតែយកចិត្តទុកដាក់ដល់កងទ័ព និងគ្រួសារកងទ័ព ជួបការលំបាកគ្រប់វេលា ព្រមទាំងបួងសួងដល់វត្ថុស័ក្តិសិទ្ធិក្នុងលោក សូមប្រសិទ្ធិពរជ័យបវរសួស្តី ជួបតែសេចក្ដីសុខ សេចក្តីចម្រើន សុភមង្គល ក្នុងក្រុមគ្រួសារ ទទួលបានជោគជ័យគ្រប់ភារកិច្ច និងជួបពុទ្ធពរ ៤ប្រការ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ ឈុន សារ៉ាត