AKP កំពង់ឆ្នាំង ថ្ងៃទី១៨ ខែកុម្ភៈ ឆ្នាំ២០២៥-- លោក អម សុភា អភិបាលរងខេត្តឆ្នាំង បានដឹកនាំកិច្ចប្រជុំគណៈកម្មការការងារកំណែទម្រង់ វិមជ្ឍការ និងវិសហមជ្ឍការជូនដល់មន្ត្រីរាជការថ្នាក់ក្រោមជាតិខេត្តកំពង់ឆ្នាំង កាលពីថ្ងៃទី១៧ ខែកុម្ភៈ ឆ្នាំ២០២៤ ដោយមានការអញ្ជើញចូលរួមពីនាយករដ្ឋបាល លោកនាយក នាយករងទីចាត់ការ ប្រធានអង្គភាព លោកប្រធាន អនុប្រធានការិយាល័យ និងអាជ្ញាធរជុំវិញខេត្តជាច្រើននាក់ផងដែរ។

ក្នុងឱកាសនោះ លោក អម សុភា បានមានប្រសាសន៍ថា ការងារកំណែទម្រង់វិមជ្ឈការ និងវិសហមជ្ឈការ បានជួយកែសម្រួលឡើងវិញនូវរចនាសម្ព័ន្ធ ប្រព័ន្ធគ្រប់គ្រង និងនីតិវិធីបំពេញការងាររបស់រដ្ឋបាលថ្នាក់ក្រោមជាតិ ដោយឈរលើគោលការណ៍ នៃរដ្ឋបាលឯកភាព និងការអភិវឌ្ឍន៍តាមបែបប្រជាធិបតេយ្យ។ កំណែទម្រង់នេះបានរួមចំណែកក្នុងការលើកកម្ពស់អភិបាលកិច្ចល្អ ការផ្តល់សេវាសាធារណៈ និងការអភិវឌ្ឍសេដ្ឋកិច្ចមូលដ្ឋាន ឆ្លើយតបទៅនឹងតម្រូវការចាំបាច់ និងដោះស្រាយបាននូវបញ្ហាប្រឈមជាអាទិភាពនានានៅតាមមូលដ្ឋាន ដែលបានចូលរួមចំណែកដល់ការលើកកម្ពស់ ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ ប្រកបដោយប្រសិទ្ធភាព បរិយាបន្ន និងសមធម៌សង្គម។

ទន្ទឹមនឹងនេះ លោកបានបន្តថា ប្រណិតភាពថ្មីរវាងរាជរដ្ឋាភិបាល និងរដ្ឋបាលថ្នាក់ក្រោមជាតិ គឺជាកិច្ចការថ្មីមួយសម្រាប់យើងទាំងអស់គ្នា ជាពិសេសក្នុងអាណត្តិថ្មីរបស់រាជរដ្ឋាភិបាល អាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចតែងតែផ្តល់ការគាំទ្រ និងជំរុញដល់ការងារកំណែទម្រង់វិមជ្ឈការ និងវិសហមជ្ឈការ ធ្វើយ៉ាងណាឱ្យកំណែទម្រង់នេះបានប្រែក្លាយកាន់តែមុតស្រួច និងស៊ីជម្រៅដើម្បីចូលរួមសម្រេចឱ្យបាននូវគោលដៅអភិវឌ្ឍន៍កម្មវិធីនយោបាយរបស់រាជរដ្ឋាភិបាល អាណត្តិទី៧ និងផែនការយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។

ជាមួយគ្នានេះ លោកអភិបាលរងបានជំរុញដល់មន្ត្រីទាំងអស់ឱ្យបន្តរួមចំណែកអនុវត្តតួនាទី ភាកិច្ចរបស់ខ្លួនដើម្បីសម្រេចបាននូវលទ្ធផលក្នុងសមាសភាគទាំង៥នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ ដែលយើងបានផ្តោតសំខាន់ការបង្កើន ស្តង់ដារផ្តល់សេវាសាធារណៈ ការអភិវឌ្ឍមូលដ្ឋានការអនុវត្តមុខងារដែលបានផ្ទេរឱ្យមានគុណភាព និងបង្កើន ការប្រាស្រ័យទាក់ទងជាសាធារណៈតាមបណ្តាញសង្គម (ឌីជីថល) ឱ្យមានប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម។ តាមរយៈការអនុវត្តមុខងារជាជម្រើស និងមុខងារជាកាតព្វកិច្ចឆ្លើយតបទៅនឹងតម្រូវការរបស់ប្រជាពលរដ្ឋក្នុងខេត្តកំពង់ឆ្នាំង ដើម្បីចូលរួមសម្រេចបានចក្ខុវិស័យកម្ពុជានាឆ្នាំខាងមុខ៕

ដោយ បៃ ស៊ីថុន