AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៥ -- អ្នកការទូតកំពូលនៃក្រុមប្រទេសទាំងប្រាំពីរ (G7) បានអំពាវនាវឱ្យប្រទេសកូរ៉េខាងជើងបោះបង់ចោលអាវុធនុយក្លេអ៊ែរទាំងអស់របស់ខ្លួនក្នុងលក្ខខណ្ឌ «ពេញលេញ អាចផ្ទៀងផ្ទាត់បាន និងមិនអាចផ្លាស់ប្តូរបាន» ខណៈពេលដែលអ្នកការទូតបានបញ្ជាក់ជាថ្មីនូវការប្តេជ្ញាចិត្តរបស់ពួកគេចំពោះ«ការរំសាយអាវុធនុយក្លេអ៊ែរទាំងស្រុង» នៃឧបទ្វីបកូរ៉េ។

ប្រមុខការទូតរបស់សហរដ្ឋអាមេរិក កាណាដា បារាំង អាល្លឺម៉ង់ អ៊ីតាលីអង់គ្លេស ជប៉ុន និងតំណាងជាន់ខ្ពស់របស់សហភាពអឺរ៉ុប បានចេញសេចក្តីថ្លែងការណ៍រួមមួយបន្ទាប់ពីពួកគេបានពិភាក្សានៅគែមនៃសន្និសីទសន្តិសុខអន្តរជាតិនៅទីក្រុងម៉ូនិក ប្រទេសអាល្លឺម៉ង់។

អ្នកការទូតបាននិយាយនៅក្នុងសេចក្តីថ្លែងការណ៍ថា «សមាជិកក្រុមG7 បានសម្តែងការព្រួយបារម្ភយ៉ាងខ្លាំងចំពោះកម្មវិធីនុយក្លេអ៊ែរ និងមីស៊ីលផ្លោងរបស់ប្រទេសកូរ៉េខាងជើង ហើយអ្នកការទូតបានអះអាងសារជាថ្មីនូវការប្តេជ្ញាចិត្តរបស់ពួកគេចំពោះការលុបបំបាត់នុយក្លេអ៊ែរទាំងស្រុងនៃឧបទ្វីបកូរ៉េ»។

ភាគីទាំងអស់បានបន្ថែមថា «ពួកគេបានទាមទារឱ្យប្រទេសកូរ៉េខាងជើងបោះបង់អាវុធនុយក្លេអ៊ែររបស់ខ្លួន កម្មវិធីនុយក្លេអ៊ែរដែលមានស្រាប់ និងអាវុធបំផ្លិចបំផ្លាញដ៏ទៃទៀត និងកម្មវិធីមីស៊ីលផ្លោងក្នុងលក្ខខណ្ឌពេញលេញ ដែលអាចផ្ទៀងផ្ទាត់បាន និងមិនអាចត្រឡប់វិញបានស្របតាមដំណោះស្រាយដែលពាក់ព័ន្ធទាំងអស់របស់ក្រុមប្រឹក្សាសន្តិសុខអង្គការសហប្រជាជាតិ»។

ក្រុមមន្ត្រីបានគូសបញ្ជាក់ថា ការគាំទ្រដោយផ្ទាល់របស់ប្រទេសកូរ៉េខាងជើងចំពោះ        សង្គ្រាមរបស់រុស្ស៊ីប្រឆាំងនឹងអ៊ុយក្រែនគឺជា «ការពង្រីកជម្លោះដ៏គ្រោះថ្នាក់ជាមួយនឹងផលវិបាកយ៉ាងធ្ងន់ធ្ងរដល់សន្តិសុខសហភាពអឺរ៉ុប និងឥណ្ឌូប៉ាស៊ីហ្វិក»។

ប្រមុខការទូត​បាន​និយាយ​ថា​ «​ពួកគេ​បាន​ប្រឆាំង​យ៉ាង​ខ្លាំង​ចំពោះ​ការប៉ុនប៉ង​ណាមួយ​ដើម្បី​ផ្លាស់ប្តូរ​ស្ថានភាព​ជា​ឯកតោភាគី​ដោយ​ប្រើ​កម្លាំង​ហើយ​បាន​គូសបញ្ជាក់​ពី​សារៈសំខាន់​នៃ​ការដោះស្រាយ​ជម្លោះ​ដោយ​សន្តិវិធី​»​។ «ភាគីទាំងអស់បានប្រឆាំងយ៉ាងខ្លាំងចំពោះការប៉ុនប៉ងរបស់ប្រទេសចិន ក្នុងការរឹតបន្តឹងសេរីភាពនៃការធ្វើនាវាចរណ៍តាមរយៈការធ្វើយោធា និងសកម្មភាពបង្ខិតបង្ខំនៅក្នុងសមុទ្រចិនខាងត្បូង»៕

ដោយ៖ មូល មិនា (ប្រភព៖ យ៉ុនហាប់)