AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៥ -- នាយកដ្ឋានពាណិជ្ជកម្ម និងពាណិជ្ជកម្មរបស់ចក្រភពអង់គ្លេសបានប្រកាសថា ខ្លួនកំពុងស្វែងរកមតិសាធារណៈលើយុទ្ធសាស្ត្រដែកថែបដែលមានគោលបំណងរក្សាការប្រកួតប្រជែងជាសកលនៃវិស័យដែកថែបរបស់ចក្រភពអង់គ្លេស ខណៈពេលដែលកំពុងដោះស្រាយបញ្ហាប្រឈមដែលបង្កឡើងដោយពន្ធរបស់សហរដ្ឋអាមេរិកលើការនាំចូលដែកថែប។

ថ្លែងទៅកាន់សារព័ត៌មាន BBC លេខាធិការធុរកិច្ចចក្រភពអង់គ្លេសលោក ចូណាថាន់ រេយនុលស៍ (Jonathan Reynolds) បាននិយាយថា ពន្ធអាចបង្កើនការចំណាយសម្រាប់អ្នកបង់ពន្ធរបស់សហរដ្ឋអាមេរិក។

លោកបាននិយាយថា ចក្រភពអង់គ្លេស និងសហរដ្ឋអាមេរិក មាន«ផលប្រយោជន៍ទៅវិញទៅមក» ក្នុងការចរចាលើការលើកលែងសម្រាប់ចក្រភពអង់គ្លេសពីពន្ធគយដែលបានគ្រោងទុករបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) លើដែកថែប ដោយលោកបានកត់សម្គាល់ថា ចក្រភពអង់គ្លេសអាចផ្តល់ការនាំចេញដែកថែបនិងអាលុយមីញ៉ូម ដែលមាន«ឯកទេសខ្លាំង» ទៅកាន់សហរដ្ឋអាមេរិកដូចជាស្រោមនាវាមុជទឹកដែលផលិតនៅទីក្រុងសេហ្វហ្វីលជាដើម។

យោងតាមយុទ្ធសាស្ត្រ រដ្ឋាភិបាលអង់គ្លេសនឹងដាក់បញ្ចូលទឹកប្រាក់ចំនួន ២,៥ប៊ីលានផោន (៣,១៥ប៊ីលានដុល្លារអាម៉េរិក) ទៅក្នុងឧស្សាហកម្មដែកក្នុងស្រុក និងលើកទឹកចិត្តដល់គម្រោងហេដ្ឋារចនាសម្ព័ន្ធដើម្បីផ្តល់អាទិភាពដល់ឧស្សាហកម្មដែកថែបដែលផលិតនៅចក្រភពអង់គ្លេស។ ជាឧទាហរណ៍ ការពង្រីកអាកាសយានដ្ឋាន Heathrow ដែលបានគ្រោងទុកត្រូវបានគេរំពឹងថានឹងប្រើប្រាស់ដែកចំនួន ៤០០.០០០តោន។

លោក ត្រាំ បានប្រកាសពន្ធ ២៥% លើការនាំចូលដែកថែបទាំងអស់ដែលចាប់ផ្តើមនៅក្នុងខែមីនា ដោយបង្កើនការព្រួយបារម្ភនៅក្នុងរដ្ឋាភិបាលអង់គ្លេសជុំវិញការកើនឡើងថ្លៃពាណិជ្ជកម្ម ដោយសារសហរដ្ឋអាមេរិកមានចំណែកប្រហែល ១០% នៃការនាំចេញដែកថែបរបស់ចក្រភពអង់គ្លេស៕

ដោយ៖ មូល មិនា (ប្រភព៖ ស៊ីនហួ)